وسى ءبىر جامان ادەتتىڭ باستالعانىنا ءبىراز بولدى. بىردە انا وبلىستا, بىردە مىنا وبلىستا «تاماق تالاستىڭ» ۆيدەوسى الەۋمەتتىك جەلىلەردە تاراپ جاتادى. بۇل ماسقارا كورىنىس تاماق تاراتقىشتاردىڭ ماڭدايىنا تيمەي-اق قويدى. ەندى ناۋرىز پالاۋى ەمەس, اۋىزاشاردىڭ دا تالاسى تاراپ جاتىر. استى تەگىن تاراتىپ ساۋاپ جينايمىز دەگەنىنىڭ سوڭى توبەلەسكە ۇلاسىپ جاتسا دا ساباق بولار ەمەس.
دەگەنمەن, حالىق قۇدايعا شۇكىر, اش ەمەس دەيىك, ساداقاعا تاراتقان جارتى تاباق پالاۋعا دا مۇقتاج ەمەس شىعار. وندا نەگە حان پالاۋ حان تالاپايعا اينالدى؟!
جالپى مەرەكەگە جينالعان كوپشىلىكتىڭ ەسسىز توبىرعا اينالىپ كەتۋى ءبىر-اق ساتتە ەكەن. ءبىر جەرگە, ءبىر شاراعا جينالعان ۇلكەن قاۋىمدى يگەرۋ تاسىلدەرىن مەڭگەرىپ بارىپ, بەلگىلى تارتىپپەن رەتتەمەسە ارتى شۋعا, كەرەك دەسەڭىز, ءبىر-بىرىنە سۇرىنگەندەردىڭ اياق استىندا جاپپاي جانشىلۋى, جاراقات الۋى دا ادام شىعىنا جەتكىزۋى دە مۇمكىن.
كەز كەلگەن بۇقارالىق شارالاردى نەگىزگى بەلگىلەرىنە قاراي, ماقساتىن ايقىنداپ, ادام سانىنىڭ شاماسى مەن ۇيىمداستىرۋ دارەجەسى سياقتى وقيعانىڭ اۋقىمىن بولجاۋعا بولار ەدى. سوعان سايكەس قوعامدىق ءتارتىپ, ادامداردىڭ قاۋىپسىزدىگىنە جول بەرمەي, تىرشىلىگىن قامتاماسىز ەتۋ اسا قاجەت. باسقاشا ايتقاندا, وتەتىن بۇقارالىق ءىس-شارانىڭ وسى ەرەجەلەردى قاتال ۇستانباۋى ادامدار توبىن توبىرعا اينالدىراتىنىن ەستەن شىعارماۋ كەرەك.
توبىردىڭ پسيحولوگياسى ءبىر-بىرىمەن تانىستىعى جوق, كوزدەگەن ورتاق ماقساتى جوق, بىراق بارىنە ورتاق ۇقساس كوڭىل-كۇيمەن ادامداردىڭ ءبىر جەردە شوعىرلانۋىنان باستالادى. سول كوڭىل-كۇيدىڭ اسەرىمەن بارلىعى بىردەي ءبىر ارەكەتكە بارادى. وسى ورايدا ناقتى ءبىر جەردە تۋىنداعان بۇقارانىڭ پسيحولوگيالىق كۇشىنىڭ ەرەكشەلىگى سول, ءوز ورتاسىنداعى كەز كەلگەن وقشاۋلىقتى جۇتىپ جىبەرىپ, الدىن الا حابارلاندىرىلماسا تارتىپكە شاقىرعاننىڭ دا ءۇنىن ەستىرتپەي جىبەرەدى. قازاق مۇندايدا «كوپ قورقىتادى, تەرەڭ باتىرادى» دەگەندەي, ءبىر مىنەزدىڭ ءبىر ەموتسياسىمەن تۋىنداعان ارەكەت جۇقپالى اۋرۋداي بارىنە جۇعىپ, ادامدار ءوز ارەكەتتەرىنە ءمان بەرمەي, ءبىرىنىڭ ىزىنەن ءبىرى ءجۇرىپ, ءبىرى جاساعان ارەكەتتى قايتالاي باستايدى. بىرەۋى ۇمتىلعان نارسەگە جاپا-تارماعاي لاپ قويۋ دا وسى توبىرلىق سيپاتتى انىقتايدى. ءبىر ادام ءبىر نارسەگە ريزا بولماي, شۋ شىعارسا, باسقالارى قوسىلا كەتىپ, اشۋ-ىزاعا اينالىپ ۇلكەن كۇش بولىپ ءبارىن شارپيدى. ادامدار تەز ىزالانىپ, ءبىرىن-ءبىرى تىڭداۋدان قالادى. بۇل – توبىرلىق پسيحولوگيادا دالەلدەنگەن نارسە.
ارقايسىسى وزدىگىمەن اۋا جايىلعان كوپشىلىكتى باسقارۋشى رەتتەپ, تارتىپكە شاقىرىپ, بەرەتىن اسىن دا سول تارتىپكە ساي ۇلەستىرسە مۇنداي داراقىلىقتى ەستىپ-بىلمەس ەدىك.
مەنىڭشە, حالىقتىڭ ادام كەيپىن توبىرعا اينالدىرىپ, ەل-جۇرتقا ماسقارا ەتۋى, ادەيى ىستەمەسە دە ونى ۇيىمداستىرۋشىلاردىڭ توبىرلىق پسيحولوگياسىنان بەيحابار بولعاندىعىنان.
ناقتى ءبىر جەردە باس كوتەرگەن جاپپاي پسيحوزدىڭ قۇربانى بولىپ, بار بولعانى مەرەكەلىك استىڭ ءدامىن تاتامىن دەگەندەي قىزىق قۋىپ, بەيبەرەكەت ارەكەتتىڭ قۇربانىنا اينالىپ, شەكتەن شىعىپ كەتكەن ادامداردىڭ جايىن الدىمەن ۇيىمداستىرۋشىلار ويلاۋ كەرەك ەدى.
مەرەكەگە بارعان جۇرتتىڭ قاۋىپسىزدىگىن قامتاماسىز ەتپەسە بەرەكەسى كەتەدى. قىزىققا جينالعان قازاق ءبىر تاباق پالاۋ ءۇشىن ەركىنەن تىس توبىرعا اينالىپ جاتسا, ۇيىمداستىرۋشىلاردان قاتال سۇرالۋى كەرەك. حالىقتا ىنساپ جوق دەلىك, سابىرسىز, مادەنيەتتىڭ دەڭگەيى دە تومەن بولسىن, بىراق جالقىنى جالپىعا اينالدىرىپ, وسىعان جەتكىزگەن پالاۋ تاراتقىشتارعا تىيىم بولۋ كەرەك.
الداعى ۋاقىتتا وسىنداي سوراقىلىققا جول بەرگەن ۇيىمداستىرۋشىلاردىڭ وي-نيەتى سونشالىقتى تازا بولسا دا, جالپىنىڭ جايىن بىلمەگەندىگى ءۇشىن دە جازاسىن تارتۋى ءتيىس. ويتكەنى حالىق الدەبىرەۋلەردىڭ قولىنداعى ويىنشىعى ەمەس.
