20 قاراشادان 18 جەلتوقسانعا دەيىن الەم جۇرتىنىڭ نازارى قاتاردا وتەتىن الەم چەمپيوناتىنا اۋادى. فينالدىق كەزەڭگە جولداما العان 32 ەلدىڭ قۇراما كومانداسى ءوزارا مىقتىنى انىقتايدى. ال-بايت ستاديونىندا جارىس قوجايىنى مەن ەكۆادور اراسىنداعى تۇساۋكەسەر ويىن اياقتالدى.
الدىمەن تورتجىلدىقتىڭ باستى دوداسىنىڭ جىلناماسىنا از-كەم توقتالا كەتسەك.
1938-2002 جىلدار ارالىعىندا الەم چەمپيوناتىنىڭ جەڭىمپاز كومانداسى فينالدىق تۋرنيردە ىرىكتەۋدەن وتپەي قاتىسسا, 2006 جىلدان باستاپ ىرىكتەۋدەن وتۋگە مىندەتتەلدى. 1930 جىلدان بەرى (ەكىنشى دۇنيەجۇزىلىك سوعىسقا بايلانىستى 1942 جانە 1946 جىلى ءۇزىلىستى قوسپاعاندا) تۇراقتى وتكىزىلىپ كەلەدى جانە سپورتتىڭ وزگە تۇرىمەن سالىستىرعاندا كورەرمەندى كوپتەپ تارتۋىمەن ەرەكشەلەنەدى. ماسەلەن, 2006 جىلعى الەم چەمپيوناتىن 715,1 ميلليون كورەرمەن تاماشالادى.
الەم چەمپيونى اتالعان 8 ەل بار. برازيليا ەڭ كوپ تيتۋلعا يە. وڭتۇستىكامەريكالىق قۇراما 5 رەت تۇعىردىڭ ەڭ بيىگىنەن كورىندى. يتاليا مەن گەرمانيا 4 رەت چەمپيون اتاندى. ارگەنتينا, ۋرۋگۆاي جانە فرانتسيا ەكى رەت, انگليا مەن يسپانيا قۇراماسى ءبىر رەت ۇزدىك كوماندا رەتىندە مويىندالدى.
ۋرۋگۆايدا وتكەن العاشقى تۋرنيرگە ەۋروپادان فرانتسيا, بەلگيا, رۋمىنيا جانە يۋگوسلاۆيا قۇراماسى قاتىسسا, قالعانى – امەريكالىق ۇجىمدار. ودان كەيىنگى كەزەڭدە ەۋروپا ەلدەرىنىڭ سانى ارتىپ, لاتىن امەريكانىڭ قۇراما كوماندالارىنا نەگىزگى باسەكەلەس بولدى. ماسەلەن, ەۋروپا قۇرامالارى 12 رەت, وڭتۇستىك امەريكا قۇرامالارى 9 رەت جەڭىسكە جەتتى.
ەڭ كوپ فينالعا گەرمانيا شىقتى – 8 رەت. ودان كەيىنگى ورىندا برازيليا قۇراماسى – 7 رەت. فينالعا شىعۋ سانى بويىنشا ءۇشىنشى ورىن يتاليا (6 رەت) قۇراماسىنا ءتيىستى. ازىرگە ازيا مەن افريكا قۇرلىعىنىڭ ەلدەرىنە, چەمپيوندىق اتاقتى ايتپاعاننىڭ وزىندە, ۇزدىك ۇشتىككە ەنۋ بۇيىرماي تۇر. تەك 2002 جىلى وتكەن الەم چەمپيوناتىندا وڭتۇستىك كورەيا ۇزدىك تورتتىككە ەندى.
1970 جىلى مەكسيكادا وتكەن چەمپيوناتتىڭ فينالىنا برازيليا مەن يتاليا شىقتى. ول كەزدە ەكى قۇراما كوماندا دا 2 رەتتەن چەمپيون بولعان-دى. سوسىن 1994 جىلى ەكى قۇراما فينالدا تاعى كەزدەستى. قىزىعى, بۇل جولى برازيليا دا, يتاليا دا 3 رەتتەن جەڭىسكە جەتكەن-ءدى. ەكى فينالدىق كەزدەسۋدە برازيليالىقتار باسىم ءتۇستى. 2010 جىلعا دەيىن ەۋروپالىق كوماندالار ەۋروپادا وتكەن چەمپيوناتتا عانا جەڭىسكە جەتسە, 2010 جىلى وڭتۇستىك افريكادا وتكەن تۋرنيردە يسپانيا قۇراماسى ۇزدىك شىعىپ, ءداستۇردى بۇزدى.
2014 جىلى گەرمانيا قۇراماسى برازيليادا وتكەن چەمپيوناتتا جەڭىسكە جەتكەن العاشقى ەۋروپالىق كوماندا بولدى. 1958, 2002, 2010 جانە 2014 جىلدارداعى چەمپيوناتتاردى قوسپاعاندا, جەڭىمپاز ەل چەمپيونات وتكەن كونتينەنتكە تيەسىلى بولدى.
يتاليا (1934, 1938) جانە برازيليا (1958, 1962) قاتارىنان 2 رەت ۇزدىك اتانىپ, چەمپيوندىق اتاعىن قورعاي الدى. ەۋروپالىق كوماندا يتاليا (2006), يسپانيا (2010), گەرمانيا (2014), فرانتسيا (2018) مۋنديالدا دارالاندى. تۋرنير قوجايىنى الەم چەمپيوناتىندا 6 رەت جەڭىسكە جەتتى. ۋرۋگۆاي (1930), يتاليا (1934), انگليا (1966), ارگەنتينا (1978) جانە فرانتسيا (1998) ءوز ەلىندە العاش رەت جەڭىسكە جەتتى. تەك گەرمانيا (1954), برازيليا (1958) جانە يسپانيا (2010) قۇراماسى سىرت الاڭىندا العاش رەت الەم چەمپيونى اتاندى. ەڭ وكىنىشتىسى, نيدەرلاندى قۇراماسى (1974, 1978, 2010) ءۇش رەت فينالعا شىعىپ, ساتسىزدىككە ۇشىرادى.
سپورت ساراپشىلارى 2022 جىلى قاتاردا وتەتىن الەم چەمپيوناتىنىڭ نەگىزگى فاۆوريتىنە برازيليا, فرانتسيا, انگليا, ارگەنتينا جانە يسپانيانى جاتقىزادى. مەنىڭ ويىمشا, گەرمانيانى ساناتتان شىعارۋعا بولمايدى. نيدەرلاندى ساتسىزدىك سەرياسىن توقتاتقىسى كەلەتىنى انىق. بەلگيا كومانداسى دا كەمەلىنە جەتكەن ۇجىم. ءبىزدى قىزىققا تولى ماتچتار كۇتىپ تۇر.
***
قاتار مەن ەكۆادور اراسىنداعى كەزدەسۋىندە باسىمدىق لاتىنامەريكالىقتاردا بولدى. ەننەر ۆالەنسيا قارسىلاسىنىڭ قاقپاسىنان 16 جانە 31 مينۋتتا ساڭىلاۋ تاۋىپ, سۇرمەرگەندەر كوشىن باستادى.
جالپى لاتىنامەريكالىق كوماندا ءبىر توبە بيىك بولدى. ءبىر قۇرلىقتا برازيليا, ارگەنتينا, ۋرۋگۆاي سىندى مىقتى كوماندامەن دوپ تەبەتىن ەكۆادورلىقتار شەبەرلىگىنىڭ شىڭدالعانى كورىندى.
ال قاتاردىڭ جايى بەلگىلى. ازياداعى ورتانقول كوماندا. ەكىنشى جاعى, ازيا جانە لاتىن امەريكانىڭ كوماندالارى دەڭگەيى ءبىر-بىرىنە ساي كەلمەيتىنى تاعى بار. ولاي بولماسا «سارى كۇرلىقتىڭ» ءبىر كومانداسى وسى ۋاقىتقا دەيىن ءۇشىنشى ورىن الاتىن ەدى عوي!
وقىرمان قاۋىم, رەداكتسياعا ءوز بولجامىڭىزدى جولداپ, بەلسەندىلىك تانىتۋدى دا ۇمىتپاڭىز!
