استانالىق توعىز جاسار شاحماتشى – ءبيبىسارا اساۋباەۆا الەم بىرىنشىلىگىندە ءتورتىنشى مارتە التىن القالادى.
بيىلعى چەمپيونات گرەك شىعاناعىنداعى حالكيديدە ءوتتى. «قاتىسقان 52 قازاقستاندىقتىڭ اراسىندا تەك ءبيبىسارا عانا توعىز مۇمكىندىكتەن 8,5 بالل جيناپ, توپ جاردى. 2011 جىلدان بەرى جاس شاحماتشى پولشادا, برازيليادا جانە رۋمىنيادا وتكەن الەم چەمپيوناتىندا ءۇش رەت ۇزدىك شىققانىن دا ايتا كەتكەن ءجون.
ءبيبىسارا اساۋباەۆا 2010 جىلدان بەرى استانا قالاسىنداعى ح.س.وماروۆ اتىنداعى شاحمات كلۋبىندا ءتالىم الىپ كەلەدى. جەكە جاتتىقتىرۋشىسى ازامات ءاۋباكىروۆ جاس قىزدىڭ تالانتىنا ءسۇيسىنىپ, ماقتان ەتەتىنىن جاسىرمادى: «ءبيبىسارانىڭ بۇل العاشقى ۇزدىك شىعۋى ەمەس, ول مۇنداي باس جۇلدەنى بۇدان بۇرىن دا ءۇش رەت جەڭىپ العان. جەڭىسكە دەگەن قۇشتارلىعى زور, وتە ەڭبەكسۇيگىش. جالىقپاي-تالماي جاتتىعۋىنىڭ ارقاسىندا وسىنداي بيىك مارتەبەگە يە بولىپ ءجۇر».
ءبيبىسارانىڭ التىنىنا قوسا, سايىسقا قاتىسقان قازاقستاندىق جاس شاحماتشىلار مەدالدەر مەن ماراپاتتارعا يە بولدى. اتاپ ايتساق, ءوزىنىڭ الەم چەمپيوناتىنداعى دەبيۋتتىك ونەر كورسەتۋىندە ءامينا قايىربەكوۆا جەتى جاسقا دەيىنگى ساناتتا كۇمىس مەدال السا, 15 جاسار جانات سايىن قولاعا قول جەتكىزدى».
ەربول جانات
