«ءبىر ەل – ءبىر كىتاپ-2023» رەسپۋبليكالىق اكتسياسى اياسىندا قازاق پروزاسى مەن دراماتۋرگياسىندا ەرەكشە قولتاڭباسى بار كورنەكتى جازۋشى, دراماتۋرگ, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى تولەن ابدىكتىڭ شىعارمالارىن وقۋ ۇسىنىلدى.
اتالمىش اكتسيا مادەنيەت مينيسترلىگىنىڭ قولداۋىمەن ۇلتتىق اكادەميالىق كىتاپحانا مەن كىتاپحاناشىلار اسسوتسياتسياسى باستاماسىمەن 2007 جىلى باستالدى. ءداستۇرلى شارا بيىل وقىرماندار اراسىندا ون جەتىنشى مارتە ۇيىمداستىرىلدى.
اكتسيانىڭ ماقساتى – ۇلتتىق ادەبيەتىمىزدەگى ەڭ ۇزدىك تۋىندىلاردى وقۋ جانە ناسيحاتتاۋ, وقۋ ءىسىن ىلگەرىلەتۋ, رۋحاني مۇرامىزدى ساقتاۋ, سونداي-اق جاستارعا رۋحاني-ادامگەرشىلىك جانە پاتريوتتىق تاربيە بەرۋگە باعىتتالعان. سونىمەن قاتار, اكتسيا قوعامنىڭ وتاندىق ادەبيەتكە, سونىڭ ىشىندە كلاسسيكاعا, قازىرگى ادەبيەت پەن پوەزياعا دەگەن قىزىعۋشىلىعىن ءارى قاراي جوعارىلاتۋىنا مۇمكىندىك تۋعىزادى.
جازۋشى, دراماتۋرگ تولەن ابدىك ەسىمى وقىرماندارعا جاقسى تانىس. وعان تەرەڭنەن تولعاپ, جۇرەكتەن قوزعاپ جازعان شىرايلى شىعارمالارى دالەل. جازۋشىنىڭ العاشقى جاريالانعان اڭگىمەلەرىنەن, سوڭعى جازعان روماندارىنا دەيىن جۇرتشىلىقتىڭ جۇرەگىنە جول تاۋىپ, وقىرمانداردىڭ ءسۇيىپ وقيتىن شىعارمالارىنا اينالدى. قالامگەر تولەن جازعان پەسالار بويىنشا سپەكتاكلدەر قويىلدى, ستسەناريلەرى بويىنشا كينولار ءتۇسىرىلدى.
جازۋشىنىڭ قالامىنان شىققان تۋىندىلار بۇگىندە ويلى وقىرماننىڭ رۋحاني ازىعىنا اينالدى. تولەن ابدىكتىڭ «وڭ قول», «توزاق وتتارى جىمىڭدايدى», «ءولىارا», «پاراسات مايدانى» سياقتى شىعارمالارى كوپشىلىككە تانىس.
«ءبىز ۇشەۋ ەدىك» اتتى پەساسى رەسپۋبليكا تەاترلارىندا قويىلدى. كينودراماتۋرگيا سالاسىندا دا اتسالىسىپ, «قىز ءباتىش پەن ەرسەيىت» پوۆەسى بويىنشا «وتەلمەگەن پارىز», «بەلگىسىز ۇلدىڭ تاعدىرى» اتتى كوركەم فيلمدەردىڭ ستسەناريلەرىن جازدى.
