استانا كۇنى مەرەكەسى اياسىندا ەلوردادا IX «ازيا جاڭعىرىعى» اتتى حالىقارالىق تسيرك ونەرى فەستيۆالى وتەدى. باس قالا تۇرعىندارى مەن قوناقتارى ءبىر اپتا بويى, ياعني, 2-ءشى جانە 7-ءشى شىلدە ارالىعىندا سەگىز مەملەكەتتىڭ ۇزدىك ارتىستەرىنىڭ ونەرىن تاماشالايدى.
تسيرك – جۇرتتى تاڭقالدىرىپ جۇرەتىن عاجايىپ ونەر سانالادى. اسىرەسە, ونى جاس جەتكىنشەكتەر جاقسى كورەدى. بيىل باس قالادا توعىزىنشى مارتە ءوتىپ وتىرعان فەستيۆالعا بەلارۋس, رەسەي, گوللانديا, موڭعوليا, قىرعىزستان, تۇركىمەنستان, ەفيوپيا جانە وتاندىق تسيرك ونەرىنىڭ مايتالماندارى قاتىسادى.
شارا بارىسىندا كورەرمەندەر افريكانىڭ ەكزوتيكالىق الىپتارىنىڭ شوۋىن تاماشالايدى. وسى جولى تاڭعاجايىپ ونەردىڭ تارلاندارى كەرىك باگيرا مەن مۇيىزتۇمسىق بوني بولماق. قولعا ۇيرەتىلگەن ايۋ مەن مايمىلدىڭ دا ويىندارى ەشكىمدى بەي-جاي قالدىرمايدى. اكروباتتاردىڭ اۋادا تارتىلعان ءجىپ ۇستىندەگى كوز ىلەسپەس ونەرى دە كورگەن جاندى سۇيسىنتەدى. موتوتسيكل مىنگەن ەكۆيليبريستەر مەن ەفيوپيالىق ارتىستەردىڭ يكاريلىك ويىندارى دا قىزىقتىرماي قويمايدى.
– بيىلعى بايقاۋ تاۋەلسىزدىكتىڭ 25 جىلدىعىنا ارنالىپ وتىر. توعىز جىل ىشىندە فەستيۆال تسيرك الەمىندە كوركەمدىگى مەن ۇيىمداستىرۋشىلىعى جوعارى ماڭىزدى شاراعا اينالدى. ەلوردا كۇنىنە ۇسىنىپ وتىرعان سىيىمىز ۇلكەن. بايقاۋ اياسىندا ەلىمىزگە جىل سايىن جاڭا ارتىستەر كەلەدى. ولار ءتۇرلى جانردا ونەر كورسەتەدى. بيىل باس قالا تۇرعىندارى كوپشىلىككە تاڭسىق مۇيىزتۇمسىق پەن كەرىكتىڭ ويىندارىن تاماشالايدى. سوندىقتان, ايتۋلى شارا وتە قىزىقتى بولماق, – دەيدى استانا تسيركىنىڭ ديرەكتورى ەرىك جولجاقسىنوۆ.
سونداي-اق, فەستيۆال اياسىندا ۇيىمداستىرىلاتىن ەرەكشە وقيعالاردىڭ ءبىرى دەپ «كاۆالكادا» مەرەكەلىك شەرۋىن ايتۋعا بولادى. وعان قاتىسۋشىلار 1-ءى مەن 4-ءشى شىلدە كۇنى ساعات 17.00-دە ۇرمەلى اسپاپتار وركەسترىنىڭ سۇيەمەلدەۋىمەن قالا كوشەلەرىمەن ءجۇرىپ وتەدى. ايتالىق, تسيرك ارتىستەرى قابانباي باتىر داڭعىلىنىڭ بويىمەن دوستىق كوشەسىنە دەيىن بارادى. سودان كەيىن تۇركىستان جانە د.قوناەۆ كوشەلەرىمەن ءجۇرىپ, شەرۋ قابانباي باتىر داڭعىلىنىڭ بويىنداعى استانالىق تسيركتىڭ جانىندا اياقتالادى.
تۇيىندەپ ايتقاندا, ەلوردا تۇرعىندارى مەن قوناقتارى الەمنىڭ ازۋىن ايعا بىلەگەن تسيرك ونەرى جۇلدىزدارىنىڭ ويىندارىن تاماشالاپ, قىزىقتى ءبىر قايتالانباس ساتكە بولەنبەك…
ازامات ەسەنجول
