كەشە ەۋرازيا ۇلتتىق ۋنيۆەرسيتەتىندە سۋرەتشى اڭساعان مۇستافانىڭ قازاق حاندىعىنىڭ 550 جىلدىعىنا ارناپ شىعارعان فۋتبولكا ديزايندەرىنىڭ كورمە-فلەشموبىن وتكىزدى. وندا اۆتوردىڭ قازاق تاريحىنا قاتىستى ۋاقيعالار مەن داڭقتى تۇلعالار, ۇلتتىق تۇرمىس-سالت نىشاندارى بەينەلەنگەن 55 ءتۇرلى ديزايندىق ۇلگىسى نازارعا ۇسىنىلدى.
وتكەن جىلى «فەيسبۋك» الەۋمەتتىك جەلىسىندە اڭساعان مۇستافا قازاق حاندىعىنىڭ 550 جىلدىق تويى قارساڭىندا 55 ءتۇرلى فۋتبولكا ديزاينىن سىزىپ بەرەتىنىن مالىمدەگەن. ول ءۇشىن ءوزىنىڭ باستاماسىنا قولداۋ بىلدىرۋشىلەردىڭ قولى 550-دەن اسۋى ءتيىس دەپ, ادەيى شارت قويعان دا ەدى. الايدا, تاريحي تويدىڭ قۋانىشىن تاسىتقىسى كەلگەن سۋرەتشىنى 1100-دەن استام فەيسبۋك تۇتىنۋشى قولداپتى.
سونىمەن, اڭساعان ءبىر جىلدىق ەڭبەگىنىڭ جەمىسىن كەشە كوپشىلىككە تانىستىرىپ, ونى قازاق حاندىعىنىڭ 550 جىلدىق تويىنا شاشقان شاشۋىم دەپ ءتۇسىندىردى.
ەۇۋ رەكتورى ەرلان سىزدىقوۆ پەن قازاقستان كۆن وداعى پرەزيدەنتى ەسەنتۇگەل ەلەۋكەن تۇساۋىن كەسكەن كورمەنىڭ اشىلۋ سالتاناتىندا مۇرات ابەنوۆ, ايدوس سارىم, ديحان قامزابەكۇلى, مىرزاگەلدى كەمەل, تۇرسىن جۇرتباي سەكىلدى عالىمدار, قوعام قايراتكەرلەرى قاتىسىپ, تىلەۋلەستىگىن ءبىلدىردى.
ۇلتتىق ناقىشتاعى فۋتبولكا ۇلگىلەرى كاسىپكەرلەر تاراپىنان قىزىعۋشىلىق بولسا, حاندىق تويىنىڭ شاشۋى رەتىندە كوبەيتىلىپ, وتانسۇيگىش ازاماتتاردىڭ تۇتىنۋىنا ۇسىنىلماقشى.
