بۇگىنگى تاڭدا استانا قالاسىندا جيىرما ءتورت ۇلتتىق-مادەني ورتالىق قويىن-قولتىق جۇمىس ىستەۋدە. ولاردىڭ بارلىعىنا دا وزدەرىنىڭ انا ءتىلىن, تاريحىن وقىپ-ۇيرەنىپ, ۇلتتىق مادەنيەتى مەن ادەت-عۇرپىن, سالت-ءداستۇرىن دامىتۋعا جان-جاقتى جاعدايلار جاسالعان.
قازاقستان حالقىنىڭ بىرلىگى مەرەكەسى قارساڭىندا ءتۇبى ءبىر, تامىرى ورتاق تۇرىك اعايىنداردىڭ «احىسكا» ەتنو-مادەني ورتالىعىنىڭ جۇمىسىمەن تانىستىق.
ەتنو-مادەني ورتالىق توراعاسى اسكەر پيريەۆتىڭ ايتۋىنشا, ەل تاۋەلسىزدىگىنىڭ العاشقى جىلدارىنان باستاپ قۇرىلعان مادەني ورتالىقتىڭ قازىر تاجىريبەسى مولايىپ, باسقا دا قوعامدىق ۇيىمدارمەن قارىم-قاتىناسى نىعايعان. بيىل ەلباسىنىڭ جارلىعىمەن قازاق حاندىعىنىڭ 550 جىلدىعى, ۇلى وتان سوعىسىنداعى جەڭىستىڭ 70 جىلدىعى, كونستيتۋتسيانىڭ جانە قازاقستان حالقى اسسامبلەياسىنىڭ 20 جىلدىعى مەرەكەلەنەدى. وسىعان بايلانىستى ولار حالىقتى بىرلىككە, تاتۋلىققا, دوستىققا ۇندەيتىن ءىس-شارالار وتكىزىپ, جەڭىس كۇنى مەرەكەسىنە دايىندىق جۇرگىزىپ جاتقان كورىنەدى.
ەلىمىزدە تۇرىك دياسپوراسى وكىلدەرىنىڭ باسىم كوپشىلىگى قازاق تىلىندە سويلەسە, ەلوردادا دا قازاق مەكتەبىندە وقيتىن تۇرىك بالالارىنىڭ قاتارى جىلدان-جىلعا ارتىپ كەلەدى.
– ءبىز قازاق ءتىلىن – ءوزىمىزدىڭ ەكىنشى انا ءتىلىمىز ساناپ, قۇرمەتتەيمىز. «احىسكا» ەتنو-مادەني ورتالىعىنىڭ ەلۋ مۇشەسىنىڭ كوبى مەملەكەتتىك ءتىلدى ەركىن مەڭگەرگەن. جاستار جاعى ارناۋلى كۋرستارعا بارىپ ۇيرەنىپ تە ءجۇر. شەتەلدەن قازاقستانعا جۇمىس ساپارىمەن كەلەتىن تۇرىك كاسىپكەرلەرى اراسىندا دا قازاقشا سويلەيتىندەر وتە كوپ. راسى كەرەك, قازاقستان ەشكىمگە قازاق ءتىلىن ۇيرەن دەپ, زورلاپ تالاپ قويمايدى. دەگەنمەن, وسى ەلدىڭ سۋىن ءىشىپ, ءدامىن تاتىپ جۇرگەسىن ءتىلىن دە ءبىلۋ مىندەت دەپ سانايمىز. جەرىنىڭ كەڭدىگى سياقتى قازاق حالقىنىڭ جۇرەگى دە كەڭ. قانداي ۇلت وكىلى بولماسىن مۇندا ءوزىن ەركىن سەزىنەدى, بۇعان ءبارىمىز كۋامىز, – دەيدى اسكەر اللابەردىۇلى.
«احىسكا» ەتنو-مادەني ورتالىعى بەيبىتشىلىك جانە كەلىسىم سارايىندا ورنالاسقان. ولار قالانىڭ قوعامدىق ومىرىنە بەلسەنە قاتىسادى. «قازاقستان حالقى – ءبىرتۇتاس وتباسىندا», «قازاقستانىم – قارا شاڭىراعىم» سياقتى ءتۇرلى فەستيۆالدەر وتكىزىپ, قارتتار مەن بالالار ۇيلەرىنە بارىپ كونتسەرتتەر بەرىپ تۇرادى. حالىقارالىق تۋرنيرلەر مەن قوعامدىق-ساياسي اكتسيالاردان دا تىس قالمايدى. سونداعى نەگىزگى ماقسات – ەلدەگى سۇتتەي ۇيىعان بەرەكە مەن بىرلىكتى ناسيحاتتاۋ, حالىقتىڭ تاۋسىلماس قازىناسى – تاتۋلىقتى ۇلگى ەتۋ.
تاڭاتار تولەۋعاليەۆ
