قازاقستان حالقى اسسامبلەياسىنىڭ اياسىندا بۇكىل رەسپۋبليكا بويىنشا وبلىستىق, اۋداندىق, اۋىلدىق دەڭگەيدە قۇرىلعان 210-عا جۋىق انالار كەڭەسى جۇمىس ىستەيدى ەكەن. مۇنداي دەرەك 13-14 قاراشادا استانادا وتكەن رەسپۋبليكالىق انالار كەڭەسىنىڭ فورۋمىندا ايتىلدى.
فورۋمنىڭ اشىلۋ سالتاناتىندا ءسوز سويلەگەن قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ تاتۋلىق پەن تاعاتتىلىق, ءتاربيە باستاۋلارىن تالقىعا سالاتىن, تاجىريبە الماساتىن پىكىرتالاس الاڭى ەلباسى نۇرسۇلتان نازارباەۆتىڭ «نۇرلى جول – بولاشاققا باستار جول» اتتى حالىققا جولداۋىنىڭ جاريالانۋىنا ءساتتى ورايلاسقانىن اتاپ ءوتتى.
– بارشاڭىزعا ءمالىم, بىزدە تاياۋدا «مەدياتسيا تۋرالى» زاڭ قابىلداندى. بىراق, مەنىڭ ويىمشا, ناعىز مەدياتور, ياعني, ءمامىلەگەر – ساليقالى ۇرپاقتىڭ ءتاربيەشىسى سانالاتىن انالار, – دەپ ءوز پايىمىن ءبىلدىرە كەتكەن ەرالى لۇقپانۇلى ەلباسى جولداۋىنان وعان دايەكسوز دە كەلتىردى.
– «تۇراقتىلىق پەن كەلىسىم دەگەنىمىز نە؟ ول – وتباسىلىق ءال-اۋقات, قاۋىپسىزدىك, باسپانا. بەيبىتشىلىك – ول اكە مەن انا قۋانىشى, اتا-انالار دەنساۋلىعى جانە ءبىزدىڭ بالالارىمىزدىڭ باقىتى. بەيبىتشىلىك – ول تۇراقتى جۇمىس, جالاقى جانە ەرتەڭگى كۇنگە دەگەن سەنىم. بەيبىتشىلىك پەن تۇراقتىلىق – كۇن سايىنعى ەڭبەكپەن قورعاپ, نىعايتۋدى قاجەت ەتەتىن جالپىحالىقتىق جەتىستىك. مەن جاستار – ءبىزدىڭ بولاشاعىمىزدىڭ تىرەگى دەگەندى اركەز ايتىپ كەلەمىن» دەي وتىرىپ, ەلباسى اۋىزبىرشىلىكتە بولۋدىڭ قاراپايىم قاعيداتتارىن قازاقستاندىقتارعا جەتكىزە ءبىلدى. ال, قازاقستان حالقى اسسامبلەياسى – وسى قۇندىلىقتار سىڭىرىلەتىن ۇلكەن
تاتۋ وتباسى دەدى ول.
فورۋم بارىسىندا بىلگەنىمىزدەي, انالار كەڭەسىنىڭ وڭدى تاجىريبەسى جايىندا مىسال كوپ. مىسالى, شىعىس قازاقستاندىق ايەلدەر حالىق قولونەرىن جاڭعىرتىپ جاتىر. قوستاناي وبلىسىندا ىسكەر وتاعاسىلاردىڭ كلۋبى ءتارتىبى ناشار ءجاسوسپىرىمدەردى قامقورلىعىنا الىپتى. ال, تالدىقورعاندا انالار كەڭەسىنىڭ بەلسەندى جۇمىسىنىڭ ارقاسىندا ءبىرتالاي وتباسى اجىراسۋدان امان قالىپتى.
كەرەگەسىنىڭ قيۋى مەن جۇگىنىڭ جيۋى تياناقتى, ياعني, ۇيەلمەن ۇيلەسىمى ساقتالعان تاتۋ وتباسى تاقسىرەت تارتپايتىنىن تۇيىندەگەن فورۋمدا قر پرەزيدەنتى جانىنداعى ايەلدەر ءىسى جانە وتباسى-دەموگرافيالىق ساياسات جونىندەگى كەڭەستىڭ مۇشەسى, رەپرودۋكتور-دارىگەر سالتانات بايقوشقاروۆا, پارلامەنت ءماجىلىسىنىڭ
دەپۋتاتى ەگور كاپپەل, وڭتۇستىك قازاقستان وبلىسىنىڭ ايەلدەر كەڭەسىنىڭ توراعاسى گاۋھار تولەپوۆالار ءسوز سويلەپ, انالاردىڭ دەنساۋلىق جاعدايى, ايەلدەر قۇقىعىن قورعاۋ, سالت-ءداستۇر مەن ءتىلدى, مادەنيەتتى ساقتاۋ سياقتى ماسەلەلەر بويىنشا مايەكتە ويلارىن ورتاعا سالدى. فورۋمنىڭ العاشقى كۇنىنىڭ ناتيجەسىندە قاتىسۋشىلار ەلباسى نۇرسۇلتان نازارباەۆتىڭ اتىنا ۇندەۋ جولدادى.
ءادىل الاش
