ءبىلىم سىناعىنىڭ استانا قالاسىنا قاتىستى قورىتىندىسى شىعارىلدى.
ماماندار ناتيجە كوڭىل كونشىتەرلىك دەپ وتىر. دەسە دە, باس قالاداعى بيىلعى ۇبت-نىڭ ۋ-شۋى ءالى باسىلا قويعان جوق.
ەستەرىڭىزدە بولسا, تەستىلەۋدىڭ العاشقى كۇنى «وقۋلىقتا جوق وعاش سۇراقتار كەزدەستى» دەپ, سىناقتى سىناپ شىققاندار دا, «نامىسىمدى تاپتادى», «شپارگالكا» ىزدەپ, ءىش كيىمىمە قول سالدى» دەپ, جىلاپ شىققاندار بولدى. ءبىر ايتا كەتەرى, اتالعان دەرەكتەردىڭ ءبارى دالەلدەنىپتى. سىناقتى قورىتىندىلاۋ جيىنىندا مينيسترلىك وكىلدەرى كەلەڭسىز جايتقا كىنالىلەردىڭ جازالانعانىن ايتتى.
ءىستىڭ اقىرى بىرەۋلەردىڭ سوگىس الۋىمەن, ەندى بىرەۋلەردىڭ جۇمىستان قۋىلۋىمەن اياقتالدى.
تەستىلەۋگە جاۋاپتىلاردىڭ بۇلايشا شەكتەن تىس «جاۋاپتىلىق تانىتۋىنا» سەبەپ تە جوق ەمەس.
بۇگىندە ستۋدەنت اتانعانداردىڭ اراسىندا ۇبت كەزىندە «شپارگالكانى» اسقان شەبەرلىكپەن قولدانعانىن ۇيالماي «جىر» ەتىپ جۇرگەندەرى جەتەدى.
بىلتىر عانا قىزىلوردا وبلىسى جاڭاقورعان اۋدانىندا وسى «شپارگالكانىڭ» ارقاسىندا تۇلەكتەرى تۇگەلدەي جۇزدەن كەم ەمەس بالل جيناعانى ەستە.
مىنە, وسى جاعدايلار مينيسترلىككە دە, جەرگىلىكتى ءبىلىم جۇيەسى باسشىلارىنا دا ۇلكەن سىن بولسا كەرەك.
امال قانشا, قالتاسىنداعى قاعازىنا ەمەس, باسىنداعى بىلىمىنە سەنسىن دەگەننەن وزگە ويى جوق «تەكسەرۋشىلەر» اياق استىنان وسىلايشا كىنالىنىڭ كەبىن كيىپ قالا بەردى.
دەرەككوزدەرىنە سۇيەنسەك, استانا بويىنشا ۇبت-نى 3549 وقۋشى, ءداستۇرلى ەمتيحاندى 497 تۇلەك تاپسىرعان.
سىرقاتتانۋىنا بايلانىستى,3 وقۋشى تەستىلەۋگە كەلە الماپتى.ولار شىلدە ايىندا بيىل وقۋعا ءتۇسۋدى جوسپارلاپ وتىرعان بۇرناعى جىلدارداعى تۇلەكتەرمەن بىرگە كەشەندى تەستىلەۋگە قاتىسا الادى.
حالىقارالىق وليمپيادالار مەن عىلىمي جارىستاردىڭ 125 جەڭىمپازى مەن جۇلدەگەرى ءبىلىم جانە عىلىم مينيسترلىگىنىڭ بۇيرىعىمەن ۇبت-دان بوساتىلىپتى.
استانا قالاسى بويىنشا ورتاشا بالل – 78,46-نى قۇراپ وتىر.
ەڭ تومەنگى مەجەنى 752 وقۋشى, ياعني تۇلەكتەردىڭ 21,19 پايىزى ەڭسەرە الماعان.
ازىرگە ەڭ ۇزدىك 10 مەكتەپتىڭ الدىڭعى شەبىندە ورتاشا بالى 108,4 دەگەن كورسەتكىشپەن دارىندى بالالارعا ارنالعان «زەردە» مەكتەبى تۇر. ودان كەيىن قىزدارعا ارنالعان قازاق-تۇرىك ليتسەيى – 102,68 بالل, ۇلدارعا ارنالعان قازاق-تۇرىك ليتسەيى – 102,4 بالدى باعىندىرعان. №6 گيمنازيا – 94,69 بالل, «كوگىلدىر پارۋس» – 94,33 بالل, «استانالىق» ليتسەيى – 93,5 بالل, «نۇر وردا» قازاق-تۇرىك ليتسەيى – 92,02 بالل, №38 مەكتەپ-ليتسەيى – 91,93 بالل, №50 مەكتەپ-ليتسەيى – 91,24 بالل جانە №3 مەكتەپ-ليتسەيى – 92,02 بالل جيناعان.
استاناداعى ەڭ جوعارعى كورسەتكىش – 125 بالعا قىز بالالارعا ارنالعان قازاق-تۇرىك ليتسەيىنىڭ تۇلەگى اسەل قىسىقوۆانىڭ قول جەتكىزگەنىن بۇعان دەيىن جازعانبىز.
«التىن بەلگىدەن» ۇمىتكەر 178 تۇلەكتىڭ ازىرگە 68-ءى ءوز بىلىمدەرىن تولىق راستاي العان. استانا قالاسى ءبىلىم باسقارماسىنىڭ ماماندارىنىڭ ايتۋىنشا تەستىلەۋدىڭ جالپى قورىتىندى ناتيجەلەرى مەن ەلوردا مەكتەپتەرىنىڭ ورتاشا بالدارى رەسپۋبليكالىق اپەللياتسيالىق كوميسسيا جۇمىسىن اياقتاعان سوڭ بەلگىلى بولادى.
مادينا راحىمباەۆا,
ءا.مارعۇلان اتىنداعى №40 ورتا مەكتەپتىڭ تۇلەگى, «التىن بەلگى» يەگەرى:
تەست تاپسىرعانعا دەيىن 125 بالل الامىن دەگەن ءۇمىتىم بولدى. بىراق بيىلعى تەست سۇراقتارىنا ءبىراز كۇردەلى سۇراقتار ەنگىزىلگەندىكتەن, بەس ءپان بويىنشا 119 بالل جينادىم. الداعى ۋاقىتتا فيزيكا سالاسىنا قاتىستى ماماندىقتى تاڭداعالى وتىرمىن.
ماعان بەرىلگەن تاپسىرمانىڭ اراسىندا مەكتەپ باعدارلاماسىنان تىس سۇراقتار بولعان جوق. كەيبىرەۋلەر ايتىپ جۇرگەن «ابىلاي حاننىڭ اتىنىڭ قانشا ءتىسى بار؟», «شوقان ءۋاليحانوۆتىڭ جەيدەسىنىڭ تۇيمەسى نەشەۋ؟» دەيتىن وقۋلىقتا جوق ساۋالدار مەندە دە, مەن تانيتىن تۇلەكتەردە دە كەزدەسكەن جوق.
سول كۇنى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ عيماراتىندا مەنىمەن بىرگە تەست تاپسىرعان وقۋشىلار مەن ولاردىڭ اتا-انالارى تاراپىنان ەسىكتە تۇرعان پوليتسيا قىزمەتكەرلەرىنە قاتىستى شاعىمدار وتە كوپ ايتىلدى. بىراق, جەكە ءوز باسىم مۇنداي جاعدايمەن بەتپە-بەت كەلگەن جوقپىن. جالپى, مەنىڭ ويىمشا, بىرىڭعاي تەستىلەۋ بارىسىندا تەكسەرۋ جۇمىستارى قاجەت. بۇل وقۋشىنىڭ كومەكشى ماتەريالدارعا ەمەس, وزىنە سەنىپ, ءبىلىمىن دالەلدەيتىن ءسات. الايدا, بالالاردىڭ پسيحولوگياسىنا كەرى اسەرىن تيگىزەتىن شەكتەن تىس تەكسەرىستەردىڭ قاجەتى جوق.
شىنار دوسان
