ەلباسىنىڭ جارلىعىمەن قىركۇيەك ايىنىڭ ءۇشىنشى جەكسەنبىسى قازاقستان حالقىنىڭ تىلدەرى كۇنى بولىپ بەلگىلەندى. وسىعان وراي استانا قالاسىندا بيىل تىلدەر فەستيۆالى ءXVى رەت شىمىلدىق اشتى.
اتالعان فەستيۆال قالادا 5 قىركۇيەك كۇنى سالتاناتتى تۇردە اشىلىپ, بەلگىلەنگەن باعدارلامالار اياسىندا «ۇزدىك جارناما», «ءتىل – حالىق جانىن تانۋدىڭ كىلتى», «مەملەكەتتىك ءتىل – مەملەكەتتىك قىزمەتتە» بايقاۋلارى, جاس اقىندار ءمۇشايراسى, «وتان – وتباسىنان باستالادى» اتتى مەرەكەلىك ءىس-شارا, «كەمەل ءتىلدىڭ كەلەشەگى» اكتسياسى وتكىزىلدى. سونىمەن قاتار, قالاداعى مەملەكەتتىك, قۇرىلىمدىق مەكەمەلەردە, بالاباقشا, مەكتەپ, مادەنيەت, دەنساۋلىق, كولىك سالاسى مەكەمەلەرىندە كوپتەگەن ءىس-شارالار ۇيىمداستىرىلۋدا.
قازاق تىلى ءوزىنىڭ مەملەكەتتىك مارتەبەسىن 1989 جىلى 22 قىركۇيەكتە قازاقستان رەسپۋبليكاسىنىڭ «ءتىل تۋرالى» زاڭى قابىلدانعاننان كەيىن العان ەدى. وسى شيرەك عاسىرلىق مەرەيتويعا وراي 22 قىركۇيەكتە فەستيۆالدىڭ گالا-كونتسەرتى وتەدى. اتالعان مەرەكەلىك ءىس-شارادا ءتىل تۋرالى تولعامدار ايتىلىپ, ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ارتىستەرىنىڭ قاتىسۋىمەن قويىلىمدار كورسەتىلەدى. ەلىمىزگە تانىمال – مارجان اراپباەۆا, دوسىمجان تاڭاتاروۆ, يبراگيم ەسكەندىر سياقتى تاعى دا باسقا انشىلەر وزدەرىنىڭ اسەم اندەرىن ۇسىنادى.
دۋماندى كەشكە زيالى قاۋىم وكىلدەرى, قر پارلامەنت ءماجىلىسىنىڭ جانە استانا قالالىق ماسليحاتىنىڭ دەپۋتاتتارى, ارداگەرلەر مەن مەملەكەتتىك مەكەمەلەر, ۇلتتىق-مادەني ورتالىقتار, مەملەكەتتىك ءتىل قوزعالىسى, «قازاق تىلى» قوعامى, ۇكىمەتتىك ۇيىمدار باسشىلارى, جاستار قاۋىمى شاقىرىلىپ وتىر.
ساعي ورال
