تاتۋ ەلدىڭ تاۋى شاعىلماس
ەلورداداعى ءدىن قىزمەتكەرلەرىنە مەملەكەت باسشىسى نۇرسۇلتان نازارباەۆتىڭ «نۇرلى جول – بولاشاققا باستار جول» اتتى جولداۋى ءتۇسىندىرىلدى.
«ەلباسى ءوزىنىڭ ءار جولداۋىندا تولەرانتتىق تۋرالى, كونفەسسياارالىق جانە ۇلتارالىق بىرلىك جايلى ايتادى. اتالعان ۇعىمدار مەملەكەتىمىزدىڭ باستى قۇندىلىقتارى قاتارىنا جاتادى. كوپ ەلدە, ءتىپتى تمد-عا كىرەتىن كەيبىر مەملەكەتتەردە بۇل جوق. ەتنوسارالىق جانجالدار مەن ءدىني قاقتىعىستار تۋىنداپ, كەرى كەتۋشىلىك بايقالۋدا. ارينە, مۇنداي جاعدايلار كەز كەلگەن مەملەكەتتى العا جىلجىتپايدى. مەملەكەت باسشىسى سول سەبەپتەن دامۋدى تەجەيتىن الەمدىك داعدارىستى ەسەپكە الىپ, ءوز جولداۋىن ادەتتەگىدەي جىل باسىندا ەمەس, جىلدىڭ اياعىندا جولدادى. ءتۇرلى قاقتىعىستاردان ەڭ الدىمەن حالىق زارداپ شەگەدى. ال, ەلباسىنىڭ ءار جولداۋى حالىقتى الەۋمەتتىك تۇرعىدان قولداۋدى كوزدەيدى. سول حالىققا ەڭ جاقىن جۇرەتىن – سىزدەرسىزدەر. جاقىندا جاريالانعان جاڭا جولداۋدا الەمدىك داعدارىس قازاقستاندىقتارعا اسەر ەتپەيتىندەي شارتتار بەلگىلەندى. ەل اراسىندا سونى ايتا جۇرسەڭىزدەر ەكەن دەپ وزدەرىڭىزدى جيناپ وتىرمىز» دەگەن استانا قالاسىنىڭ ءدىن ىستەرى جونىندەگى باسقارماسىنىڭ باسشىسى جورابەك داۋرەنوۆ شارانىڭ ماقساتىن ايقىنداپ بەردى.
ودان كەيىن ول جولداۋدا كورسەتىلگەن باعىتتارعا توقتالدى. ءبىر-بىرىنەن شالعايدا جاتقان قالالاردى بايلانىستىراتىن ماڭىزدى جولداردىڭ قۇرىلىسى جايلى ايتقاندا, بۇل ءىس, اسىرەسە, استانانى ەلىمىزدەگى وزگە وڭىرلەرمەن جاقىنداستىرۋعا جانە ساۋدا نارىعىنىڭ اۋقىمىن كەڭەيتۋگە مول مۇمكىندىك اشاتىنىن اتاپ ءوتتى. حالىقتىڭ تۇرمىسىن جاقسارتۋ ماقساتىندا ەنەرگەتيكالىق ينفراقۇرىلىمدى دامىتۋ, تۇرعىن ءۇي-كوممۋنالدىق شارۋاشىلىقتى, سۋمەن جانە جىلۋمەن قامتاماسىز ەتۋ جۇيەلەرىن جاڭعىرتۋ ىستەرى جۇرگىزىلەتىنىن, بۇل جۇمىستارعا قوماقتى قارجى بولىنگەنىن جەتكىزدى.
بۇدان سوڭ ءسوز العان ەۋروپالىق قۇقىق جانە ادام قۇقىقتارى ساراپشىلىق ينستيتۋتىنىڭ ديرەكتورى مارات باشيموۆ ەلباسى «نۇرلى جول – بولاشاققا باستار جول» جولداۋى ارقىلى كەلەسى جىلى مەملەكەتىمىزدە اتقارىلاتىن ىستەردىڭ جوسپارىن ناقتى ايقىنداپ بەرگەنىن ايتتى. «ەلباسىمىزدىڭ جولداۋى جايلى پىكىر بىلدىرگەن الەمدىك ساراپشىلار ونىڭ كورەگەندىگىنە تاڭعالۋدا. ءوز جولداۋىن جاڭا جىلعا ەكى اي قالعاندا جاريالاعان نۇرسۇلتان نازارباەۆ باسى قايىرىلۋى ءتيىس ىستەردى ۇكىمەتكە كورسەتىپ, كەلەسى جىلى الدىمىزدان شىعۋى مۇمكىن قيىندىقتاردىڭ الدىن الدى» دەگەن ول مەملەكەت باسشىسىنىڭ ەلىمىزدە تاتۋلىق پەن بىرلىكتى ساقتاۋداعى ەڭبەگىنە توقتالدى.
ونىڭ ءسوزىن جالعاعان قالا اكىمدىگىنىڭ ءدىن پروبلەمالارىن زەرتتەۋ ورتالىعى ديرەكتورىنىڭ ورىنباسارى ەسبوسىن سماعۇلوۆ ءدىني تۇرعىدان تۋىنداۋى مۇمكىن تۇيتكىلدەردى اشىپ كورسەتىپ, ولاردىڭ ءبىر فاكتورى رەتىندە حالىقتىڭ الەۋمەتتىك جاعدايىنىڭ تومەندىگىن اتاپ ءوتتى. «بىزدە حالىقتىڭ الەۋمەتتىك احۋالى جامان ەمەس. ەلباسى قازاقستاندىقتاردىڭ جاعدايىن ۇنەمى نازاردا ۇستايدى» دەدى ە.سماعۇلوۆ.
ءدىني قىزمەتكەرلەردىڭ اتىنان سويلەگەن استانالىق حريستياندىق-ەۆانگەليالىق شىركەۋىنىڭ پاستورى الەكساندر كليۋشەۆ پەن «شەيح قۇنتا قاجى» مەشىتىنىڭ باس يمامى جاقيا قاجى يسمايلوۆ مەملەكەت باسشىسىنىڭ جولداۋىن قولدايتىندىقتارىن ايتىپ, وسى جەردە ەستىگەندەرىن جاماعاتقا تاراتاتىندارىن جەتكىزدى.
امانعالي شميتۇلى