13 مامىر كءۇنى «استانا وپەرا» تەاترىنىڭ كامەرالىق زالىندا قازاقستاننىڭ اسا كورنەكتى كومپوزيتورلارىنىڭ بىرى ەركەعالي راحماديەۆتىڭ مۋزىكالىق جاۋھارلارى ۇسىنىلدى. «تاڭ سامالى» اتتى مازمۇندى كونتسەرتتە حالىقارالىق بايقاۋلاردىڭ لاۋرەاتتارى ونەر كورسەتتى.
كەش باستالار الدىندا ءسوز العان ايگىلى كومپوزيتوردىڭ جارى كلارا راحماديەۆانىڭ ايتۋىنشا, ول ونەرگە قىزمەت ەتۋ جولىندا تەك قانا مۋزىكالىق شىعارمالاردى جازۋمەن شەكتەلىپ قويماي, شىعارماشىلىق شىڭىنا قول جەتكىزگەن سوڭ, دارىندى جاس مۋزىكانتتارعا قولداۋ كورسەتۋدى ءوزىنىڭ مىندەتتى پارىزى ساناعان ەكەن.
كونتسەرتتە قازاقستاننىڭ ەڭبەك سىڭىرگەن قايراتكەرى بيبىگۇل جانۇزاق, بەيىمبەت تاڭارىقوۆ, نازىم ساعىنتاي, ەربول مۇقانوۆ, ۇلپان اۋباكىروۆا, التىنبەك ابىلدا, المات ىزبامبەتوۆ, نارعىز ساتمۇحامبەتوۆا, اسەل ۋاشەۆا جانە جانەل قاتپاەۆا, جۇمابەك قانتارباەۆ, راسۇل جارماعامبەتوۆ, مارات ايتىمباي, ءدامىر سادۋاقاسوۆ, ءمادينا ايداربەكوۆا, ديانا تايمىشەۆا, ازات تۇرانەل, ەرۇلان كامەل, دانيار دوولوتباقوۆ, ارتۋر عابديەۆ, سونىمەن قاتار استانا قالاسى مەملەكەتتىك اكادەميالىق فيلارمونياسىنىڭ كامەرالىق حورى ونەر كورسەتتى.
ءارتۇرلى نومىرلەردەن تۇراتىن باعدارلامانى «الپامىس», «ابىلاي حان», «قامار سۇلۋ» وپەرالارىنان اريالار مەن دۋەتتەر, ە. راحماديەۆتىڭ ايگىلى رومانستارى مەن اندەرى كوركەمدەدى. سونىمەن بىرگە دج.ۆەرديدىڭ «سيتسيليالىق كەشكى دۇعا» وپەراسىنان ەلەنانىڭ بولەروسى, ۆ.ا.موتسارتتىڭ «سيقىرلى فلەيتا» وپەراسىنان تۇن پاتشايىمىنىڭ ارياسى, دج.ءپۋچچينيدىڭ «تۋراندوت» وپەراسىنان كالافتىڭ ارياسى جانە باسقا شىعارمالار كوپشىلىكتىڭ كوڭىل تولقىنىن تەربەدى.
– ەركەعالي راحماديەۆتىڭ شىعارمالارىن ورىنداعان سايىن بويىمدى اركەز شابىت بيلەپ, ەرەكشە بىر كۇشپەن جۇمىس ىستەگىم كەلەدى. مەنىڭ ۇستازىم – پروفەسسور, قازاقستاننىڭ حالىق ارتىسى قورلان قاليلامبەكوۆا – ە.راحماديەۆتىڭ «تىڭ تۋرالى ان» وپەراسىنداعى كاتيانىڭ پارتياسىن العاش ورىنداۋشى, ول مەن ءۇشىن ۇلگى. اتالعان كەشتە مەن ۇستازىم ۇيرەتكەن ۆوكالدىق ونەردىڭ قىر-سىرىن ەسكەرە وتىرىپ, وسى وپەراداعى اريانى شىرقادىم, كورەرمەن جاقسى قابىلداعان سياقتى, – دەيدى ە.راحماديەۆ اتىنداعى I حالىقارالىق بايقاۋدىڭ لاۋرەاتى اسەل ۋاشەۆا.
كونتسەرت كومپوزيتوردىڭ جارى كلارا راحماديەۆاعا ارنالعان ليرو-ەپوستىق «تاڭ سامالى» انىنىڭ اتاۋىمەن اتالدى. ونىڭ سوزىن ايگىلى اقىن نۇفتوللا شاكەنوۆ جازعان. كەشكە جينالعاندار اسەم اندەردىڭ سىيقىرلى الەمىندە تەربەتىلىپ, ۇلكەن اسەرگە بولەندى.
مەڭدوللا نۇرىمۇلى
