ەلوردادا «ادىلەت ورگاندارى كەڭەس بەرەدى» اتتى رەسپۋبليكالىق اكتسيا باستالدى. شارا بارىسىندا زاڭگەرلەر, سوت ورىنداۋشىلار, نوتاريۋستار جانە ادۆوكاتتار قالا تۇرعىندارىنا قۇقىقتىق تۇرعىدا كەڭەستەر بەرەدى.
كەشە قالا ىرگەسىندەگى كۇيگەنجار كەنتىندە جەرگىلىكتى تۇرعىندارمەن كەزدەسۋ وتكىزىلدى. الماتى اۋدانىنىڭ №1 حالىققا قىزمەت كورسەتۋ ورتالىعىندا اشىق ەسىك كۇنى ۇيىمداستىرىلدى. اتالمىش شارالار بارىسىندا كوپتەگەن ادامدار قۇقىقتىق تۇرعىدا وزدەرىن تولعاندىرعان ساۋالدارعا جاۋاپ الدى.
بۇگىن اكتسياعا قاتىسۋشى ماماندار ەتس-166/22 تۇزەتۋ مەكەمەسىنىڭ سوتتالعاندارىنا تەگىن قۇقىقتىق كەڭەس بەرەدى. سونىمەن قاتار, ساعات 15.00-دە استانا قالاسىنىڭ №6 كاسىپتىك-تەحنيكالىق كوللەدجىنىڭ ستۋدەنتتەرىمەن كەزدەسۋ وتەدى.
ال ەرتەڭ اكتسيانىڭ سوڭعى كۇنى ساعات 11.00-دەن 13.00-گە دەيىن «نۇر وتان» حالىقتىق دەموكراتيالىق پارتياسىنىڭ استانا قالالىق فيليالىنىڭ عيماراتىندا قالا تۇرعىندارىن قابىلداۋ جۇرگىزىلەدى. ادىلەت دەپارتامەنتىنىڭ عيماراتىندا جاس جۇبايلارعا ارنالعان اشىق ەسىك كۇنى ۇيىمداستىرىلادى. بۇل شارا ساعات 15.00-دە باستالادى.
