ۇلى وتان سوعىسىندا قانشاما مايدانگەرلەر حابارسىز كەتتى. سول سۇراپىل جىلداردا «ءبارى دە مايدان ءۇشىن, ءبارى دە جەڭىس ءۇشىن!» دەگەن ۇرانمەن جىگەرلەنە ۇرىسقا اتتانعان مەنىڭ ۇلكەن اتام قابەن قۇسايىنوۆ تا حابارسىز كەتكەندەردىڭ قاتارىنان بولاتىن.
ول 1942 جىلدىڭ تامىز ايىندا سمولەنسك قالاسىن جاۋدان ازات ەتۋ كەزىندە مەرت بولىپتى. بىراق, دەنەسى تابىلماعان. سوعىس اياقتالعاننان كەيىن تۋىستارى اتامدى ىزدەستىرەدى. ءتيىستى ورىندارعا حابارلاسادى. قازا بولعان جەرىن تاۋىپ, باسىنا تاس قويساق دەپ ماقساتتانادى. قانشا ۋاقىت وتسە دە, ءبىزدىڭ كوڭىلىمىزدەگى ءۇمىت وتى سونبەي, اتامنان ءبىر حابار بولار دەپ سەنگەنبىز. اقىرى ءۇمىتىمىز اقتالدى. سمولەنسك وبلىسىنداعى «نادەجدا» ىزدەستىرۋ جاساعىنان قۋانىشتى حابار الدىق. 2014 جىلدىڭ مامىر ايىندا اتامنىڭ سۇيەگى ءىز-ءتۇسسىز جوعالعاندار اراسىنان تابىلىپ, سولدات مەدالونى ارقىلى اتى-ءجونى انىقتالىپتى. جانە تاعى ءبىر تۋىسقانىمىز ەسكەن ابىلقاسەنوۆتىڭ سمولەنسك وبلىسىنىڭ دەميدوۆ اۋدانىندا جەرلەنگەنىن بىلدىك. بۇل جاڭالىققا ءبىز عانا ەمەس, اۋىل-ايماق تۇگەلدەي قۋاندى. اكەسىنىڭ دەنەسى تابىلعانىن ەستىگەن ءامىرحان اتام «سۇيەگىن تۋعان جەرگە جەتكىزۋ – مەنىڭ پەرزەنتتىك بورىشىم» دەپ, سمولەنسكىگە جول تارتتى. باۋىرلاستار زيراتىنا جەرلەنگەن اعاسى ەسكەن ابىلقاسەنوۆتىڭ باسىنا ەسكەرتكىش تاقتا ورناتىپ, قابەن اتامىزدىڭ سۇيەگىن تۋعان جەرگە الىپ قايتتى. زەرەندى سەلوسىنىڭ ورتالىق الاڭىندا قابەن قۇسايىنوۆپەن سالتاناتتى قوشتاسۋ ميتينگىسى وتكىزىلىپ, وعان حالىق قاھارمانى, گەنەرال-لەيتەنانت باقىتجان ەرتاەۆ قاتىستى. وسىلايشا, ۇلى وتان سوعىسىندا قازا تاپقان جاۋىنگەر اتامىزدىڭ سۇيەگى اراعا 72 جىل سالىپ, تۋعان جەردىڭ قويناۋىنا بەرىلدى.
«تىلداعى ەڭبەك بولماسا, مايداندا جەڭىس تە بولماس ەدى» دەپ باتىر بابامىز باۋىرجان مومىشۇلى ايتقانداي, ناعاشى اتام مۇسا ءجۇسىپوۆتىڭ دە تىلداعى ەرەن ەڭبەگىن ماقتانىشپەن ايتامىن. مەنىڭ دە ماقساتىم – وسىنداي اتالارىمنىڭ ۇمىتتەرىن اقتاپ, ەلىمنىڭ ەرتەڭى ءۇشىن قىزمەت ەتۋ.
ارۋجان قۇسايىن,
اقمولا وبلىسى تسەلينوگراد اۋدانى تالاپكەر
ورتا مەكتەبىنىڭ
6-سىنىپ وقۋشىسى
