ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى 1 قازاننان باستاپ كورەرمەندەرگە XXIV جاڭا ماۋسىمىنىڭ ەسىگىن اشقالى جاتىر. وسى جونىندە ءبىز اتالمىش مادەنيەت ورداسىنىڭ اقپارات مەنەدجەرى اسەم شاپايقىزىمەن سۇحبات قۇرعان ەدىك.
– جاڭا ماۋسىمدا تەاتر كورەرمەندەرىن قۋانتار قانداي جاڭالىقتارىڭىز بار؟
– قاللەكي تەاترى بيىلعى جاڭا ماۋسىمنىڭ ادەتتەگىدەي شىمىلدىعىن شىڭعىس ايتماتوۆتىڭ «عاسىردان دا ۇزاق كۇن» سپەكتاكلىمەن اشادى. ش.ايتماتوۆتىڭ «انا – جەر انا» تراگەدياسى حالىق قاھارمانى ازىربايجان مامبەتوۆتىڭ سوڭعى قويىلىمدارىنىڭ بىرەگەيى. قويىلىم ب.قۇرمانعوجاەۆتىڭ رەجيسسۋراسىندا قايتا جارىق كورىپ, جاڭا ماۋسىمنان باستاپ كورەرمەندەر نازارىنا ۇسىنىلاتىن بولادى. سىر ەلىندە 10-14 قىركۇيەك ارالىعىندا وتكەن سابيرا مايقانوۆانىڭ 100 جىلدىعىنا ارنالعان قازاقستان دراما تەاترلارىنىڭ XXII رەسپۋبليكالىق فەستيۆالىندە قاللەكي تەاترىنىڭ اتالمىش قويىلىمى قوس جۇلدەنى قانجىعاسىنا بايلاپ قايتتى. ءسابيرا مايقانوۆا اتىنداعى ارناۋلى جۇلدەنى – قر حالىق ءارتىسى گۇلجان اسپەتوۆا يەلەندى. «ەڭ ۇزدىك ايەل بەينەسى» – نوميناتسياسى جەر انا بەينەسىندەگى قر ەڭبەك سىڭىرگەن قايراتكەرى, قاللەكي تەاترىنىڭ نەگىزىن قالاۋشىلاردىڭ بىرى تۇيمەحان اتىمتاەۆاعا بەرىلدى.
– تەاتر رەپەرتۋارى بيىل نەسىمەن دارالانادى؟
– مادەنيەت باسقارماسىنىڭ قولداۋىمەن دراماتۋرگ قانات جۇنىسوۆتىڭ «جاس قالا, جاس قالامگەر» اتتى شىعارماشىلىق اپتالىعى قىركۇيەك ايىنىڭ 22-28 كۇندەرى ارالىعىندا استانا قالاسىندا وتەدى. شىعارماشىلىق اپتالىقتا ءداستۇرلى اندەر, ەسترادالىق شىعارمالار, پوەزيا, سپەكتاكلدەر, اكتەرلىك شەبەرلىك جانە انشىلىك سىندى ونەر تۇرلەرى قامتىلىپ, ەلىمىز بويىنشا ءتورت مەملەكەتتىك تەاتر ۇجىمى مەن تانىمال انشىلەر ساحناعا شىعادى. ءبىر اۆتوردىڭ وسىنداي ۇلكەن اۋقىمدا سان قىرلى كەش وتكىزۋى بۇعان دەيىن بولماعان. سونىمەن بىرگە ق.ءجۇنىسوۆتىڭ «سويلە, سىرلى ساحنا» اتتى كىتابى مەن «ءان قاناتى» اتتى ديسكىسىنىڭ تۇساۋكەسەرىن جاساۋ جوسپاردا بار. اپتالىقتا س.سەيفۋللين, ا.بايتۇرسىنوۆ, ءا.قاشاۋباەۆ سىندى ۇلى تۇلعالار بەينەسى تەاتر ساحناسىنا شىعىپ, ءبىرجان سالدىڭ 180 جىلدىعى, س.سەيفۋلليننىڭ 120 جىلدىعى اتالىپ وتەدى.
– قاللەكي تەاترىنىڭ 24 جىلدىعىنا وراي اتقارىلىپ جاتقان شارالارعا توقتالساڭىز؟
– 15 قاراشادا بىز تۇڭعىش رەت تەاتر سىنشىسى اشىربەك سىعايدىڭ قازاق ۇلتتىق ونەر ۋنيۆەرسيتەتىنىڭ تەاترتانۋشى ستۋدەنتتەرىمەن بىرلەسىپ جازعان «قاللەكي تەاترى» اتتى ۇلكەن كولەمدى كىتاپتىڭ تۇساۋكەسەرىنە دايىندالىپ جاتىرمىز. ءۇش بولىمنەن تۇراتىن كىتاپتا تەاتر تاريحىمەن قاتار اشىربەك سىعايدىڭ وچەركتەرى مەن رەتسەنزيالارى كىرەدى. بۇعان قوسا, تەاترتانۋشى ستۋدەنتتەردىڭ ءتورت جىل بويى زەرتتەگەن قاللەكي تەاترىنىڭ اكتەرلەرى حاقىنداعى شىعارماشىلىق پورترەتتەرى توپتاستىرىلعان.
قۋات قيىقباي
