باستى اقپاراتقوعام

تاسقىن قاۋپى سەيىلگەن جوق



ەلىمىزدە سۋ تاسقىنىنىڭ قاۋپى ءالى سەيىلگەن جوق. قازىردىڭ وزىندە 5 وبلىس توپان سۋ باساتىن اۋماقتا قالىپ وتىر. اقپاندا جاۋعان جاۋىن­نان 2 مەتر قارى مەن مۇزى قوسا قاتقان سولتۇستىك قازاقستان, شىعىس قازاقستان, پاۆلودار وبلىستارىندا قار كوبەسى ءالى سوگىلگەن جوق. وزەندەردىڭ كوپشىلىگى ارناسىنا تولدى. دەمەك, قاۋىپ-قاتەردەن الدىن الا ساقتانىپ, جەدەل قارەكەتكە كوشۋ كەرەك.

توپان سۋدىڭ اۋماعىندا قانشا ءوڭىر بار؟

ۇكىمەتتەگى بىتپەيتىن كوپ جيىننىڭ بىرىندە توتەنشە جاعدايلار ءمينيسترىنىڭ ورىنباسارى باۋىرجان سىزدىقوۆ سۋ باساتىن اۋماقتا 5 وبلىس قالدى دەگەن اقپارات كەلتىردى.

«سۋ تاسقىنىنىڭ جاعدايى تۇراقتى – كۇردەلى. باتىس ايماقتاردا سۋ ازداپ تومەندەدى, ورتالىق, سولتۇستىك جانە شىعىس بولىكتەرىندە, كەرىسىنشە, وزەندەر دەڭگەيىنىڭ قارقىندى جوعارىلاۋى بايقالادى. سۋ باسۋ ايماعىندا 5 وبلىس قالىپ وتىر, اكىمدىكتەرمەن جەرگىلىكتى اۋقىمداعى 20 توتەنشە جاعداي جاريالاندى» دەدى ول.

الايدا اقتوبە, باتىس قازاقستان, قوستاناي, قاراعاندى وبلىستارىندا جاعداي ءالى كۇردەلى. مىسالى, قاراعاندى وبلىسىنىڭ شەت اۋدانىنداعى قايراقتى اۋىلىنىڭ تۇرعىندارى ۇكىمەتتەن ەشقانداي كومەك بولماعانىنا شاعىمدانىپ, ۇكىمەت باسشىسىنا, اۋدان جانە اۋىل اكىمىنە بەينەجولداۋ جىبەرىپتى. ۇيىنە سۋ كىرگەن, جاس بالالارى سىرقاتتانعان قايراقتىلىقتار بۇرسەڭ قاعىپ دالادا ءجۇر. ءحالىمىزدى ەشكىم سۇرامايدى. نە ىستەرىمىزدى بىلمەيمىز. قوناتىن جەر جوق. بۇل ۇكىمەت بىزگە قاشان كومەكتەسەدى؟! 2015 جىلى سۋ تاسىعان كەزدە ءدال وسىلاي الداپ تاستاپ كەتكەن. قۇلاپ جاتقان ۇيلەرىمىز بار, كەتكەن مالىمىز بار, قورامىز بار. سونى ءبىزدىڭ اكىمدىك تەكسەرىپ, قاشان وتەپ بەرەدى؟ الداپ كەتىپ جاتىر. قاعاز جۇزىندە ونى ەشكىم كەلىپ تىركەپ جاتقان جوق. بۇل – حالىقتىڭ جانايقايى» دەيدى ولار. مەملەكەت باسشىسىنىڭ: «ەشكىم نازاردان تىس قالمايدى, زارداپ شەككەن تۇرعىندارعا تۇگەل كومەك كورسەتىلەدى» دەگەن سوزىنە قۇلاق اسپاعان شەن-شەكپەندىلەر دە بار. ۇكىمەت باسشىسى ولجاس بەكتەنوۆتىڭ: «توتەنشە جاعدايلار مينيسترلىگى اكىمدىكتەرمەن جانە باسقا دا كۇشتىك قۇرىلىمدارمەن بىرلەسىپ, سۋ باسقان ەلدى مەكەندەردە اۆاريالىق-قۇتقارۋ جانە كەزەك كۇتتىرمەس شۇعىل جۇمىستاردى جۇرگىزۋ ءۇشىن كۇشتەر مەن قۇرالداردىڭ جەتكىلىكتى كولەمىن قامتاماسىز ەتسىن» دەگەنى ءال-ءازىر ءسوز جۇزىندە قالعانى ما؟!

ولجاس بەكتەنوۆ ۇكىمەت­تەگى جيىندا تاسقىنعا وراي ەل تۇرعىندارىنا كومەك قولىن سوزىپ جاتقان قۇتقارۋشىلارعا, ۇشقىشتارعا, ىشكى ىستەر, قورعانىس مينيسترلىكتەرى مەن ۇلتتىق ۇلان قىزمەتكەرلەرىنە, مەديتسينا قىزمەتكەرلەرىنە جانە قاتارداعى ەرىكتىلەرگە العىسىن ءبىلدىردى.

«1,5 مىڭعا جۋىق ءۇي سۋ استىندا قالدى. باسپانالار قيراپ, جولدار بۇزىلدى. بىرقاتار وڭىردە جەرگىلىكتى اۋقىمداعى توتەنشە جاعداي جاريالاندى. كورىپ وتىرعانىمىزداي, وڭىرلەر سۋ تاسقىنىنىڭ ناقتى قاۋپىن جەتە باعالاي المادى. ءبىز جۇمىستى بارىنشا كۇشەيتۋگە ءتيىسپىز. مەملەكەت باسشىسى كەشەگى كەڭەس بارىسىندا تاسقىن قاۋپى ازايدى دەۋگە بولمايتىنىن اتاپ ءوتتى. الداعى كۇندەرى بولجام بويىنشا اۋا رايى ايتارلىقتاي جىلىنادى دەپ كۇتىلۋدە. دەمەك, ەلىمىزدىڭ سولتۇستىك, ورتالىق جانە شىعىس وڭىرلەرىندە سۋ تاسقىنىنىڭ جاڭا بەلسەندى كەزەڭى باستالادى. بۇعان دايىن بولۋىمىز كەرەك» دەدى ول.

بۇعان ۇكىمەت پەن اكىمدەر قانشالىقتى دايىن بولاتىنىن ۋاقىت كورسەتەر.

 


تاعىدا

تولەن تىلەۋباي

«استانا اقشامى» گازەتىنىڭ شەف-رەداكتورى

ۇقساس جاڭالىقتار

Back to top button