استاناداعى «بايقوڭىر» تۇرعىن ءۇي كەشەنىنەن ءورت شىقتى. ءتىلسىز جاۋ تۋرالى حابارلاما ەلوردانىڭ ءورت ءسوندىرۋ قىزمەتىنە ساعات تۇنگى 2.12-دە تۇسكەن. ءورتتىڭ 5-قاباتتان 9-قاباتقا دەيىنگى كابەلدى شاحتادا شىققانى انىقتالدى. سونىڭ سالدارىنان 5-20 قاباتتار ارالىعى تۇتىندەي باستاعان. ونى سوندىرۋگە 63 مامان مەن 9 تەحنيكا جۇمىلدىرىلدى. سونىمەن قاتار, جەدەل جاردەم قىزمەتى 2 كىسىگە مەديتسينالىق كومەك كورسەتتى. ال 150-گا جۋىق كىسى ەۆاكۋاتسيالاندى. ءورت ساعات 2.35-تە اۋىزدىقتالدى.
ىشكى ىستەر مينيسترلىگىنە قاراستى توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆتىڭ ايتۋىنشا, وقيعا ورنىنا جەتكەن ءورت سوندىرۋشىلەرگە اۋلانىڭ كىرەبەرىسىندەگى اۆتوكولىكتەر ەداۋىر كەدەرگى جاساعان. «ادامداردى جوعارى قاباتتان كوشىرۋدىڭ كەرەگى بولعان جوق. ەگەر سونداي قاجەتتىلىك تۋا قالسا, ءورت ساتىسىن ىشكە الىپ كىرۋ شارت. ءيىن تىرەسكەن كولىكتەردىڭ كەسىرىنەن ساتى عيماراتقا سول بويى وتە المادى. مۇنداي ساتتە, امال جوق, ءورت سوندىرۋشىلەر سالماعى 25 كەلىلىك قۇرالدارمەن جوعارى قاباتتارعا قاراي جۇگىرەدى. وسىدان كەيىن ءورتتى ۇزاق ۋاقىت ءسوندىردى دەگەن اڭگىمە تاراتادى كەيبىرەۋلەر. سوندىقتان حالىق توتەنشە جاعداي كەزىندە ءوزىن-ءوزى ۇستاۋ مادەنيەتىن دامىتۋى ءتيىس» دەيدى كوميتەتتىڭ رەسمي وكىلى.
بۇدان بولەك, كەشە ەلورداداعى بايتۇرسىنوۆ كوشەسىندە ورنالاسقان 24 قاباتتىق «مىڭجىلدىق ساياباعى» تۇرعىن ءۇي كەشەنىنىڭ عيماراتىندا دا ءورت شىقتى. وندا پلاستيكالىق بۇيىمدار, پەنوپلاست جانە ەلەكتر كابەلى جانعان. اۋماعى 30 شارشى مەترگە دەيىن جايىلعان ءورت 20 مينۋتتىڭ ىشىندە ءسوندىرىلدى. وعان 21 مامان مەن 5 تەحنيكا تارتىلدى. زارداپ شەككەندەر مەن قازا تاپقاندار جوق.
بوتاگوز يكراموۆا
