بۇگىندە باس قالامىزدا كۇن تارتىبىنەن تۇسپەي تۇرعان ماسەلەنىڭ ءبىرى وندىرىستىك قالدىقتار جايى بولىپ وتىر. ەرەجە بويىنشا, قالادان شىعارىلاتىن قوقىستىڭ ءبارى الاش تاس جولىندا ورنالاسقان پوليگونعا شىعارىلۋى كەرەك. الايدا, كەيبىر تۇرعىندار ارنايى ورىنعا بارماي-اق, قالا ماڭىنداعى وي-شۇڭقىرعا قوقىس توگىپ كەتە بەرۋدى ادەتكە اينالدىرىپ العان.
وسى ولقىلىقتىڭ ورنىن تولتىرۋ ماقساتىندا قالا اكىمدىگىنىڭ تاپسىرماسىمەن ءۇش اۋداندا ارنايى جۇمىس توپتارى قۇرىلىپ, رەيدتەر وتكىزۋ قولعا الىندى. وسىنداي شارالاردىڭ ارقاسىندا 18 ءساۋىر مەن 18 مامىر ارالىعىندا جۇرگىزىلگەن ەكولوگيالىق ايلىق اياسىندا استاناداعى رۇقسات ەتىلمەگەن ورىندارعا توگىلگەن 10 مىڭ توننادان استام قالدىق انىقتالىپ, جويىلعانى بەلگىلى. الايدا, قانشا جەردەن ايىپپۇل سالىنىپ, شارا قولدانىلعانىمەن قۇزىرلى ورگانداردىڭ كوزى تايا بەرە, كەز كەلگەن جەرگە قوقىس تاستاپ جۇرە بەرەتىندەر ءالى دە ازايماي تۇر.
ەڭ سوراقىسى, اراعا اي تولماي جاتىپ سول ورىندار قايتادان قوقىسقا تولىپ, قۋىس-قۋىس قالتارىستار وندىرىستىك قالدىقتارعا كومىلىپ جاتىر. كەزەكتى رەيد بارىسىندا استانا قالاسىنىڭ №2 جىلۋ ەلەكتر ورتالىعى (جەو) اۋماعىنداعى وسىدان شامالى عانا ۋاقىت بۇرىن تازارتىلىپ قويعان الاڭنىڭ قايتادان قوقىس بولعانى انىقتالدى. «بۇل ءالى دە بولسا تۇرعىندار اراسىندا قالا مادەنيەتىنىڭ قالىپتاسپاعاندىعىن, قالاعا دەگەن قۇرمەتتىڭ, ەكولوگيالىق تۇيسىكتىڭ جوقتىعىن بىلدىرەدى. باقىلاۋدى كۇشەيتىپ, قالالىق شارۋاشىلىق مەكەمەلەرى قوقىستى ارنايى پوليگونعا جەتكىزگەن-جەتكىزبەگەنىن انىقتاۋ كەرەك. پوليگونعا توگىلگەن قالدىق ءۇشىن تالون بەرىلەدى. وسى تالوندارعا باقىلاۋدى كۇشەيتپەسە بولمايدى» دەيدى «استانا ەكو-پوليگون نس» جشس ديرەكتورىنىڭ ورىنباسارى دۋلات وسكەنباەۆ.
تەكسەرۋ بارىسىندا №2 جىلۋ ەلەكتر ورتالىعى اۋماعىنان مىڭداعان توننا قوقىس جينالىپ قالعان تاعى ءبىر زاڭسىز ءۇيىندى وشاعى تابىلدى. ۇزاماي بۇل پوليگوننىڭ «كونكريت پروداكتس استانا» كاسىپورنىنا تيەسىلى ەكەندىگى انىقتالدى. سونداي-اق, استانا قالاسىنىڭ تەحنوپاركى اۋماعىندا ورنالاسقان «تامىر» جشس بازاسىندا دا ەكولوگيالىق تالاپتاردىڭ بۇزىلۋ وقيعاسى انىقتالدى. بۇل نىساندا ءوندىرىستىك قالدىقتار بىرنەشە جىلدان بەرى شىعارىلماپتى. ناتيجەسىندە زاۋىت ارتىنداعى الاڭقايداعى ۇيىندىلەر كىشىگىرىم تاۋعا اينالۋعا شاق قالعان.
رەيد بارىسىندا «اباتتاندىرۋ, سانيتارلىق جابدىقتاۋ, جيناۋ جۇمىستارىن ۇيىمداستىرۋ جانە استانا قالاسىنىڭ اۋماعىندا تازالىقتى قامتاماسىز ەتۋ قاعيدالارىنا» ءاتۇستى قاراعان بۇل مەكەمەلەرگە اكىمشىلىك شارا قولدانىلىپ, كومپانيا باسشىلارىنا ايىپپۇل سالىندى. سونىمەن قاتار, ءبىر اپتانىڭ ىشىندە زاۋىت ماڭايىن قوقىستان تازارتۋ تۋرالى تالاپ بەرىلدى.
بۇركىت نۇراسىل
