ەكونوميكا

تەڭگە قۇنى نەگە وزگەردى؟

شىلدە ايىنىڭ اياعىنا جاقىنداعاننان-اق تەڭگە باعامى كۇرت تومەندەي باستادى. شىلدە ايىنىڭ 26 كۇنى استانانىڭ كەيبىر ايىرباس پۋنكتتەرىندە ءبىر دوللاردىڭ قۇنى 360-364 تەڭگەگە جەتكەن بولاتىن. ال 27 كۇنى تەڭگەنىڭ دوللارعا شاققانداعى ورتاشا باعامى 354-359 تەڭگە شاماسىنا تۇراقتادى.

11794-6-chto_dast_kazahstanu_s_ru

– قازىرگى ۋاقىتتا ۇلتتىق بانك ەركىن وزگەرمەلى ايىرباستاۋ باعامى كەستەسىن قولدانۋدا. بۇل ايىرباستاۋ باعامىنىڭ بىرقاتار فاكتورلارعا قاراي, ءبىرىنشى كەزەكتە, مۇناي باعاسىنا جانە ساۋدا بويىنشا ارىپتەس ەلدەر ۆاليۋتالارىنىڭ باعامدارىنا قاراي كۇندەلىكتى وزگەرۋىنە مۇمكىندىك بەرەدى. بۇل رەتتە تەڭگەنىڭ باعامىنا نارىققا قاتىسۋشىلاردىڭ بولجامدارى, بيۋدجەت قاراجاتىنىڭ قوزعالىسى, سالىق تولەۋ كەزەڭدەرى جانە سوڭعى ايلارداعى دوللارسىزداندىرۋ ءۇردىسى سياقتى ىشكى فاكتورلار دا اسەر ەتەدى, – دەپ ءتۇسىندىردى ۇلتتىق بانكتىڭ مونەتارلىق وپەراتسيالار دەپارتامەنتى ديرەكتورىنىڭ ورىنباسارى ءادىل مۇحامەدجانوۆ.
ونىڭ ايتۋىنشا, اعىمداعى جىلدىڭ شىلدەسىندە مۇناي باعاسىنىڭ تومەندەۋ ءۇردىسى بايقالعان. بۇعان قوسا, مۇناي ونىمدەرى نارىعىنداعى ۇسىنىس كولەمى بۇ­رىنعىدان وسكەن ەكەن. مۇنايدى ءىرى مولشەردە تۇتىناتىن اقش-تا «قارا التىننىڭ» جەتكىلىكتى قورى تۋرالى دە­رەكتەردىڭ جاريالانۋى دا, سونداي-اق بۇل ەلدە بۇرعىلاۋ ۇڭعىمالارى سا­نى­­نىڭ كوبەيۋى دە تەڭگە باعامىنىڭ تۇراق­سىزدانۋىنا ءوز ىقپالىن تيگىزىپ جاتسا كەرەك.
– سوڭعى كەزدە ءرۋبلدىڭ سەرپىنى مۇناي باعاسىنىڭ وزگەرۋىنە سەزىمتالدىقتىڭ تومەندەگەنىن كورسەتىپ ەدى. بىراق جەمە-جەمگە كەلگەندە, ءرۋبلدىڭ اقش دوللارىنا قاتىستى قۇنى مۇناي باعاسىنىڭ قۇلدىراۋى اياسىندا ءبارىبىر تومەندەدى. ەلىمىزدە تەڭگەنىڭ دوللارعا شاققانداعى قۇنى 350 تەڭگەدەن اسىپ كەتۋى – ساۋدا بويىنشا ارىپتەس ەلدەردەگى ۆاليۋتا باعا­مىنىڭ وزگەرۋى دە اسەرىن تيگىزدى, – دەيدى ءا.مۇحامەدجانوۆ.
ال «حالىق بانكى» اق-نىڭ ەنشىلەس «Halyk Finance» كومپانياسى زەرتتەۋ دەپارتامەنتىنىڭ ديرەكتورى مۇرات تەمىر­­حانوۆ بولسا تەڭگەنىڭ بۇدان بىرنەشە كۇن بىرتىندەپ قۇنسىزدانا باستاعانىن, ول كەزدە مۇناي باعاسى ءالى تومەندەي قوي­ماعانىن العا تارتادى. ياعني, «ءبى­رىن­شى كەزەكتە مۇناي باعاسى تەڭگەنى قۇنسىزداندىردى» دەگەن پىكىرمەن مۇلدەم كەلىسپەيدى.
– بۇل ارادا ساناداعى قورقىنىش تا ۇلكەن ءرول وينايدى. قازىر ءبارى بىردەي بەلسەندى تۇردە دوللار ساتىپ الۋعا كوش­تى. سول سەبەپتەن نارىقتا دوللاردىڭ جەتىسپەۋشىلىگى بايقالادى. ونىڭ ۇستىنە نارىققا قاتىسۋشىلار «مۇناي باعاسى ءالى تومەندەيدى. سول كەزدە تەڭگە ودان سايىن قۇنسىزدانا تۇسەدى» دەگەن قورقىنىشقا بوي الدىرىپ وتىر. تۇسىنىكتى تىلمەن ايتقاندا, تەڭگەنىڭ تۇراقسىزدانۋىنا بۇل ارادا پسيحولوگيالىق فاكتور دا ۇلكەن اسەرىن تيگىزىپ وتىر. ارينە, مەن مۇناي باعاسى مۇلدەم اسەر ەتپەيدى دەپ ايتا المايمىن. «قارا التىننىڭ» اسەرى دە زور ەكەنى ءسوزسىز. بىراق ۆاليۋتا باعامىنا ودان بۇرىن ءوزىمىزدىڭ سانامىزداعى قورقىنىش كوپ اسەرىن تيگىزىپ تۇرعانىن دا مويىنداۋىمىز كەرەك, – دەيدى مۇرات تەمىرحانوۆ.
رەسمي مالىمەتتەرگە قاراعاندا, 16 شىلدە مەن 26 شىلدە ارالىعىندا مۇنايدىڭ ءبىر باررەلى 48,09 دوللاردان 44,78 دوللارعا دەيىن تومەندەگەن. ماماندار قازىرگى ۋاقىتتا مۇناي باعاسىنا قاتىستى ناقتى بولجام ايتا الماي وتىر. جاعداي وسىلاي جالعاسا بەرسە, بىزدەگى قورقىنىشقا بوي الدىرعان حالىق دەپوزيتتەرىندەگى سالىمدارىن تەڭگەدەن قايتادان دوللارعا ايىرباستاپ, تەڭگەنىڭ قۇنسىزدانۋىن ودان سايىن كۇشەيتىپ جىبەرۋى دە عاجاپ ەمەس. جۇرتتىڭ ءبارى جاپپاي دوللار ساتىپ الۋعا كوشكەن سوڭ, دوللار دەفيتسيتى وزىنەن-ءوزى تۋىندايدى. بۇل رەتتە جوعارىداعى ەكى ماماننىڭ پىكىرى دە شىندىققا جاناسىمدى ەكەنىن ەسكەرگەن دۇرىس-اۋ.

مەڭدوللا شامۇراتوۆ

تاعىدا

ۇقساس جاڭالىقتار

پىكىر ۇستەۋ

Back to top button