جاقىندا مەنىڭ ۋچاسكەمە قارايتىن 4 جاسار بالا ابايسىزدا تەرەزەدەن قۇلاپ, اۋىر حالدە اۋرۋحاناعا جەتكىزىلدى. ەكىنشى قاباتتان قۇلاعان بالدىرعاننىڭ ساۋ تامدىعى جوق. اسىرەسە, باسى مەن ءبۇيرەگى كۇل-تالقان بولعان. مىنە, ءتورت اي بويى اۋرۋحانا توسەگىندە تاڭىلىپ جاتىر. قۇلدىراڭداپ شاۋىپ جۇرگەن ساپ-ساۋ بالانىڭ اياق استىنان اۋرۋ بولىپ قالۋى بالا دارىگەرى مەنى دە بەي-جاي قالدىرمادى.
جالپى بالالاردىڭ قۇلاۋى كوپ جاعدايلاردا اتا-انانىڭ جاۋاپسىزدىعىنان دەپ بىلەمىن. سەبەبى, ءالى وڭ-سولىن تانىپ ۇلگەرمەگەن بالاعا اتا-انالار جاۋاپكەرشىلىكپەن قاراپ, اباي بولۋ كەرەك. كىشكەنتاي بالالارعا تەرەزە – قىزىقتى زات. ءار اتا-انا ونىڭ بالالارعا ويىنشىق ەمەستىگىن ۇعىندىرۋ كەرەك. ەكى جاسقا دەيىنگى بالانىڭ بويى تەرەزەگە جەتپەسە, ەكى-ءۇش جاستاعى بالانىڭ تەرەزەگە كوتەرىلىپ كوشەدە بولىپ جاتقان جاعدايدى قىزىقتاۋعا شاماسى كەلەدى. قازىرگى زامانعى تەرەزەلەردىڭ كوبى شىبىن-شىركەيدەن قورعايتىن تور پەردەلەرمەن جابدىقتالعان. بۇل شىبىن-شىركەيدەن قورعاعانىمەن, بالانى قۇلاپ كەتۋدەن ساقتاي المايدى. مۇنداي توركوزدەر بالالاردىڭ سالماعىن كوتەرمەي جىرتىلىپ, ايىرىلىپ كەتەدى. ەكى جىلدىڭ وزىندە تەك №2 بالالار اۋرۋحاناسىندا 1-14 جاس ارالىعىنداعى 57 بالا تەرەزەدەن قۇلاپ, تورتەۋى مەرت بولعان ەكەن. سوندىقتان ءاربىر ادام شىبىن-شىركەيدەن قورعايتىن تور پەردەنى قولدانباۋ جاعىن قاراستىرىپ, ءمۇمكىندىك بولسا, تەرەزەنىڭ جوعارى, بالانىڭ قولى جەتپەيتىن بولىگىنە شىنجىر ىلگەك ورناتۋ كەرەك. تەرەزەنىڭ تۇتقاسىن مۇلدە الىپ تاستاۋ نەمەسە كىلتپەن اشىلاتىن تۇتقا ورناتۋ, قاۋىپسىزدىك پەن سىرتقى كوركەمدىككە ارنالعان ارناۋلى قۇلىپ-قورشاۋ قولدانۋ سىندى ساقتىق شارالارى دا بالالارىڭىزدى وقىس جاعدايدان قۇتقاراتىنى انىق.
جالپى, كىشكەنتاي بالالار ءبىردەڭە بۇلدىرەردە تىپ-تىنىش بولىپ كەتەدى. بالانىڭ پسيحولوگياسى سونداي. سوندىقتان اتا-انالار بالالارىم شۋلاماي كەتتى دەپ جايباراقات وتىرماي, قانداي جاعدايدا بولسىن, ولاردىڭ قايدا نە ىستەپ جاتقانىن قالتقىسىز باقىلاپ وتىرعانى ءجون.
انار ميزان,
№1 قالالىق ەمحانانىڭ تەلىمدىك پەدياترلار بولىمشەسىنىڭ دارىگەرى