جەلتوقساننىڭ العاشقى كۇندەرىنەن تولاسسىز جاۋعان قار مەن اقتۇتەك بوران جول قوزعالىسىنا كەدەرگى كەلتىرگەنمەن, ارنايى تەحنيكالار جاپپاي جۇمىلدىرىلىپ, تازالىق جۇمىستارى ۋاقىتىلى جۇرگىزىلۋدە. وسى تۋراسىنداعى ءمان-جايدى استانا قالاسى كوممۋنالدىق شارۋاشىلىق باسقارماسى باسشىسىنىڭ ورىنباسارى تيمۋر ءابيجانوۆ ايتىپ بەردى.
– قالانى قاردان تازارتۋ ءۇشىن قانداي جۇمىستار جۇرگىزىلۋدە؟
– قازىر ەلوردانىڭ كوممۋنالدىق قىزمەتكەرلەرى كۇندىز-ءتۇنى جۇمىس ىستەپ جاتىر. قار جاۋعان سايىن كوشەلەر تازارتىلىپ وتىرادى. تەحنولوگيالىق ۇدەرىس بويىنشا قوسپا توسەۋ, سىپىرۋ جانە قار كۇرەۋ, ولاردى سىرتقا شىعارۋ سياقتى جۇمىستار ۋاقىتىمەن اتقارىلادى. قار تازالايتىن تەحنيكالار تاۋلىك بويى جۇمىس ىستەيدى. ولار قالا كوشەلەرىندەگى قاردى كۇرەپ, گۇلزارلار مەن جولداردىڭ جيەكتەرىن تازالاپ وتىرادى. قىس ماۋسىمى باستالعالى قالا بويىنشا 400 مىڭ تەكشە مەتردەن استام قار شىعارىلدى.
– قار تازالايتىن قانشا تەحنيكا بار؟
– 822 مامانداندىرىلعان تەحنيكا, 1500-دەن استام جۇمىسشى بار. الماتى اۋدانى بويىنشا 44 مەردىگەر كۇنى-ءتۇنى جۇمىس ىستەۋدە. ەسىل اۋدانىندا 22 مەردىگەر, سارىارقا اۋدانىندا 24 مەردىگەر قول ۇشىن بەرۋدە.
– كوكتايعاقتان ساقتانۋ شارالارى قاراستىرىلعان با؟
– ارينە. ول ءۇشىن ارنايى قۇم-تۇز قوسپالارىن قولدانامىز. كوكتايعاق بولعان جاعدايدا وسىلار جول ۇستىنە سەبىلەدى.
ەركەجان ساتىمبەك
