«تاڭ سامالىمەن» تەربەتتى

ەركەعالي راحماديەۆ اتىنداعى مەملەكەتتىك اكادەميالىق فيلارمونياسى «تاڭ سامالى» كونتسەرتىن ۇسىندى. كەش ونەر ۇجىمى اتاۋىن يەلەنگەن كورنەكتى كومپوزيتوردىڭ شىعارماشىلىعىنا ارنالدى.

كسرو حالىق ءارتىسى, قازاقستاننىڭ ەڭبەك ەرى, پەداگوگ ەركەعالي راحماديەۆ ءار الۋان جانردا مۋزىكا جازدى. ونىڭ «دايراباي» جانە «قۇداشا-دۋمان» سيمفونيالىق كۇيلەرى, «قامار سۇلۋ», «الپامىس», «ابىلاي حان» وپەرالارى, رومانستار مەن اندەرى بار. ونىڭ زامانداسى, بەلگىلى كومپوزيتور روديون ششەدرين كەزىندە: «ەركەعالي راحماديەۆ – ءوز حالقىنىڭ مادەنيەتىنەن ءنار العان كومپوزيتور. قازاق ونەرى بۇگىندە كسرو-نىڭ ۇزدىك ساحنالارىندا ونىڭ مۋزىكاسى ارقىلى تانىمال, راحماديەۆتىڭ تۋىندىلارى شەتەلدە دە ءساتتى ورىندالادى…» دەپ جازدى.

راحماديەۆ ءومىرىنىڭ سوڭعى جىلدارىنداعى شىعارماشىلىق قىزمەتى ەلوردامەن تىعىز بايلانىستا بولدى. ول قازاق ۇلتتىق ونەر ۋنيۆەرسيتەتىندە ءدارىس وقىپ, سوڭعى كۇندەرىنە دەيىن ءوزىنىڭ تالانتىن, تاجىريبەسى مەن ءبىلىمىن اينالاسىنداعىلارمەن قۋانا ءبولىسىپ وتىردى. ال 2021 جىلى ەسىمىنىڭ استانا قالاسىنىڭ مەملەكەتتىك اكادەميالىق فيلارمونياسىنا بەرىلۋى – قالا ءۇشىن ماڭىزدى وقيعا.

كونتسەرتتىڭ اتاۋى اقىن نۇتفوللا شاكەنوۆتىڭ سوزىنە جازىلعان «تاڭ سامالى» ليروەپيكالىق انىنەن الىندى. جاس كەزىندە سۇيىكتى قالاسى الماتىدان شابىت العان ەركەعالي راحماديەۆ تۋىندىنى جارى كلاراعا ارناعان. ءان كسرو حالىق ءارتىسى روزا باعلانوۆانىڭ رەپەرتۋارىنا ەنىپ, حالىق سۇيىسپەنشىلىگىنە بولەندى. كەشتە كورەرمەن وسى ءاندى قازاقستانننىڭ ەڭبەك سىڭىرگەن قايراتكەرى بيبىگۇل جانۇزاقتىڭ (سوپرانو) ورىنداۋىندا تىڭدادى.

سونىمەن قاتار كەش بارىسىندا «قامار سۇلۋ» جانە «الپامىس» وپەرالارىنان ۇزىندىلەر, «كۇندەر زۋلاپ بارادى», «تۋعان ەل تۋرالى جىر», «وسىناۋ انگە سالعايسىڭ», «اق تىرنالار», «ءانشى باقىتتى», «شاتتىق ءۆالسى», ت. ب. اندەر مەن رومانستارى شىر­قالدى. كونتسەرتكە قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆ (باريتون), «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا (باريتون), حالىقارالىق بايقاۋلاردىڭ لاۋرەاتتارى ايگەرىم امانجولوۆا (سوپرانو), فيرۋزا راحمەتوۆا (سوپرانو), شاحريزادا تىنىشتىق (سوپرانو), التىنبەك ارىستانبەك (تەنور), تالعات اللابيرينوۆ (تەنور), ءنۇرسات الماس (باريتون) قاتىستى. فورتەپيانو پارتياسىن مادەنيەت سالاسىنىڭ ۇزدىگى روزا شوتقاليەۆا ورىندادى.