ەل ءتاۋەلسىزدىگىنىڭ ەڭ باستى بەلگىلەرىنىڭ ءبىرى – ونىڭ وزىنە عانا ءتان مەملەكەتتىك رامىزدەرى. بۇل – ەلدىڭ باسقارۋ بيلىگىن ءوز قولىنا الۋى, مەملەكەتتىك شەكاراسىن ايقىنداۋى, ءتول تولەم بىرلىگىن شىعارۋى سياقتى اسا ماڭىزدى ەگەمەندىك سيپاتتارىمەن بىتە قايناسىپ جاتىر. تاۋەلسىزدىك تۇمارى سانالاتىن سول مەملەكەتتىك رامىزدەردىڭ قابىلدانعانىنا بيىل – 21 جىل.
بۇگىندە كوگىلدىر ءتۇستى تۋىمىز بەن ورتاسىندا شاڭىراق بەينەسىندەگى التىن ساۋلەلى كۇن ورنىققان ەلتاڭبامىز بۇكىل الەمگە قازاقستان رەسپۋبليكاسى اتالاتىن تاۋەلسىز مەملەكەت بەينەسىن پاش ەتىپ كەلەدى. كوك بايراعىمىز بىرىككەن ۇلتتار ۇيىمى عيماراتىنىڭ الدىندا, بۇكىل دۇنيە جۇزىندەگى مەملەكەتتەردە ورنالاسقان ەلشىلىكتەرىمىزدىڭ ماڭدايشالارىندا تۇر. قازاقتىڭ كوك تۋىن عارىشكەر الاش ازاماتى تالعات مۇساباەۆ عارىش كەمەسىمەن بىرگە الىپ ۇشىپ, جەتى قابات كوكتىڭ جۇزىنە كوتەرسە, الپينيستەرىمىز الەمنىڭ ەڭ بيىك شىڭدارىنا قادادى, ءدۇلدۇل سپورتشىلارىمىز انۇرانمەن بىرگە باسقا ەلدەردىڭ الدىندا ابىروي بيىگىنە كوتەرە جەلبىرەتۋدە.
سونداي-اق, رامىزدەر مەرەكەسىنىڭ ءجونى ەرەكشە. ويتكەنى, ءاربىر ازاماتتىڭ جۇرەگىندە وتانىنا دەگەن سۇيىسپەنشىلىكتى, ءوز ەلىنە دەگەن ماقتانىش سەزىمىن وياتۋدا مەملەكەتتىك رامىزدەردىڭ ماڭىزى اسا زور. جەر بەتىندە قانشا مەملەكەت بار بولسا, سونىڭ اربىرىندە ءوز رامىزدەرى بار. دەگەنمەن دە, مەملەكەتتىك رامىزدەرگە ادەيى ءبىر كۇندى ارناعانىمىزبەن, مەملەكەتتىك رامىزدەر تۋرالى بار اڭگىمە سول كۇنى ايتىلىپ, كەيىن ونىڭ ءبارى تارس ۇمىتىلىپ قالىپ جاتىر. مەملەكەتتىك ورگاندار رامىزدەردى ناسيحاتتاۋعا قۇرعاق شارا رەتىندە قارايدى. قازاقتىڭ بولمىسىن, دۇنيەتانىمىن كورسەتەتىن – ارينە, ءبىزدىڭ رامىزدەرىمىز. ءجىتى ءمان بەرەر بولساق, ءرامىزتانۋشى ەربول شايمەردەنۇلى اعامىزدىڭ ارتىندا «ەلتانىم» سىندى ەڭبەكتەرى قالعانىن بىلەمىز. سوندىقتان دا, جاستاردىڭ بويىندا رامىزدەرگە دەگەن قۇرمەت قالىپتاستىرۋ وتە ماڭىزدى. قاي كىتاپحانانىڭ سورەسىنە كوز سالساڭىز دا, مەملەكەتتىك رامىزدەر تۋرالى كىتاپ كورە المايسىز. وسىنداي كىتاپتار كوبىرەك شىعارىلىپ, ساتىلىپ ەمەس, سىي تۇرىندە ءار وتباسىنا تاراتىلسا, كوپ نارسەدەن ۇتاتىنىمىز انىق. قانداي دەڭگەيدەگى بولماسىن سالتاناتتى جيىنداردا مەملەكەتتىك تۋ مىندەتتى تۇردە ءىلىنىپ تۇرۋى ءتيىس. الدە مادەنيەت, الدە ءبىلىم جانە عىلىم مينيسترلىگى ءانۇراننىڭ ايتىلۋ ستاندارتىن ناسيحاتتاسا, تاسپاسىن تاراتسا, ۇتارىمىز كوپ بولماق. كەز كەلگەن حالىقتىڭ مادەنيەتى مەن مەملەكەتشىلدىگىن ۇلتتىق ءرامىزىن سىيلاۋ دەڭگەيىنە قاراپ, باعالاپ جاتادى. وسىلاي مەملەكەتتىك رامىزدەرىمىزدى قادىرلەي بىلسەك, دوس-دۇشپان الدىندا مارتەبەمىز اسقاقتارى انىق. ەندەشە, ەلتاڭبامىز ايقىن, تۋىمىز بيىك, ءانۇرانىمىز اسقاق بولسىن!
ەركەجان ساتىمبەك,
e.satimbek@astana-akshamy.kz
