لوگيكانى جانداي جاقسى كورەمىز. الايدا, ماتەماتيكاعا و كىسىنىڭ قۇشتارلىعى بىزدىكىنەن الدەقايدا ىستىق. ءتىپتى, جوعارى ءبىلىم جولىن «ناقتى عىلىمداردىڭ اتاسىنان» باستاعان ەكەن. باستاۋىن باستاعان… بىراق قارا ولەڭگە, كوركەم سوزگە قۇمارلىعى ەسەپكە دەگەن ەلەڭدەۋشىلىگىنەن جوعارى كەرنەۋلى كورىنگەنگە ۇقسايدى.
ينستيتۋتتاعى «العاشقى ماحابباتى» تۋرالى جۋىرداعى جىلدار بىرىندە قىسقا دا نۇسقا جازعانى بار: «مىرجاقىپتىڭ «ماتەماتيكا مەكتەبى»! اۋەلى كونفەرەنتسيا بايانداماسى رەتىندە ازىرلەنىپ, كەيىن «استانا اقشامىندا» جاريالانعان جۇپ-جۇمىر ماقالاسىن تاۋىپ, بالكىم, قايتالاپ وقىرسىز. مۇندا سۇڭعىلا بىلىمدارلىقپەن قاتار سول باياعى قۇشتارلىق ۇشقىندايدى. ايتپەسە, ماتەماتيكانى بىلگىر فيلولوگتىڭ ءبارى ماتەماتيكشە, فيلولوگيانى بىلگىر ماتەماتيكتىڭ ءبارى فيلولوگشا تۇسىندىرە الماسى انىق.
***
ارمان ارتىنىپ استاناعا كەلگەن كەزىمىز ەسكە ءجيى ورالادى. ورالعان سايىن ەن ەلوردادان العاش تانىعاندارىمنىڭ ءبىرى امانتاي جارىلقاسىنۇلىنان وي اينالدىرىپ ءوتۋ قيىن. ونىڭ تالانتتى عالىم – تالدامپاز ماتىنگەر, تالعامپاز مانەرشىلدىگىن ىلىمدەس ارىپتەستەرى ءالى تالاي تارازىلار. بىزدىكى – ءوزارا باسشى-قىزمەتكەر, اۆتور-وقىرمان, اعا-ىنىلىك قارىم-قاتىناسىمىزدان كوكەيگە ىلىنگەن كەي جايتتار تۋرالى لەبىز ءبىلدىرۋ عانا.
تامىز تامىلجىپ تۇر. استانا اكىمدىگى جانىنان شىعاتىن گازەتتىڭ رەداكتسياسىن باعدارعا ۇستاپ ءجۇرىپ كەلەمىز. ستۋدەنت كەزىمىزدەن-اق اتى بار باسىلىمنىڭ تىلشىلىگىن جاۋاپتى حاتشىلىعىنا قوسىپ, اجەپتاۋىر ۋاقىت اتقارىپ كەلگەن «امبيتسيامىز» جۇمىسقا ورنالاساتىنىمىزعا قىلاۋداي كۇمان قالدىرماستان, سىبىرلاپ قويادى: «قابىلداعاندا دا, قۋانا قابىلدار!». جەتتىك. «جەلتوقسان, 28/1». باس رەداكتور بولمەسىندەمىز. قوجايىن از-كەم اڭگىمەدەن سوڭ كۇلىمسىرەي سويلەگەن كۇيى كوررەكتورلىق قىزمەتىن ۇسىندى. ءبىز مي اشىتىپ, اۋرە بولماستان باس تارتتىق.
كەلەسى كۇنى قايتا اينالىپ كەلدىك. كەلىسەتىنىمىزدى بىلدىرمەكپىز – ەسەسىنە باسشى اينىپ قالىپتى: «قابىلداپ, تىلدەسەتىن دە ۋاقىت جوق. ماڭايدان اۋلاق ءجۇرسىن». مي اشىدى. ابدەن اشىدى – باسقا بارار جەر جوقتاي كورىنەدى. اقىرى, «اكە, كوكەلەپ» جۇمىسقا قابىلداندىق-اۋ. «جىبەك ورامال كەپكەننەن» كەيىنگى سوزىنەن ۇققانىم مىناۋ بولدى: «قىزمەت ادامدى ەمەس, ادام قىزمەتتى كوركەيتەدى. الاشقا تۇتقا بولعانداي تالاي اعالارىمىز تولىسىپ, قالىپتاسقان كەزدەرىنىڭ وزىندە قيلى-قيلى جولداردان وتكەنىن, ايلاپ جۇمىسسىز جۇرگەنىن ۇمىتپاۋ كەرەك…». بۇل – باس رەداكتور مىرزانىڭ قولىندا بار كارتاسىن بۇلداعانى ەمەس, جاس مامانعا بەرگەن ءتالىمى ەدى. ايتپاقشى, سول كۇن بەيجىڭ وليمپياداسى الاۋى تۇتانۋىمەن سايكەس كەلدى, كۇنتىزبەدە 08.08.08. تۇرعانىنان, سول كۇنى گازەت قايتادان «استانا اقشامى» اتاۋىمەن شىعا باستاۋىنان سيمۆوليكالىق جىلۋ سەزىنگەندەيمىز. بۇگىندە كۇندەلىگىمنىڭ ءبىر بەتىنەن جىرتساڭ دا, وشە قويماس جازۋدى وقي قالسام, قۋانام: «جۇمىسقا ورنالاسقانىما – التىنشى كۇن. بىلدەي كوررەكتورمىن». نەگىزى, بايعۇس جاس مامان كوررەكتورلىقتى دۇنيەنىڭ قورى ساناپ تۇرعان ەشتەڭەسى جوق…
***
تابيعي جاراتىلىسىنىڭ وزەگى – عالىمدىق. ونىسى ءار ارەكەتىنەن, وي-پايىمىنان ايقىن اڭعارىلادى. اسىرەسە, ءبىز بايقاعان باس رەداكتور امانتاي ءشارىپتىڭ ءماتىن تەكسەرۋ مۇقياتتىعى – ءجونى بولەك اڭگىمە. ەكى سويلەمدىك گازەتتىك حابارلاماعا تاقىرىپ قويۋ ءۇشىن, ەكى ساعات ويلانۋعا بار. ويلاۋ جىلدامدىعىنىڭ شاباندىعىنان دەي الماسپىز, البەتتە. عالىمدىق ادالدىقتان سىڭىرگەنى.
قازاق قارا سوزىنە كوزقاراسى كىرپياز قالامگەر اعا ماقسوت ءىزىمۇلىنىڭ بىلاي دەيتىنى ەسىمدە: «امانتايدىڭ سوزدەرىنىڭ اراسىنا قىل سىيعىزۋ قيىن. ول ول ما, ءبىر ءسوزىن الىپ تاستاساڭ, جازعانى تۇگەل اقساپ قالاتىنداي قالانىپ تۇرادى».
اكادەميالىق الىمدىلىعى ۇشان-تەڭىز ەنتسيكلوپەديالىق اڭگىمەلەرىنەن ەش جاسىرىنا المايدى. جانىنا جارقىن تاقىرىپتىڭ ءتىنى تارقاتىلعانىن ۇقساڭىز, الدەن-ءازىر توقتاي قويارىنا ۇمىتتەنبەڭىز. تىڭداي بەرىڭىز – تىڭداي ءتۇسىڭىز. «ۋاقىت», «كەڭىستىك» سىندى ۇعىمدار ۇمىتىلعانى ابزال. ۇمىتادى دا – ۇمىتتىرادى دا.
جەلبىر-جەكەن جازۋعا ساراڭ. «اعامىن عوي» دەپ ءارپىل-ءتارپىل «كوسەمسۋدەن» ادا. ياعني, ادام رەتىندە ءجوندى-ءجونسىز اقىل تىقپالاۋدان اۋلاق. بويىنان عالامات بىلىمىنە جات اڭعالدىق, العاۋسىز بالالىق اڭعارىلۋى دا ىقتيمال.
***
جان-سارايىمىز ينتۋيتسياشىل. الايدا, و كىسىنىڭ تۇيسىك تەرەڭدىگى وڭايلىقپەن بويلاتپايدى. فيلولوگ-ستۋدەنتتەردىڭ ءالى كۇنگە دەيىن ۇستەلۇستىلىك كىتابى «ءسوز ونەرىندە» اۆتور شىعارماشىلىق ادامىنا اسا قاجەت قابىلەتتەر ساناتىندا ينتۋيتسيانى ەرەكشە اتاۋشى ەدى. وسى ءبىر جاپىراقتاي جازبانىڭ كەيىپكەرى – تابيعاتىنان تۇيسىكتال ازامات. ونىسى, ارينە, ۇستازى اكادەميك زەينوللا قابدولوۆ الگىندەي دەگەندىكتەن عانا ەمەس شىعار.
p.s. استانالىق ومىرىمىزدەگى بەلسەندى بەينەلەردىڭ ءبىرى جونىندە كوڭىلدەگى جازۋدى سىرتقا شىعارايىق دەپپىز. بيىل. مامىر قارساڭىندا. مەرەيتويلىق پافوسسىز.
ەربولات قامەن
