استانا قالاسىندا 2016 جىلى قۇرىلعان «تارلان باتىرلارى» جاۋاپكەرشىلىگى شەكتەۋلى سەرىكتەستىگى مەملەكەتتىك-جەكەمەنشىك ارىپتەستىك اياسىندا ەل وڭىرلەرىندە دەنە شىنىقتىرۋ جانە ساۋىقتىرۋ شارالارىن دامىتۋدى ماقسات ەتكەن بىردەن-ءبىر مەكەمە بولىپ وتىر.
بۇگىنگى تاڭدا «تارلان باتىرلارى» مەكەمەسى تۇركىستان, قىزىلوردا, سەمەي, ءۇشارال جانە شۋ قالالارىندا ءوز كۇشتەرىمەن پايدالانۋعا بەرگەن 5 دەنە شىنىقتىرۋ-ساۋىقتىرۋ كەشەندەرىنىڭ جۇمىسىن ۇيلەستىرىپ كەلەدى. بۇل كەشەندەردە, نەگىزىنەن, مەكتەپكە دەيىنگى جانە مەكتەپ وقۋشىلارى ءتۇرلى سپورت تۇرلەرىمەن اينالىسادى. ءبىرىنشى كەزەكتە الەۋمەتتىك تۇرعىدان وسال ساناتىن وتباسىلارىنىڭ بالالارىنا جان-جاقتى جاسالادى.
«تارلان باتىرلارى» كاسىپورنى ءار جىل سايىن مەملەكەتتىك-جەكەمەنشىك ارىپتەستىك اياسىندا كەلىسىمشارتتاردى جاڭارتىپ, الماتى, جامبىل, قىزىلوردا, تۇركىستان جانە شىعىس قازاقستان وبلىستارىنىڭ دەنە شىنىقتىرۋ جانە سپورت باسقارمالارىمەن جۇمىس جۇيەسىن ۇيلەستىرىپ وتىرادى.
ماسەلەن, شۋ قالاسىنداعى «تارلان» دەنە شىنىقتىرۋ جانە ساۋىقتىرۋ كەشەنىندە بۇگىنگى تاڭدا 350 بالا تۇراقتى تۇردە بوكس, دزيۋدو, تاەكۆوندو, اۋىر اتلەتيكا جانە كۇرەس تۇرلەرىمەن اينالىسادى. مۇندا تەك قانا سپورتپەن اينالىسىپ قويماي, جاسوسپىرىمدەردىڭ جارىستارعا قاتىسىپ, جوعارعى كورسەتكىشتى سپورتشى بولۋىنا ايرىقشا ءمان بەرىلگەن. اتاپ ايتساق, 2017-2022 جىلدار ارالىعىندا وسى سپورت كەشەنىنەن 24 قازاقستان چەمپيونى, حالىقارالىق جارىستاردىڭ بىرنەشە جۇلدەگەرلەرى تاربيەلەنىپ شىقتى. ال قىزىلوردا قالاسىنداعى «تارلان» كەشەنىندە سپورتپەن اينالىساتىن جاس سپورتشىلاردىڭ جەتىستىكتەرى تىپتەن جاقسى. اتاپ ايتساق, وسى كەشەننەن تاربيە العان 35 ءجاسوسپىرىم قازاقستان چەمپيونى اتاعىن جەڭىپ السا, 50 سپورتشى سپورت شەبەرى, 7 سپورتشى حالىقارالىق دارەجەدەگى سپورت شەبەرى, 1 سپورتشى قازاقستاننىڭ ەڭبەك سىڭىرگەن سپورت شەبەرى ءنورماتيۆىن ورىنداعان.
سەمەي قالاسىنداعى كەشەندە 53 سپورتشى رەسپۋبليكا چەمپيونى اتانسا, 72 سپورت شەبەرى, 23 حالىقارالىق دارەجەدەگى سپورت شەبەرى تۇلەپ ءوستى.
تۇركىستان مەن ءۇشارال قالاسىنداعى «تارلان» كەشەندەرىنىڭ سپورتتىق كورسەتكىشتەرى دە تولايىم تابىستى دەسەك ارتىق ەمەس. بۇل كەشەندەردىڭ شاكىرتتەرى دە قازاقستان, ازيا, ەۋروپا بىرىنشىلىكتەرىندە تالاي جۇلدە الىپ, ەل نامىسىن ابىرويمەن قورعاعانىن بىلەمىز.
«تارلان باتىرلارى» جۇزەگە اسىرىپ وتىرعان يگىلىكتى ءىستىڭ ءمان-جايىن جاقىنىراق بىلمەك ويمەن كاسىپورىن باسشىسىمەن تىلدەستىك. بۇل رەتتە جشس ديرەكتورى بولات ابدراحمانوۆ اتقارىلىپ جاتقان جۇمىستىڭ باستى باعىتى ەل وڭىرلەرىندەگى سپورتتى دامىتۋعا, ايماق تۇرعىندارىن بۇقارالىق سپورتقا تارتۋعا باعىتتالعانىن اتاپ ءوتتى.
– «تارلان باتىرلارى» قۇرىلعان كەزىنەن باستاپ وڭىرلەردە سپورتتى دامىتۋدى ماقسات ەتكەن. بۇل ءىسىمىزدى مەملەكەتتىك-جەكەمەنشىك ارىپتەستىك اياسىندا قولداۋشىلار دا تابىلدى. الدىمەن كەشەندەر سالۋ ماسەلەسى قولعا الىندى. بىرىنەن سوڭ ءبىرى بەس ايماقتا سپورت كەشەندەرى بوي كوتەردى. سودان كەيىن ماماندارمەن جۇمىس جۇرگىزدىك. جۇيەلى جۇمىستىڭ ناتيجەسىندە بۇگىنگى تاڭدا مىڭداعان بالالار مەن جاستار ءبىزدىڭ كەشەندەردە تۇراقتى تۇردە سپورتپەن, جالپى دەنە شىنىقتىرۋمەن اينالىسىپ ءجۇر. ءبىز قازىرگى جاعدايمەن شەكتەلىپ قالماي, الداعى ۋاقىتتا ەلىمىزدىڭ تاعى بىرنەشە ەلدى مەكەندەرىندە وسىنداي دەنە شىنىقتىرۋ جانە ساۋىقتىرۋ كەشەندەرىن ىسكە قوسقىمىز كەلەدى. بۇل رەتتە, ارينە, جەرگىلىكتى بيلىك وكىلدەرى دە ءوز قولداۋلارىن ءبىلدىرىپ جاتسا, نۇر ۇستىنە نۇر بولار ەدى, – دەيدى سەرىكتەستىك باسشىسى بولات ۇكىبايۇلى.
ەل وڭىرلەرىندە سپورتتىڭ دامۋىنا ايتارلىقتاي ۇلەس قوسىپ كەلە جاتقان, جۇيەلى جۇمىستان جەتىستىككە قول جەتكىزىپ وتىرعان «تارلان باتىرلارى» ۇجىمىنا ءبىز دە تابىس تىلەدىك. وڭىرلەردىڭ وركەندەۋىنە ۇلەس قوساتىن وسىنداي ۇيىمدارعا قولداۋ كورسەتەتىن ۇيىمدار كوپ بولسا دەپ ويلايمىز. ەڭ باستىسى, قانشاما بالالار مەن جاستاردىڭ سالاماتتى ءومىر سالتىن ۇستانۋعا, جوعارى دارەجەلى سپورتشى بولۋىنا جاعداي جاسالىپ جاتقانى قۋانتادى. ولاي بولسا, «تارلان باتىرلارى» سەرىكتەستىگىنە دە وسىنداي جۇمىستى قولعا الامىز دەپ ماقسات قويعان ازاماتتار تابىلىپ جاتسا, بارىنە دە ساتتىلىك پەن تابىستى ەڭبەك تىلەيمىز.
