«شابىت» شىعارماشىلىق سارايىندا قازاقستاننىڭ حالىق ءارتىسى, كينو جانە تەاتر رەجيسسەرى, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى تالعات تەمەنوۆتىڭ «دارابوز» اتتى شىعارماشىلىق كەشى ءوتتى.
كەشتىڭ شىمىلدىعى رەجيسسەر جاڭابەك جەتىرۋوۆتىڭ ونەر يەسى جايلى تۇسىرىلگەن «دارابوز» دەرەكتى فيلمىمەن ءتۇرىلدى. بۇل تۋىندىنى تاماشالاعان كورەرمەندەر كينو جانە تەاتردىڭ بەلگىلى مايتالماندارىنىڭ تالعات تەمەنوۆكە بەرگەن جوعارعى باعالارىنا قانىقتى. ەكراننىڭ ارعى جاعىنان سويلەگەن رەسەيلىك اكتەر ارمەن دجيگارحانيان «ساف تازا ونەردى تۋدىرۋ ءۇشىن اۆتوردا ونەرگە دەگەن شەكسىز ماحاببات بولۋى كەرەك. سوندا عانا تۋدىرعان شىعارماڭ حالىقتىڭ جۇرەگىنە جەتەدى. تالعاتتا وسىنداي ماحاببات بار. سونداي-اق, ول ادامداردى سوڭىنان ەرتە الاتىن قاسيەتكە يە. مىقتىلىعى دا سوندا» دەسە, تاعى ءبىر رەسەيلىك مامان كارەن شاحنازاروۆ «تەمەنوۆتىڭ كينولارى ارقىلى ءبىز قازاقتاردىڭ جان دۇنيەسىن تۇسىنە باستادىق» دەدى.
مادەنيەت جانە سپورت ءمينيسترى ارىستانبەك مۇحامەديۇلى الپىس جاستىڭ اسقارىنا شىعىپ وتىرعان تالعات تەمەنوۆكە ەلباسىنىڭ قۇتتىقتاۋ حاتىن وقىپ بەردى. پارلامەنت ءماجىلىسىنىڭ دەپۋتاتى قۋانىش سۇلتانوۆ پارلامەنت ءماجىلىسى توراعاسىنىڭ ورىنباسارى داريعا نازارباەۆانىڭ قۇتتىقتاۋىن جەتكىزدى. «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتەن كەلگەن حات تا وقىلدى. قۋانىش سۇلتانوۆ ءوز سوزىندە «تالعات جاس, ءورىم كومسومول كەزىندە: «تەاتر جانە كينو رەجيسسەرى بولىپ, قازاق ونەرىندە ەشكىم جاساماعان ونەردى مەن جاسايمىن» دەپ, ونەرگە دۇرىلدەپ كەلگەن ەدى. سول ايتقانىن ورىندادى» دەپ, كەش يەسىنىڭ مەرەيىن كوتەرىپ تاستادى. اقىن, «دارىن» مەملەكەتتىك جاستار سىيلىعىنىڭ لاۋرەاتى مارالتاي رايىمبەكۇلى ايگىلى رەجيسسەرگە ارنالعان ولەڭىن وقىدى.
قۇرمانعازى اتىنداعى الماتى مەملەكەتتىك كونسەرۆاتورياسىن بىتىرگەن تالعات تەمەنوۆ شىعارماشىلىق جولىن تالدىقورعان وبلىستىق تەاترىنىڭ اكتەرى بولىپ باستادى. ودان كەيىن ماسكەۋدەگى ستسەناريستەر مەن رەجيسسەرلەردىڭ جوعارعى كۋرسىن ءبىتىرىپ, رەجيسسەرلىك ونەرگە دەن قويدى. ول تۇسىرگەن تۋىندىلار حالىقتىڭ سۇيىكتى فيلمدەرىنە اينالدى. ءتۇرلى كينوفەستيۆالدەردىڭ جۇلدەگەرى اتاندى. ماسەلەن, «تورو» اتتى تىرناقالدى تۋىندىسى كيەۆ قالاسىندا وتكەن «جاستىق-86» كينوفەستيۆالىندە «ەڭ ۇزدىك رەجيسسەر» جانە «ەڭ ۇزدىك ەر ادام بەينەسى» اتالىمدارىندا ارناۋلى جۇلدەلەردى جەڭىپ العان.
«ادامدار اراسىنداعى بولتىرىك» اتتى ءفيلمى ماينداعى فرانكفۋرت قالاسىندا باس جۇلدە, يتاليانىڭ دجيففوني قالاسىندا كۇمىس جۇلدە, پورتۋگاليانىڭ ليسسابون قالاسىندا ارنايى جۇلدەگە يە بولدى. 1986 جىلعى جەلتوقسان وقيعاسىنا ارنالعان «قىزعىش قۇس» ءفيلمى يتاليانىڭ تۋرين قالاسىنداعى فەستيۆالدە ارناۋلى جۇلدە الدى. «ماحاببات بەكەتى» بەرلين قالاسىندا, سينگاپۋر, فرانتسيا, فيليپپين مەملەكەتتەرىندە وتكەن كينوفەستيۆالدەرگە قاتىستى. كەشكە كەلگەن حالىق وسى فيلمدەردەن جانە كەيىننەن تۇسىرىلگەن «مەنىڭ كۇنالى پەرىشتەم», تالعات تەمەنوۆ قويۋشى رەجيسسەرى بولعان «كوشپەندىلەر» كوركەم فيلمدەرىنەن, سونداي-اق, ونىڭ ع.مۇسىرەپوۆ اتىنداعى بالالار جانە جاسوسپىرىمدەر تەاترىنىڭ ساحناسىندا قويىلعان «اي-قاراكوز», «كارمەنسيتا» سپەكتاكلدەرىنەن ۇزىندىلەردى تاماشالادى.
كەشتىڭ سوڭىندا ساحناعا شىعىپ سويلەگەن تالعات تەمەنوۆ جاڭا قىرىنان كورىنىپ, اقىندىق ونەرىن پاش ەتتى. «سۋداعى ءىز» تەلەحيكاياسى جاقىندا تەلەەكرانعا جول تارتاتىنىن ايتىپ, كورەرمەندەرگە دۋ قول شاپالاق سوقتىردى.
امانعالي قالجانوۆ
