استانا كۇنى مەن قر ۇلتتىق مۋزەيىنىڭ ءبىر جىلدىعىنا وراي ەلوردادا شاي ازىرلەۋ ونەرىنە ارنالعان تۇڭعىش حالىقارالىق «Chitra by Newby» كورمەسى وتەدى. بۇل جونىندە قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قر مادەنيەت جانە سپورت ءمينيسترى ارىستانبەك مۇحامەديۇلى مالىمدەدى.
«قازاقستانداعى ۇلتتىق مۋزەي الەمدىك ونەردىڭ ورتالىعىنا اينالدى. بۇعان دەيىن باسقا ەلدە ۇيىمداستىرىلماعان شايلار جيىنتىعىنىڭ كورمەسى تەك مۋزەي ءىسى ماماندارىنىڭ ەمەس, جالپى قوعام قىزىعۋشىلىعىن تۋدىرىپ وتىر» دەدى مينيستر.
«Chitra by Newby» كوللەكتسياسى – شاي تاريحىمەن بايلانىستى جالعىز جەكە انتيكۆارياتتار جيىنتىعى. ونىڭ قۇرامىنا ەۋروپا, ازيا مەن امەريكادا جاسالعان قولدانبالى ونەر تۋىندىلارىنىڭ 1500-دەن استام ۇلگىلەرى بار. كورمەگە كەلگەندەر قىتايدىڭ سۋن ديناستياسىنان باستالاتىن قۇندى جادىگەرلەرمەن تانىسىپ, شاي ءىشۋ مادەنيەتىندە قالىپتاسقان داستۇرلەر مەن كونە سۋسىننىڭ تاريحىن ءبىلىپ قايتادى.
تاڭدامالى جادىگەرلەردىڭ 100-گە جۋىق داناسى قويىلاتىن كورمە قر ۇلتتىق مۋزەيىندە 6 شىلدەدە اشىلىپ, ءۇش اي بويى جۇرەدى.
كۇنايىم ساكەن
