باستى اقپاراترۋحانيات

ءتىلدى وقىتۋ ءتورت دەڭگەيگە بولىنەدى

ەلوردا اۋماعىندا مەملەكەتتىك ءتىل مەن باسقا دا تىلدەردى دامىتۋ, ارحيۆ قورىنىڭ قۇجاتتارىن ساقتاۋ, تولىقتىرۋ, ەسەپكە الۋ, قورعاۋ مەن پايدالانۋ, مەملەكەتتىك رامىزدەردى قولدانۋ مەن ناسيحاتتاۋدى قامتاماسىز ەتۋ – وسىنىڭ ءبارى استانا قالاسى تىلدەردى دامىتۋ جانە ارحيۆ ءىسى باسقارماسىنىڭ مىندەتىنە جاتادى. بۇل جۇمىستاردىڭ بارىسى جايىندا اتالمىش باسقارمانىڭ باسشىسى ساكەن ەسىركەپپەن اڭگىمەلەستىك.

– وزگە ۇلتتاردى ايتپاعاندا, قازاق ءتىلىن بىلمەيتىن قانداستارىمىزدىڭ كوپ ەكەنى جاسىرىن ەمەس. باسقارما تاراپىنان قازاق ءتىلىن وقىتۋ قولعا الىنعان با؟

– باسقارما جانىنداعى «رۋحانيات» كوممۋنالدىق مەملەكەتتىك مەكەمەسى جىل سايىن استانا قالاسىندا ەرەسەك تۇرعىندارعا ارنالعان قازاق ءتىلى كۋرسىن وتكىزەدى. كۋرستىڭ ۇزاقتىعى 72 ساعاتتى قۇرايدى. بەكىتىلگەن كەستەگە سايكەس ساباقتار اپتاسىنا 2-3 رەت وتەدى. توپتار دەڭگەيلەرى بويىنشا بولىنەدى: ا1 – باستاۋشى, ا2 – بازالىق, ۆ1 – ورتاشا, ۆ2 – ورتادان جوعارى. تىڭداۋشىنىڭ دەڭگەيى قابىلداۋ تەستىنىڭ ناتيجەلەرى بويىنشا انىقتالدى. كۋرس بارىسىندا وقىتۋشىلار تىڭداۋشىلاردى ايتىلىم جانە ەملە نورمالارىنا, قازاق تىلىندە كۇندەلىكتى قارىم-قاتىناس جاساۋعا, مەملەكەتتىك تىلدە ءىس قاعازدارىن جۇرگىزۋگە, تەرميندەردى رەسمي حاتتاردا قولدانۋعا ۇيرەتۋدە.

2019 جىلدان باستاپ, ياعني سوڭعى ءۇش جىلدا قازاق ءتىلى كۋرسىن 5803 تىڭداۋشى اياقتادى. بيىل بۇل كۋرستى 1500 ادام وقىدى. سونىمەن قاتار مەملەكەتتىك قىزمەتكەرلەر ءۇشىن اعىلشىن ءتىلىن تەگىن وقىتۋ كۋرسى قاراستىرىلعان. جىل سايىن اعىلشىن ءتىلىن وقىتۋ كۋرسىنا 110 تىڭداۋشى قاتىسادى.

«قازتەست» جۇيەسى ارقىلى مەملەكەتتىك قىزمەتكەرلەر مەن بيۋدجەتتىك مەكەمە قىزمەتكەرلەرىنىڭ مەملەكەتتىك ءتىلدى مەڭگەرۋ دەڭگەيىن انىقتايمىز. 2019 جىلى ءتيىستى تەستتەن 1123 قىزمەتكەر ءوتتى. پاندەمياعا بايلانىستى كەلەسى جىلدارى ولاردىڭ سانى ازايدى. ماسەلەن, 2020 جىلى 190 قىزمەتكەر وتسە, 2021 جىلى 93 قىزمەتكەر ءوتتى.

قازىر ەلوردامىزداعى سىرتقى جانە ىشكى كورنەكى اقپاراتتاردى زاڭ تالاپتارىنا سايكەس­تەندىرۋ جۇمىستارىن جۇيەلى تۇردە جۇرگىزۋ ءۇشىن ءتيىستى شارالاردى اتقارۋ ماقساتىندا اۋقىمدى جوبالار دا قولعا الىنىپ جاتىر. اتاپ ايتساق, «قازاق ءتىلى» قوعامىمەن بىرگە «كورنەكى» جوباسى جۇزەگە اسىرىلۋدا. وسى جوبا اياسىندا ورىن العان زاڭ بۇزۋشىلىقتاردى قوعام وكىلدەرىمەن بىرلەسە وتىرىپ جويۋ جوسپارلانعان

– كەيىنگى جىلدارى ەلوردادا ونوماستيكا جۇمىسى جاقسى جۇرگىزىلىپ جاتىر. ماسەلەن, بىلتىر تاۋەلسىزدىكتىڭ 30 جىلدىعىنا جانە تۇلعالاردىڭ مەرەيتويلارىنا بايلانىستى كوپتەگەن جوبالىق كوشە مەن نىساندارعا اتاۋلار بەرىلدى. بۇل جۇمىس بيىل دا باسەڭسىمەدى. تولىعىراق ءوزىڭىزدىڭ اۋزىڭىزدان ەستىسەك.

– استانا قالاسىنداعى قۇرامداس بولىكتەردىڭ جالپى سانى – 1127. سونىڭ ىشىندە داڭعىل – 17, كوشە – 1110, تاسجول – 4. 2021 جىلى قالامىزدىڭ ونوماستيكا كوميسسياسى 4 وتىرىس وتكىزدى. بىلتىر قالا اكىمدىگىنىڭ قاۋ­لىسى جانە قالالىق ءماسليحاتتىڭ شەشىمىمەن جالپى 51 قۇرامداس بولىككە اتاۋلار بەرىلىپ, قايتا اتالدى. قالا كوشەلەرىنە قازاقستاننىڭ بەلگىلى قايراتكەرلەرى جۇبان مولداعاليەۆ, روزا باعلانوۆا, حيۋاز دوسپانوۆا, قاليجان بەكحوجين, ۇزاقباي قارامانوۆ, قارشىعا احمەدياروۆ, كۇلتەگىن, تاعى باسقا ەسىمدەر جانە ىرعايلى, ءشيلىساي, تۇزدىكول, تەكەلى, وزگە دە جەر-سۋ اتاۋلارى بەرىلدى. سونىمەن №35 مەكتەپ-ليتسەيىنە ءنازىر تورەقۇلوۆتىڭ, №51 مەكتەپ-گيمنازياسىنا مۇستافا شوقايدىڭ, №53 مەكتەپ-ليتسەيىنە باۋىرجان مومىشۇلىنىڭ, №54 مەكتەپ-ليتسەيىنە اقسەلەۋ سەيدىمبەكتىڭ, №61 ورتا مەكتەبىنە قانىش ساتباەۆتىڭ, №67 گيمنازياسىنا ءىلياس ەسەنبەرليننىڭ, №74 مەكتەپ-گيمنازياسىنا مۇقاعالي ماقاتاەۆتىڭ, №78 مەكتەپ-گيمنازياعا سماعۇل سادۋاقاسۇلىنىڭ, №86 مەكتەپ-گيمنازياسىنا مۇحتار اۋەزوۆتىڭ, №90 گيمنازياسىنا قايىم مۇحامەدحانوۆتىڭ, مەملەكەتتىك اكادەميالىق فيلارمونياعا ەركەعالي راحماديەۆتىڭ ەسىمدەرى بەرىلىپ, «Nomad City Hall» تەاترى «ءازىربايجان مامبەتوۆ اتىنداعى مەملەكەتتىك دراما جانە كومەديا تەاترى» دەپ قايتا اتالدى.

2022 جىلى دا استانا قالاسىنىڭ ونوماستيكا كوميسسياسىنىڭ 4 وتىرىس وتكىزدى. استانا قالاسى اكىمدىگىنىڭ قاۋلىسى جانە استانا قالاسى ءماسليحاتىنىڭ شەشىمىمەن جالپى 41 قۇرامداس بولىككە اتاۋ بەرىلىپ, قايتا اتالدى. قالا كوشەلەرىنە ورال مۇحامەدجانوۆ, سافۋان شايمەردەنوۆ, دۇكەنباي دوسجان, ەركەعالي راحماديەۆ, الەكساندر سىزعانوۆ, باسقا دا ەسىمدەر, بوزوق, بوتاي, تۇيمەكەنت جانە وزگە جەر-سۋ اتاۋلارى بەرىلدى. بيىل ەلوردامىزدىڭ 8 مەكەمەسىنە وزبەكالى جانىبەكوۆتىڭ, قوشكە كەمەڭگەرۇلىنىڭ, كەمەل اقىشەۆتىڭ, روزا باعلانوۆانىڭ, ەرمەك سەركەباەۆتىڭ, دىنمۇحامەد قوناەۆتىڭ, فاريزا وڭعارسىنوۆانىڭ, ىبىراي ءالتىنساريننىڭ ەسىمدەرى بەرىلدى. قازىرگى ۋاقىتتا ۇكىمەت جانىنداعى رەسپۋبليكالىق ونوماستيكا كوميسسياسىنىڭ وڭ قورىتىندىسىن العان ۇسىنىستار بويىنشا «استانا قالاسىنىڭ كەيبىر ءبىلىم بەرۋ ۇيىمدارىنا اتاۋ بەرۋ تۋرالى» جوباسى ازىرلەنىپ, ۇكىمەتتىڭ قاراۋىنا جولدانادى. ەلوردامىزدىڭ ءبىلىم وردالارىنا تالعات بيگەلدينوۆتىڭ, ماعجان جۇماباەۆتىڭ, تەمىربەك جۇرگەنوۆتىڭ, قادىر مىرزا ءاليدىڭ, اقجان ءال-ءماشانيدىڭ, تاتتىمبەتتىڭ ەسىمدەرى بەرىلەتىن بولادى.

– بيىل مەملەكەتتىك رامىزدەرىمىزدىڭ قابىلدانعانىنا 30 جىل تولدى. مەرەيتوي اياسىندا قانداي جۇمىستار جۇرگىزىلدى؟

– مەملەكەتتىك رامىزدەرىنىڭ 30 جىلدىعىنا وراي قالالىق ءىس-شارالار جوسپارى بەكىتىلدى. ەلوردا اۋماعىندا ورنالاسقان ءتۇرلى مەكەمەلەردە, اۋماقتىق دەپارتامەنتتەردە, سوتتاردا جانە باسقا دا ۇيىمداردا «مەملەكەتتىك رامىزدەر – ۇلت ماقتانىشى!» تاقىرىبىندا 200-دەن استام يميدجدىك ءىس-شارالار وتكىزىلدى. بۇل – اقپاراتتىق ساعاتتار, دوڭگەلەك ۇستەلدەر, كونفەرەنتسيالار, دارىستەر, سەمينارلار, كىتاپ كورمەلەرى, مەرەكەلىك كونتسەرت, ءتۇرلى تانىمدىق سايىستار, سۋرەت پەن شىعارما بايقاۋلارى, جاس مەملەكەتتىك قىزمەتشىلەردىڭ انت قابىلداۋى, اۆتو-موتو شەرۋ جانە تاعى باسقا شارالار.

اقپان ايىنان باستاپ ءبىلىم بەرۋ ۇيىمدارىندا «مەنىڭ رامىزدەرىم – مەنىڭ وتانىم!» جانە باسقا دا تاقىرىپتاردا ارنايى دارىستەر, دوڭگەلەك ۇستەلدەر, پىكىرتالاستار, تانىمال ادامدارمەن كەزدەسۋلەر, پاتريوتتىق اندەر, سۋرەتتەر مەن شىعارمالار كونكۋرستارى وتكىزىلدى. «تاۋەلسىزدىكتىڭ تىرەگى – جاستار» اتتى اۆتو-موتوشەرۋ, «مەنىڭ تۋىم – مەنىڭ ماقتانىشىم!» اتتى پاتريوتتىق فلەشموبى, سپورتتىق شارالار ۇيىمداستىرىلىپ وتكىزىلدى.

مامىر ايىنان باستاپ كوشەلەر مەن الاڭداردا, ءىرى ساۋدا ورتالىقتارىندا, قوعامدىق كولىكتەر مەن اۋەجايدا ورنالاستىرىلعان LED-ەكرانداردا مەملەكەتتىك رامىزدەر تۋرالى اۋديو جانە بەينەروليكتەر كورسەتىلۋدە, ەلوردا تۇرعىندارى اراسىندا قازاقستاننىڭ تۋىن قولدانۋمەن «مەنىڭ تۋىم – مەنىڭ ماقتانىشىم!» اتتى جاپپاي چەللەندج ۇيىمداستىرىلدى.

وتكەن جىلدىڭ سوڭىندا تاۋەلسىزدىكتىڭ 30 جىلدىعىنا وراي ءۇش مىڭ جالاۋشا اۆتوكولىك پەن تاكسيلەرگە تاراتىلعان. بيىل دا مەملەكەتتىك رامىزدەردىڭ 30 جىلدىعىنا وراي مامىر ايىندا «ءتىل جانە ءرامىز – تاۋەلسىزدىك جارشىسى» اتتى اكتسيا اياسىندا پاترۋلدىك اۆتوكولىكتەرگە, ەلوردانىڭ نەگىزگى كوشەلەرى, ءىرى ساۋدا ورتالىقتارى مەن ويىن-ساۋىق كەشەندەرىندە 3000 جالاۋشالار تاراتىلدى. قالا داڭعىلدارى جانە نەگىزگى كوشەلەردەگى بيلبوردتار مەن LED-ەكراندارعا 50 دانادان, ايالداما پيلوندارىنا 50-دەن استام تاقىرىپتىق قۇتتىقتاۋلار, قاناتتى سوزدەر ورنالاستىرىلدى. سونىمەن قاتار ءىرى ساۋدا ۇيلەرىندە اۋديو فورماتتا قۇتتىقتاۋ جاريالاندى.

– ەلوردا مەكەمەلەرىندە مەملەكەتتىك رامىزدەردى قولدانۋ ءتيىستى تالاپتارعا ساي ما؟

– ەلوردامىزدىڭ ءبىلىم جانە سپورت مەكەمەلەرىندە بيىلعى 3 مامىر-9 ماۋسىم جانە 12 شىلدە-3 تامىز ارالىعىندا مونيتورينگ جاساۋ كەستەسىن بەكىتىپ, ءتيىستى جۇمىستاردى جۇرگىزدىك. مونيتورينگ ۋاقىتىندا مەملەكەتتىك رامىزدەردىڭ پايدالانىلۋىنا, ورناتىلۋىنا, ورنالاستىرىلۋىنا نازار اۋدارىلدى. جالپى 75 ءبىلىم جانە 17 سپورت مەكەمەسى قامتىلدى. مونيتورينگ بارىسىندا مەملەكەتتىك رامىزدەر تۋرالى زاڭناما تالاپتارى بويىنشا ءتۇسىندىرۋ جۇمىستارى جۇرگىزىلىپ, باسشىلار كابينەتتەرىندە مەملەكەتتىك رامىزدەردى ورنالاستىرۋ جانە مەملەكەتتىك رامىزدەرگە ارنالعان ەكسپوزيتسيالاردى ورناتۋ بويىنشا ۇسىنىستار بەرىلدى. بەرىلگەن ەسكەرتۋلەر بويىنشا مەكەمە اكىمشىلىكتەرى تەز ارادا ءتيىستى جۇمىستار جۇرگىزىپ, اتالعان كەمشىلىكتەردى جويدى. اكىمدىكتىڭ بارلىق مەملەكەتتىك مەكەمەلەرى مەن اۋماقتىق دەپارتامەنتتەرگە مادەنيەت جانە سپورت مينيسترلىگى ۇسىنعان مەملەكەتتىك رامىزدەردى پايدالانۋ بويىنشا ەلەكتروندىق ادىستەمەلىك قۇرال تاراتىلدى.

– سىرتقى جارناما مەن كورنەكى اقپاراتتاردا قاتەلەر كەزدەسىپ جاتادى. وسى ماسەلەنى رەتكە كەلتىرۋ جاعى قالاي؟

– بيىلعى قاڭتار ايىنان باستاپ قاراشا ايلارى ارالىعىندا قالا كوشەلەرىندەگى سىرتقى (كورنەكى) جارنامانى رەتكە كەلتىرۋ جۇمىستارى جۇرگىزىلدى. ارنايى جۇمىس توبى قۇرىلىپ, ءار اۋدان جانە قۇزىرلى مەكەمەلەردەن جاۋاپتى ماماندار بەكىتىلدى. بۇگىنگى كۇنگە دەيىن ءتورت اۋدان بويىنشا 68 كوشەگە رەيد ۇيىمداستىرىلدى. جالپى سەگىز اي ىشىندە 2300-دەن اسا نىسان قارالىپ, كاسىپ يەلەرىنە زاڭ تالاپتارى ءتۇسىندىرىلدى. ورىن العان زاڭ بۇزۋشىلىقتار بويىنشا 1100 اسا نىسان يەلەرىنە جادىناما تاراتىلىپ, تۇزەتۋگە ۇسىنىمدار بەرىلدى. زاڭعا قايشى ورناتىلعان 700-دەن اسا جارناما قۇرىلعىلارى بىردەن الىنىپ تاستالدى.

قازىر ەلوردامىزداعى سىرتقى جانە ىشكى كورنەكى اقپاراتتاردى زاڭ تالاپتارىنا سايكەستەندىرۋ جۇمىستارىن جۇيەلى تۇردە جۇرگىزۋ ءۇشىن ءتيىستى شارالاردى اتقارۋ ماقساتىندا اۋقىمدى جوبالار دا قولعا الىنىپ جاتىر. اتاپ ايتساق, «قازاق ءتىلى» قوعامىمەن بىرگە «كورنەكى» جوباسى جۇزەگە اسىرىلۋدا. وسى جوبا اياسىندا ورىن العان زاڭ بۇزۋشىلىقتاردى قوعام وكىلدەرىمەن بىرلەسە وتىرىپ جويۋ جوسپارلانعان. «Körneki» جوباسى قازاقستانداعى كورنەكى اقپارات تارالۋىن رەتتەيتىن زاڭداردىڭ ورىندالۋىن قامتاماسىز ەتۋ ارقىلى كورنەكى اقپاراتتىڭ ساپاسى مەن سانىن جەتىلدىرۋ ماسەلەسىنە باعىتتالعان. «Körneki» جوباسىنىڭ مونيتورينگ جۇمىسى اياسىندا قامتىلعان نىساندار سانى – 1691.

ءبىزدىڭ باسقارما مەن استانا قالاسىنىڭ «اتامەكەن» كاسىپكەرلەر پالاتاسى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. وسى مەموراندۋم اياسىندا ساۋدا ورتالىقتارى, قوعامدىق تاماقتانۋ ورىندارىنىڭ, قىزمەت كورسەتۋ, باسقا دا نىساندار باسشىلىعىمەن جۇيەلى نەگىزدە كەزدەسۋلەر وتكىزىلەدى. بىرلەسكەن كەڭەستەردە تىلدەر تۋرالى زاڭنامانىڭ تالاپتارىنا سايكەس سىرتقى جارناما مەن كورنەكى اقپاراتتى ورنالاستىرۋ حالىققا مەملەكەتتىك تىلدە قىزمەت كورسەتۋ ماسەلەلەرى تالقىلانادى.

ەلورداداعى «شاپاعات», «گارانت سيتي», «دجافار», «تۇلپار», «جاننۇر», «الماتى», «وكان مەرەي», «ايماق تاۋ», «سولتۇستىك», «حان شاتىر», «Car city» ساۋدا ۇيلەرى جانە «ۇلجان», «وردا», «شارىن», «اسەم», «سارىارقا», «كوك», «وردا», «بيگ-شانحاي» ساۋدا كەشەندەرىنىڭ بازارىندا ونلاين جانە وفلاين فورماتىندا 15 جينالىس ۇيىم­داستىرىلدى. قالاداعى «MEGA Silk Way», «الەم», «سارىارقا», «Keruen City», «شاپاعات», «استانالىق بازار» ساۋدا ورتالىقتارىنىڭ باسشىلارىنا رەسمي تۇردە حات جولداندى.

بيىلعى 20 قازاندا بىزدەر ينۆەس­تيتسيالار جانە كاسىپكەرلىكتى دامىتۋ باسقارماسىمەن بىرلەسىپ, ەلورداداعى ساۋدا ورتالىقتارى باسشىلارىمەن ءتىل تۋرالى زاڭناما تالاپتارىنىڭ ورىندالۋ جانە باقىلاۋ-كاسسالىق ماشينالار ارقىلى مەملەكەتتىك تىلدە بەرىلەتىن تۇبىرتەكتەر ماسەلەلەرى بويىن­شا جينالىس وتكىزدىك. كاسىپكەرلەرگە «ءتىل تۋرالى» قازاقستان رەسپۋبليكاسىنىڭ زاڭىنا ەنگىزىلگەن وزگەرىستەر مەن تولىقتىرۋلار بويىنشا ءتۇسىندىرىلىپ, مەملەكەتتىك تىلدە چەكتەردى شىعارۋعا قاتىستى حابارلاما سيپاتىنداعى ۇسىنىستار بەرىلدى.

24 قاراشادا «دۋمان», «Rixos Astana», «Sheraton Astana», «Saad», «Alanda», «Radisson», «The Ritz-Carlton Astana», «Ramada by Wyndham Astana», «King Hotel Astana», «Hampton by Hilton Astana», «The St. Regis Astana» باسقا دا قوناقۇي باسشىلارى مەن وكىلدەرىنە ونلاين تۇردە جينالىس ۇيىمداستىرىلدى. كەزدەسۋ بارىسىندا قازاقستان رەسپۋبليكاسىنداعى ءتىل تۋرالى زاڭىنىڭ تالاپتارى, سونىڭ ىشىندە ماڭدايشالار, سىرتقى جارناما مەن كورنەكى اقپاراتتاردى زاڭ تالاپتارىنا سايكەستەندىرۋ, تۇتىنۋشىلارعا مەملەكەتتىك تىلدە قىزمەت كورسەتۋ ماسەلەلەرى تالقىلاندى. كەزدەسۋ سوڭىندا بيزنەس وكىلدەرى كوتەرىلگەن ماسەلەلەر بويىنشا سۇراقتارىنا جاۋاپتارىن الدى.

«ساۋدا-ساتتىققا قاجەتتى سوزدەر جيىنتىعى» قالتا كىتاپشا جانە «قازاقستان رەسپۋبليكاسىنداعى تiل تۋرالى» قازاقستان رەسپۋبليكاسىنىڭ زاڭىن تۇسىندىرەتىن 2000 جادىناما ازىرلەنىپ, ساۋدا ورتالىقتارى مەن دۇكەندەرىنە تاراتىلدى. الداعى ۋاقىتتا, اتالعان جۇمىستار ءوز جالعاسىن تاۋىپ, ءتىل تۋرالى زاڭ تالاپتارىنىڭ ورىندالۋىن جۇزەگە اسىرۋ باعىتىنداعى ءىس-شارالار جالعاساتىن بولادى.

– «ارحيۆ-2025» باعدارلاماسىن قالاي ىسكە اسىرىپ جاتىرسىزدار؟

– استانا قالاسىندا «ارحيۆ-2025» باعدارلاماسىن جۇزەگە اسىرۋ قارقىندى جۇرگىزىلۋدە. قالانىڭ مەملەكەتتىك ءارحيۆى ەلوردانىڭ قوعامدىق-ساياسي, ەكونوميكالىق جانە مادەني ءومىرىنىڭ ماڭىزدى اسپەكتىلەرىن, قوعام مەن قالانىڭ, حالىق شارۋاشىلىعىنىڭ دامۋ كەزەڭدەرىن سيپاتتايتىن تاريحي وقيعالاردى, رەسپۋبليكانىڭ ساياسي جانە مەملەكەت قايراتكەرلەرىنىڭ, عىلىم, مادەنيەت, ونەر وكىلدەرىنىڭ ءومىرى تۋرالى قۇجاتتاردى ساقتايدى.

قازىرگى ۋاقىتتا ارحيۆتە 728 قور جانە 395782 ساقتاۋ بىرلىگى بار. سونىڭ ىشىندە: تاريحي قورلار (رەۆوليۋتسياعا دەيىنگى), اكىمشىلىك قۇجاتتاما, جەكە قۇرام, جەكە باس قۇجاتتارى (جەكە قورلار), فوتوقۇجاتتار. ارحيۆتەردىڭ تولتىرىلۋ دارەجەسى 95 پايىزدى قۇراسا, 9 ايلىق كورسەتكىش بويىنشا مەملەكەتتىك ساقتاۋعا مەكەمەلەردەن 5762 ساقتاۋ بىرلىگى قابىلداندى.

«ەلوردالىق مەملەكەتتىك مۇراعاتتى دامىتۋدىڭ 2019-2022 جىلدارعا ارنالعان ستراتەگياسى» ازىرلەنىپ, بەكىتىلدى. قاجەتتى ينفراقۇرىلىمى بار تولىققاندى دەرەكتەردى وڭدەۋ ورتالىعى قۇرىلدى, سەرۆەرلەر ورناتىلدى.

– استانا قالاسى مەملەكەتتىك ءارحيۆىنىڭ جاعدايى قالاي؟ قۇجاتتاردى تسيفرلاندىرۋ قاي دەڭگەيدە؟

– بۇگىنگى تاڭدا استانا قالاسىنىڭ مەملەكەتتىك ءارحيۆى تولىققاندى رەس­تاۆراتسيالىق زەرتحاناسى بار مۇراعاتتاردىڭ الدىڭعى قاتارىندا.

بۇگىنگى كۇنى ارحيۆتە 330 قۇجات قالپىنا كەلتىرىلدى. 1239817 ميكروفيلمگە ساقتاندىرۋ قورى قۇرىلدى.

66731 ساقتاۋ بىرلىگىنەن 5266957 پاراق قۇجاتتاردىڭ ەلەكتروندىق كوشىرمەلەرى دايىندالدى. تسيفرلىق فورماتقا كوشىرىلىپ, «تسيفرلانعان» ءمورى باسىلدى. بۇل پاراقتار سانىنىڭ 7,5 پايىزىن قۇرايدى. تسيفرلاندىرۋ جۇمىستارى جالعاسۋدا.

ۇكىمەتتىڭ قاۋلىسىمەن بەكىتىلگەن «ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا» شەڭبەرىندە قۇرىلعان استانا قالاسىنداعى قۋعىن-سۇرگىن قۇرباندارىن اقتاۋ جونىندەگى وڭىرلىك كوميسسيانىڭ جۇمىسىنا ءارحيۆتىڭ عىلىمي-زەرتتەۋ ءبولىمىنىڭ قىزمەتكەرلەرى تارتىلدى. قازىرگى تاڭدا 1500 سايلاۋ قۇقىعىنان ايىرىلعان جانە 2000-نان استام سوتتالعاندار تۋرالى اقپارات زەرتتەلۋدە. بىلتىر جوبالىق كەڭسەگە 321 ادامدى اقتاۋ جونىندە ۇسىنىس ەنگىزىلدى, بۇل باعىتتاعى جۇمىستار جالعاسىپ جاتىر.

تاعىدا

ۇقساس جاڭالىقتار

پىكىر ۇستەۋ

Back to top button