«استانا اقشامى» گازەتىندە جاريالانعان «مەنىڭ اتام – مايدانگەر» كونكۋرسى جايىندا ەلوردامىزدا تۇراتىن تۋىسقاندارىمنان ەستىپ, مەن دە سوعىستا ەرلىك كورسەتكەن اتام تۋرالى جازۋدى ءجون كوردىم. مەنىڭ اتام – ساقتاپبەرگەن اقماعامبەتوۆ 1942 جىلى ۇلى وتان سوعىسىنا اتتانعان.
سوعىسقا كىرىسكەنشە ارناۋلى اسكەري وقۋ بولىمشەسىندە تانكيست اسكەري ماماندىعىن يگەرىپ الادى. سودان ۋكراينا, پولشا, چەحوسلوۆاكيا جەرلەرىن فاشيستەردەن ازات ەتۋگە قاتىسىپ, بەرلينگە شابۋىل جاساۋشىلاردىڭ قاتارىندا بولعان. ونىڭ كەۋدەسىن كوپتەگەن وردەن-مەدالدار كومكەرىپ تۇراتىن. سوعىستاعى ءبىر وپەراتسيا بارىسىندا ەرلىك كورسەتكەنى ءۇشىن كومانديرلەر اتامدى «قىزىل جۇلدىز» وردەنىمەن ماراپاتتاعان.
اكەمنىڭ ايتۋىنشا, ول ۋاقيعا بىلاي بولعان ەكەن: 1944 جىلى بەرلينگە قاراي بەت الىپ بارا جاتقاندا ءبىزدىڭ جاياۋ اسكەر فاشيستەر بەكىنىپ العان ءبىر دەرەۆنيادان ءارى وتە الماي تۇرادى. سوندا مەنىڭ اتام باستاعان «ت-34» تانكى دەرەۆنياعا باسا كىرىپ, جاۋدىڭ ءبارىن جەر جاستاندىرعان ەكەن. مىنە, سول جولعى ەرلىگى ءۇشىن مەنىڭ اتام وردەنگە ۇسىنىلىپتى.
سوعىستان كەيىن اتام تاعى دا بەس جىل اسكەري قىزمەتتە بولعان. 1950 جىلى كاپيتان شەنىندە ەلگە ورالعان. بەيبىت ومىردە اتام قوستاناي وڭىرىندەگى شارۋاشىلىقتا ۇزاق جىلدار اۆتوموبيل جۇرگىزۋشىسى, مەحانيزاتور بولىپ ەڭبەك ەتتى. سوۆحوزدىڭ گاراجىن باسقارعان. تۇيىندەپ ايتقاندا, مەنىڭ اتام ەڭبەك مايدانىندا دا قاجىرلى قايراتىمەن, ەرەن ەڭبەگىمەن ەل-جۇرتقا سىيلى بولعان.
سوعىستا جانە ەڭبەكتە كوپشىلىككە ونەگە بولعان مايدانگەر اتام ۇلكەن اۋلەتتىڭ باسى بولدى. سەگىز بالاسىنان 28 نەمەرە, 32 شوبەرەسى بار. مەن شوبەرەسىمىن. وكىنىشكە قاراي, اتام ومىردەن ەرتەرەك ءوتىپ كەتتى. سوندىقتان, مەن مايدانگەر قاريا كورگەندە ساقتاپبەرگەن اتامدى ەسكە الامىن. ال, بيىلعى ۇلى جەڭىستىڭ 70 جىلدىق مەرەيلى تويىمەن ءبىزدىڭ بارشامىزعا بەيبىت ءومىر سىيلاعان بارلىق سوعىس ارداگەرلەرىن قۇتتىقتايمىن.
اقبوتا ەرمەكباي,
«دارىن» ورتا مەكتەبىنىڭ وقۋشىسى
قوستاناي قالاسى
