تاماق ماسەلەسىن تالقىلادى
استانا قالاسى تۇتىنۋشىلاردىڭ قۇقىقتارىن قورعاۋ دەپارتامەنتى «حالىقتىڭ تاماق قاۋىپسىزدىگىن قامتاماسىز ەتۋدە مەملەكەتتىك ورگاندارمەن كاسىپكەرلەردىڭ بىرلەسىپ جۇمىس ىستەۋى» اتتى تاقىرىپتا «دوڭگەلەك ۇستەل» وتكىزدى.
وسى سوڭعى ءبىر-ەكى اي كولەمىندە قالا تۇرعىندارىنىڭ كوپشىلىك ءجيى اۋقاتتاناتىن ورىنداردا تاماقتان ۋلانۋ وقيعالارى كەزدەستى. سوندىقتان, اتالعان جاعداي بۇگىنگى تاڭدا وزەكتى ماسەلەگە اينالىپ, كوپشىلىكتى الاڭداتىپ وتىرعانى راس. ءارى سىرتتان كەلەتىن تاماق ونىمدەرىنىڭ كەيبىر تۇرلەرىنىڭ ساپاسىزدىعى دا سىن كوتەرمەيدى. جيىنعا قاتىسقان جاۋاپتى ماماندار دا وسى توڭىرەكتە وي قوزعاپ, جەكە كاسىپكەرلەرمەن بىرلەسە وتىرىپ, وسىنداي كەلەڭسىز جاعدايلار تاعى قايتالانباۋى ءۇشىن, ونىڭ الدىن الۋدىڭ ءتيىمدى جولدارى قانداي بولماق دەگەن
تاراپتا اڭگىمە ءوربىتتى. تىزگىندى جوعارىدا اتالعان دەپارتامەنتتىڭ ديرەكتورى نۇرلىبەك اسىلبەكوۆ ءوزى الىپ, جۇرگىزىپ وتىردى.
– بۇگىنگى ءبىز حالىق تۇتىناتىن تاماقتىڭ ساپاسى مەن ونىڭ قاۋىپسىزدىگىن قامتاماسىز ەتۋ ماسەلەلەرىن تالقىلاۋ ءۇشىن جينالدىق. ويتكەنى, وسى كەلەڭسىز جاعدايعا قالا تۇرعىندارى قاتتى الاڭداۋلى. ول تۇسىنىكتى. سوندىقتان ءبارىمىز بىرلەسىپ, ءتۇيىندى ماسەلەنىڭ جاۋابىن ىزدەسەك دەيمىز, – دەدى جينالعانداردى سوزگە تارتا سويلەگەن مەكەمە باسشىسى.
ودان كەيىن ءسوز العان قر ۇلتتىق ەكونوميكا مينيسترلىگىنىڭ وكىلى مارال راحىمجانوۆا دا وسى ماسەلە تۋرالى ءوز ويىن ساباقتاپ ءوتتى. اتالمىش دەپارتامەنت ديرەكتورىنىڭ ورىنباسارى سارحات بەيسەنوۆا قالاداعى سانيتارلىق-ەپيدەميولوگيالىق جاعدايى جايىندا بايانداما جاسادى. اسىرەسە, «استانا ەكسپەرتيزا» جشس-ءنىڭ جەتەكشىسى تاتيانا كونونوۆا: «كوبىنەسە سىرتتان كەلەتىن كەيبىر تاماق ونىمدەرىنىڭ ساپاسىزدىعى قىنجىلتادى. كوتەرمە ساۋدامەن اينالىساتىن نۇكتەلەردەگى تاماق ونىمدەرىنە مۇقيات بولعان ءجون. ارينە, ولاردى دا ءتۇسىنۋ كەرەك. دەگەنمەن, حالىق تۇتىناتىن ازىق-تۇلىك ونىمدەرىنە قاتاڭ قاداعالاۋ قاجەت. ماسەلەن, ماسكەۋ قالاسىندا وسى باقىلاۋ شاراسى ءتيىمدى جولعا قويىلعان. ول جەردە تاماق ونىمدەرىن ساتاتىن ساۋدا نۇكتەلەرى ايتىلعان ەسكەرتپەلەردى ىسكە اسىرماسا, قاتاڭ شارا قولدانۋعا دەيىن بارادى. مۇمكىن, بىزگە وسىنداي تالاپتار قاجەت شىعار» دەپ, ءوز ويىن ءبىر تياناقتادى. سونداي-اق, «دوڭگەلەك ۇستەل» باسىنداعى كەزدەسۋدە ەلوردانىڭ ساتۋ نىساندارىندا سانيتارلىق-ەپيدەميولوگيالىق قاداعالاۋعا جاتاتىن تاۋارلارعا قويىلاتىن تالاپتار مەن ءتيىستى زاڭناماعا سايكەس كەلمەيتىن تاماق ونىمدەرىن ساتۋ فاكتىلەرى توڭىرەگىندە دە ءسوز بولدى.
ازامات ەسەنجول