ەكى كۇن قاتارىنان كونگرەسس-حولدا وتكەن «استانانىڭ ۇزدىك تاۋارلارى» وڭىرلىك كورمە-بايقاۋى بيىلعى جەڭىمپازدارىن انىقتادى.
استانا ەكونوميكاسىنىڭ 60 پايىزىن ورتا جانە شاعىن كاسىپكەرلىك قۇرايتىنى بەلگىلى. سوندىقتان, وسى سالانى دامىتۋ ەلوردانىڭ وركەندەۋى ءۇشىن دە ماڭىزدى بولىپ تابىلادى. كورمە-بايقاۋدى ۇيىمداستىرۋشىلار كاسىپكەرلەردىڭ تىڭ تەحنولوگيالاردى قولدانۋىنا, زاماناۋي ادىستەردى ەنگىزۋىنە ايرىقشا ماڭىز بەرگەنىن ايتادى. كورمەگە قاتىسۋشىلاردىڭ ءبارى وسىنداي جاڭاشىل وندىرۋشىلەر دەيدى قالانىڭ كاسىپكەرلىك جانە ونەركاسىپ باسقارماسىنىڭ وكىلدەرى.
سونىمەن, بيىل كونكۋرسقا 45 كاسىپورىن ونىمدەرىن ۇسىندى. جەڭىمپازدار 3 اتالىم بويىنشا سارالانىپ, كوميسسيا مۇشەلەرىنىڭ شەشىمى بويىنشا ولاردىڭ 9-ى ءجۇلدەلى ورىن الدى.
ال 2014 جىلدىڭ ەڭ ۇزدىك تاۋار ءوندىرۋشىسى دەگەن ماراپاتقا ءۇش كاسىپورىن يە بولدى. ولارعا جەكە توقتالساق, «وندىرىسكە ارنالعان ۇزدىك تاۋارلار» اتالىمى بويىنشا «تاس كىلەم» جشس ءبىرىنشى ورىندى جەڭىپ الدى. بۇل كاسىپورىن قالانىڭ كوشەلەرىنە, تروتۋارلارعا ءارتۇرلى پليتالار, تاستار توسەۋمەن اينالىسادى.
«ۇزدىك ازىق-تۇلىك تاۋارلارى» اتالىمى بويىنشا كونديتەرلىك ءونىم شىعاراتىن «اپرەل» جشس, ال «تۇرعىندارعا ارنالعان ۇزدىك تاۋارلار» نوميناتسياسى بويىنشا ءبىرىنشى ورىندى جەكە كاسىپكەر تىنىمباەۆ الدى. بۇل جەكە سەرىكتەستىك مەملەكەتتىك رامىزدەر مەن سيمۆوليكالىق ونىمدەردى شىعارادى.
باس جۇلدە يەگەرلەرى ەندى وسى جىلدىڭ سوڭىندا استانادا وتەتىن «التىن ساپا» بايقاۋىنا قاتىسادى.
قىمبات نۇرعالي
