وقىرماننان ون سۇراق

تەرى تازالىقتى تالاپ ەتەدى

جانار كسانوۆا

جانار كسانوۆا, استانا قالاسى دەرماتولوگيا جانە جىنىس قاتىناسى اۋرۋلارىن الدىن الا ەمدەۋ ورتالىعى ديرەكتورىنىڭ ورىنباسارى

      

سالتانات:

– جولداسىم دەنەسىن قاسي بەرەدى. اسىرەسە, كەشكە قاراي قىشۋى كۇشەيىپ كەتەدى. كىمگە قارالۋ قاجەت جانە بۇل نەدەن بولۋى مۇمكىن؟
– ەگەر تەرىدە بورتپەلەر بولسا قىشۋىنىڭ سەبەپتەرى: اللەرگيا, زەڭنىڭ قابىنۋى جانە ت.ب. بولۋى مۇمكىن. بۇل ناقتى نە ەكەنىن انىقتاۋ ءۇشىن سىزگە دەرماتولوگ دارىگەرگە قارالۋ قاجەت. دارىگەرگە كەلگەندە وزىڭىزبەن بىرگە جەكە كۋالىگىڭىز مىندەتتى تۇردە بولۋى كەرەك. ال تەرىدە وزگەرىستەر بولماسا تەرى باۋىر بۇيرەك جانە ءوت شىعارۋ جولدارىنىڭ سىرقاتى, ەندوكريندى وزگەرىستەر, پسيحيكالىق بۇزىلىستار جانە جۇيكە جۇيەسى اۋرۋلارى سالدارىنان قىشۋى مۇمكىن. قىشىمانى ەمدەۋ ونىڭ سەبەپتەرىنە بايلانىستى بولاتىنىن ەستەن شىعارماڭىز. جولداسىڭىز ءبىزدىڭ ورتالىققا كەلىپ, دارىگەرلەرمەن كەڭەسىپ, تەكسەرۋدەن ءوتسىن.

ورال:

– ەكزەمانى حالىق ەمىمەن ەمدەۋ مۇمكىن بە؟
– وسىمدىكتەرمەن كوپتەگەن اۋرۋلاردى ەمدەۋگە بولادى. ەڭ باستىسى, اللەرگيا بولماۋى كەرەك. باسقا زاتتاردى ءار ادامعا جەكە تاڭداۋ قاجەت.

عالىم قوسىمجانۇلى:

– كەيىنگى كەزدە اياعىمنىڭ تىرناقتارىندا وزگەرىستەر بايقادىم. مۇنداي جاعداي مەنىڭ اكەمدە دە بولدى. تىرناقتارىم سارعايىپ, ۇگىلگىش, سىنعىش بولىپ كەتتى. نە ىستەيمىن, قالاي ەمدەۋگە بولادى؟
– ءسىزدىڭ سيپاتتاماڭىز بويىنشا , بارلىق كلينيكالىق بەلگىلەرى تابان ونيحوميكوزىنا ۇقسايدى. بىراق تىرناقتىڭ باسقا دا دەرماتوزدار ارقىلى زاقىمداناتىنىن ەسكەرۋ كەرەك, ونىڭ كلينيكاسىن ميكروسكوپيا ارقىلى زەرتتەۋلەر جۇرگىزىپ, قاجەت بولعان جاعدايدا باكتەريولوگيالىق سەبۋدى وتكىزۋ ءۇشىن سىزگە دەرماتولوگ دارىگەرگە قارالىڭىز دەپ كەڭەس بەرەمىن. ەگەر سىزدە ونيحوميكوز ناقتىلانسا, ءبىز مىندەتتى تۇردە ۇسىنىس جاساپ, اياق كيىمىڭىز بەن شۇلىعىڭىزدى قالاي وندەۋ كەرەكتىگىن تۇسىندىرەمىز. جالپى, تازعا قارسى تەراپيانى جانە جەرگىلىكتى سىرتقى تەراپيانى جازىپ بەرەمىز. اياق جانە تىرناقتاعى ميكوزدى مىندەتتى تۇردە ەمدەۋ كەرەك. سەبەبى, ول ءۇي ىشىندەگىلەرگە جۇعۋى مۇمكىن. جالپى, تەرى اۋرۋلارى تازالىقتى تالاپ ەتەدى.

دارحان:

– جاسىم 29-دا. تۇركياعا بارىپ, دەمالىپ قايتقىم كەلەدى. تۇزدى سۋ تەرىنى قۇرعاتپاۋ ءۇشىن جانە ءارتۇرلى تەرىلىك اۋرۋلارعا ۇشىراماۋ ءۇشىن كۇنگە قالاي كۇيگەن دۇرىس؟
– كۇننىڭ وتكىر ساۋلەلەرىنە كۇيمەۋ ءۇشىن تاڭەرتەڭ ساعات 10-11 جانە كەشكى ساعات 16:00-دەن كەيىن قىزدىرىنعان ابزال. كۇننىڭ استىندا ەكى ساعاتتان ارتىق جاتۋعا بولمايتىنىن ەسكەرگەن ءجون. مىندەتتى تۇردە كۇننىڭ ۋلتراكۇلگىن ساۋلەسىنەن قورعايتىن كرەم قولدانۋ قاجەت. تەرى اۋرۋلارىنىڭ الدىن الۋ ءۇشىن ەرەكشە ءمان بەرەتىن جايت – بەت كۇتىمى, تەرىنى تازا ۇستاۋ, جەكە باس گيگيەناسىن ساقتاۋ. سونىمەن قاتار, مۇمكىندىگىڭىز بويىنشا تەرى جاراقاتتانۋىنىڭ الدىن الۋ, جارانى جانە تەرى سىدىرىلعان جەردى انتيسەپتيكتەرمەن دۇرىس وڭدەۋ قاجەت.

بولاتبەك:

– سوزىلمالى ەكزەمامەن اۋرۋحاناعا جاتۋ ءۇشىن نە ىستەۋىم كەرەك؟
– ستاتسيونارعا جاتقىزۋ ءۇشىن اۋرۋ كورسەتكىشتەرىنە قارايمىز. ياعني, جەدەل نەمەسە جەدەلدەۋ, سوزىلمالى دەرماتوزداردىڭ اسقىنۋىنا, مەرەزبەن اۋىراتىن جۇكتى ايەلدەرگە, بالالارداعى جۇقپالى تەرى دەرماتوزىنا جانە ت.ب. بايلانىستى. ول ءۇشىن ءسىز دارىگەر جولداماسىمەن ءبىزدىڭ ورتالىققا كەلسەڭىز, دياگنوز قويىلعان سوڭ گوسپيتاليزاتسياعا جولداما بەرىلەدى.

التىناي:

– ون التى جىلدان بەرى پسوريازبەن اۋىرامىن. جاقىندا بوسانعاننان كەيىن ول, ءتىپتى, اسقىنىپ كەتتى, ءسابيىمدى كەۋدە سۇتىمەن ەمىزەمىن. «ەنبرەل» پرەپاراتى تۋرالى ەستىگەنمىن, سول تۋرالى تولىعىراق بىلگىم كەلەدى. ول راسىمەن پسوريازعا كومەكتەسەدى مە؟ قازاقستاندا بار ما؟
– «ەنبرەل» – بيولوگيالىق پرەپارات. ول اۋرۋدىڭ اسقىنعان جانە كەڭ تارالعان فورمالارىندا دارىگەرمەن تاعايىندالادى. بۇل پرەپارات قازاقستاندا تىركەلمەگەن. دەگەنمەن, بىزدە وسى توپتاعى بيولوگيالىق پرەپاراتتار – «ۋستەكينۋماب» جانە «ينفليكسيماب» تىركەلگەن. سوندىقتان, تاعى دا قايتالاپ ايتامىن: بۇل پرەپارات جالپى مەديتسينالىق تەراپيا اسەرى بولماعان جاعدايدا, تەك پسوريازدىڭ اۋىر كەزىندە عانا قولدانىلادى.

ءبيبىجان مۇحامەديارقىزى:

– ءبىر جارىم جىل بۇرىن مەنىڭ ەكى قولىمدا, يىق جاعىمدا اق داقتار پايدا بولدى. انىق بىلىنبەيدى جانە بىركەلكى ەمەس. قىشىنۋ, گيپەرەميا جانە ديسكومفورت جوق, تەك كوسمەتيكالىق كەمشىندىك بايقالادى. كەيىنگى كەزدە داقتار ۇلعايىپ كەتتى. اسىرەسە, ارقا جاعىمدا مويىننان ءسال تومەن جانە شىنتاق بولىگىندە كوپ. اۋىرسىنۋ سەزىمدەرى سەزىلمەيدى. سوندا بۇل نە بولۋى مۇمكىن جانە قانداي دارىگەرگە قارالۋىم كەرەك؟
– ءبيبىجان, دەرماتولوگتىڭ كەڭەسىنە جۇگىنگەنىڭىز ءجون. دارىگەر تەكسەرگەننەن كەيىن مۇمكىن ونىڭ سەبەپتەرىن ايتا جاتار. ءسىزدىڭ سيپاتتاۋىڭىز بويىنشا بۇل كەبەك ءتارىزدى تەمىرەتكى بولۋى دا مۇمكىن. ناقتى انىقتاۋ ءۇشىن ءبىزدىڭ ورتالىققا كەلىپ, تەكسەرىلىڭىز.

ءلاززات قاناتقىزى:

– ەرنىمە گەرپەس ءجيى شىعادى, كەيدە بەتىمدە پايدا بولادى. ايتىڭىزشى, وسى ۇشىق دەگەن نە جانە ونى قالاي ەمدەۋ كەرەك؟
– ۇشىق – تەرى جانە شىرىشتى قابىقتىڭ زاقىمدالۋىنان پايدا بولاتىن ۆيرۋس­تى اۋرۋ. سىزگە دەرماتولوگ دارىگەرگە قارالۋ كەرەك. ەم ۆيرۋسقا قارسى پرەپاراتتاردى سىرتتاي جانە ىشكە قولدانۋ ارقىلى جۇرەدى. رەتسيديۆتى ۇشىق, ياعني, ءجيى قايتالانۋ كەزىندە ۆيرۋسقا قارسى ەم كۋرسى قابىلدانادى. جانە ينفەكتسيانىڭ جۇقپالىلىعىنا بايلانىستى ءسىزدىڭ جىنىستىق سەرىكتەسىڭىز دە بىرگە ەمدەلۋى قاجەت. پرەپاراتتى تاڭداۋ ءۇشىن دەرماتولوگ دارىگەرگە قارالىڭىز.

قانشايىم ماناپوۆا:

– جاقىندا ءىرىڭدى انگينا دياگنوزىمەن اۋرۋحانادا جاتتىم. ميكرواناليزگە قان تاپسىرعان كەزدە وڭ ناتيجە بايقالىپ, كەزدەيسوق ءبىلدىم: مەرەز اۋرۋىنا شالدىعىپپىن. سىزدەردە ەمدەلۋ مۇمكىن بە؟
– الدىمەن ءبىزدىڭ ورتالىعىمىزعا كەلىپ, تىركەۋ ءبولىمى ارقىلى №204 نەمەسە 206-كابينەتتەرگە جازىلۋىڭىزعا بولادى. دارىگەرگە قارالۋ ءۇشىن وزىڭىزبەن بىرگە جەكە كۋالىگىڭىزدى مىندەتتى تۇردە الىپ كەلىڭىز. دياگنوزدى ناقتىلاۋ ءۇشىن تولىق تەكسەرىلۋدەن وتەسىز. ەگەر دياگنوز ناقتىلانسا, ءبىزدىڭ ورتالىقتا سىزگە ارنايى تولىققاندى ەم جۇرگىزىلەدى.

ساندۋعاش:

– تىرناقتارىم تەز سىنعىش, جۇمساق, سوندىقتان دا قىسقا. قانداي جولمەن قاتايتۋعا جانە ساۋىقتىرۋعا بولادى؟ ال, ولاردى ءوسىرۋ ءۇشىن قانداي دارىلىك پرەپاراتتاردى قولدانعانىم ءجون؟
– تەرىڭىزدى قاتايتۋ ءۇشىن پوليۆيتاميندەر, ميكروەلەمەنتتەر, مينەرالدى توپتاما قاجەت. ءسىزدى ءبىزدىڭ ورتالىققا تىكەلەي كونسۋلتاتسياعا شاقىرامىز. كەلىڭىز, كومەكتەسەمىز.

قاناعات سەرىكقىزى:

– بالامنىڭ تەرىسى اللەرگياعا سەزىمتال, تسيترۋستىك جەمىستەر نەمەسە ءتاتتى جەسە, دەنەسىندە بورتپەلەر پايدا بولادى. اللەرگولوگ دارىگەردىڭ باقىلاۋىندامىز. «Avene Trixera» دەگەن پرەپاراتتى جازىپ بەردى. ول گورمونالدى ءدارى مە؟
– ءيا, ءبىز دە, اللەرگولوگتار دا قازىرگى كەزدە وسىنداي دارىلىك زاتتاردى ءجيى قولدانامىز. ولاردى ەمولەنتتەر دەپ تە اتايدى. ولار – اتوپيالىق جانە قۇرعاق تەرىنى كۇتۋ بويىنشا ەمدىك كوسمەتيكا, دارىگە جاتپايدى, قۇرامىندا گورموندار جوق. گيگيەنا زاتتارىنىڭ قاتارىنا جاتادى جانە تەرىنى بەلسەندى تۇردە ىلعالداندىرادى. مۇنداي دارىلىك زاتتاردىڭ ساتىلىمداعى ءتۇرى كوپ, ءسىز بالاڭىزعا ونىڭ ەمۋلسيا, كرەم, لوسون ءتۇرىن تاڭداي الاسىز.

الىبەك تۇرسىنبايۇلى:

– دەرماتولوگيا ورتالىعىندا پسوريازدان ەمدەلىپ جاتىرمىن. سوزىلمالى ناۋقاسىما سايكەس, دۇرىس ەم قابىلداۋىما كومەكتەسىپ قانا قويماي, شىن ىقىلاستارىمەن قاراپ جۇرگەن دارىگەرلەرگە, مەدبيكەلەرگە, سونداي-اق وسى ورتالىقتىڭ باسشىسىنا ايتار العىسىم شەكسىز. بىلىكتى مامانداردىڭ بىلگىرلىگىنىڭ ارقاسىندا اۋرۋىمنان ايىعىپ كەلەمىن.
– راحمەت, الىبەك اعا! ناقتى سۇراعىڭىز بار ما؟
– جوق, قالقام, تەك العىستان باسقا ايتارىم جوق. مىنا رامازان ايىندا اللا تىلەكتەرىڭدى بەرسىن! ەڭبەكتەرىڭنىڭ جەمىسىن كورىپ, كومەك سۇراپ كەلگەن جانداردىڭ العىسىنا بولەنە بەرىڭدەر!

بەرىك:

– جەلكەم قاتتى قيشيدى جانە قايىزعاق ءتارىزدى اق قابىرشاق پايدا بولدى. جالپى باسىمدا قايىزعاق جوق. سۋسابىن ءتۇرىن, شاشقا ارنالعان زاتتاردى اۋىستىرىپ كوردىم, ناتيجە جوق, كەرىسىنشە الگى قابىرشاقتار ۇلعايۋدا. سىزدەردە ەمدەلۋ ءۇشىن قانداي اناليزدەر تاپسىرۋىم كەرەك؟
– سىزگە ەڭ الدىمەن دەرماتولوگ دارىگەرىنە قارالۋ قاجەت. ول ءسىزدى كورسەتكىشتەرىڭىزگە بايلانىس­تى زەڭدەرگە قاتىستى جاعىندى, باكتەريولوگيالىق زەرتتەۋ, RW سياقتى تەكسەرىلۋلەرگە جىبەرەدى. بۇل اناليزدەر دەرماتولوگيا ورتالىعىندا جۇرگىزىلەدى. تەكسەرۋدەن ءوتۋ ءۇشىن جەكە كۋالىگىڭىزبەن ءبىزدىڭ ورتالىققا كەلىپ, دەرماتولوگ دارىگەرگە قارالۋىڭىز كەرەك.

تاعىدا

ۇقساس جاڭالىقتار

3 پىكىرلەر

  1. سالەميتسيزبە! باسىما جارا شىككالى 10جىل بولدى. كالالىك تەري اۋارۋلار ەمحاناسىنا, جەكەمەنشيك كلينيكالارگا كارالدىم ەش انتيجە جوك. سونگى كارالگان دوستارمەد كلينيكاسى فولۋليت دەپ دياگنوزبەن ەمدەدي, بيراك بير ايدان كەين كايتا شىگىپ كەتتي. كايدا كارالىپ ەمدەلۋگە بولادى؟

  2. سالەمەتسىز بە؟مەنىڭ قازىر دەنەمدەگى ەكى ءبۇيىرى ءنىڭ ءۇستى قىشىتادى مايدا بورتپە بولىپ تۇرادى كەيدە قولتىق استى كوكىرەك جانىنا دەيىن كەلەدى,بۇعان نە سەبەپ؟بۇنداي جاعدايمەن العاش رەت اياعىم اۋىرلاعاندا باستالدى,قازىر ءۇش بالام بار؟باستالعاندا دەرماتولوگقا تەكسەرتتىم تەرى بويىنشا ەش پروبلەما جوق دەدى,بىراق بۇعان ءبىر سەبەپ بولۋ كەرەكقوي,قىشىعاندا قاناتىپ جەرەم ..

پىكىر ۇستەۋ

Back to top button