باستى اقپاراتەل تىنىسى

تۇلەگەن تۇركىستاننىڭ تارتۋى

استانادا تۇركىستان وبلىسىنىڭ 5 جىلدىعىنا وراي ءوڭىردىڭ ادەبي-مادەني الەۋەتىن تانىستىراتىن اۋقىمدى شارالار ءوتتى. ۇلتتىق اكادەميالىق كىتاپحانادا «بەس جىلدىققا – بەس ادەبي ساپار» جوباسى اياسىندا كورمە مەن جيىن, «قازاقستان» ورتالىق كونتسەرت زالىندا ايماق تاريحى مەن ونەرىنەن سىر شەرتەتىن كورمە مەن ايگىلى كومپوزيتور, حالىق ءارتىسى, مەملەكەتتىك سىيلىقتىڭ لاۋرەاتى, قازاقستاننىڭ ەڭبەك ەرى, قازاقستان ءانۇرانىنىڭ اۆتورى ءشامشى قالداياقوۆتىڭ اندەرىنەن «مەنىڭ قازاقستانىم» كونتسەرتى ۇيىمداستىرىلدى.

تاريحي كەلبەت تانىستىرىلدى

كىتاپحانادا وتكەن شارا قوناقتارى ولكەتانۋ باعىتى بويىنشا جاساقتالعان كىتاپ كورمەسى مەن تۇركىستاندى تانىتاتىن بەينەفيلم تاماشالادى. تۇركىستان وبلىسى اكىمى دارحان ساتىبالدىنىڭ ىستىق ىقىلاسىن جەتكىزگەن وبلىس اكىمىنىڭ ورىنباسارى بەيسەنباي تاجىباەۆ ادەبي ساپاردىڭ ماقساتى مەن وسى جيىننىڭ ءمان-جايىنا توقتالدى.

بيىل مەملەكەت باسشىسى قاسىم-­جومارت توقاەۆ تۇركىستان وبلىسى تۇرعىندارىمەن كەزدەسۋدە تۇركىستانعا تاريحي جانە رۋحاني ەلوردا مارتەبەسىن بەرۋ ماسەلەسىن كوتەرگەن بولاتىن. بەيسەنباي تاجىباەۆتىڭ ايتۋىنشا, قازىرگى تاڭدا ءوڭىر باسشىسىنىڭ قولداۋى­مەن تۇركىستاننىڭ تاريحي كەلبەتىن اشا تۇسەتىن ماڭىزدى جوبالار قولعا الىنۋدا.

جيىنعا قاتىسقان زيالى قاۋىم وكىلدەرى تۇركىستاندى تۇلەتۋ باعىتىنداعى پىكىرلەرىن ايتتى. قوعام قايراتكەرى دارحان مىڭباي تۇركىستاندا قولونەردى دامىتۋدى, قولونەرشىلەردى شاقىرتىپ جاعداي جاساۋدى ۇسىندى. پارلامەنت ءماجىلىسىنىڭ دەپۋتاتى, اقىن قازىبەك يسا تۇركىستاننىڭ قازاق حاندىعىنىڭ استاناسى بولعاندىعىن باستى نازاردا ۇستاۋ كەرەكتىگىن العا تارتىپ, كىتاپ قورىن كەڭەيتۋگە ءوز ۇلەسىن قوساتىنىن جەتكىزدى. ۇلتتىق عىلىم اكادەمياسىنىڭ اكادەميگى, پرەزيدەنت جانىنداعى ۇلتتىق قۇرىلتاي مەن استانا قالاسى قوعامدىق كەڭەسىنىڭ مۇشەسى كارىمبەك قۇرمانالى تۇركىستاندى تانىتۋ مەن ناسيحاتتاۋعا ءجىتى كوڭىل ءبولۋ كەرەكتىگىن ايتىپ, قاسيەتتى شاھاردا ۇلتتىق عىلىم اكادەمياسىنىڭ فيليالىن اشۋدى ۇسىندى. ال بەلگىلى جۋرناليست, «استانا اقشامى» گازەتىنىڭ باس رەداكتورى ەركىن قىدىر تاۋەلسىزدىكتىڭ 30 جىلىندا ەكى ۇلى وقيعا بولعانىن, بۇل استانانىڭ سالىنۋى مەن تۇركىستاننىڭ تۇلەۋى ەكەنىن ايتتى.

سونداي-اق پارلامەنت ءماجىلىسىنىڭ دەپۋتاتى, اقىن جاناربەك ءاشىمجان, الاشتانۋشى عالىم قايرات ساق, جازۋشىلار وداعىنىڭ استانا قالالىق فيليالىنىڭ ديرەكتورى داۋلەتكەرەي كاپۇلى, جاس اقىن, «دارىن» مەملەكەتتىك جاستار سىيلىعىنىڭ لاۋرەاتى باتىرحان سارسەنحان ويلارىمەن ءبولىستى.

وسى جيىن ماقساتىنىڭ ءبىرى «اۋىل كىتاپحانالارىنا 20 مىڭ كىتاپ» شاراسى اياسىندا ەلدى مەكەندەردىڭ كىتاپ قورىن قالىپتاستىرۋ بولسا, استانالىق قالامگەرلەر كىتاپحانا قورىنا 4 مىڭعا جۋىق كىتاپ سىيعا تارتتى.

ءشامشى اندەرى شارىقتادى

«قازاقستان» ورتالىق كونتسەرت زالىنا ءشامشى قالداياقوۆ اندەرى كەشىنە كەلگەندەر الدىمەن كورمەنى تاماشالادى. مۇندا تۇركىستان وبلىس­تىق تاريحي-ولكەتانۋ مۋزەيى, «ۇلى دالا ەلى» ورتالىعى, رۋحانيات – ءابۋ ناسىر ءال-فارابي مۋزەيى, بەينەلەۋ ونەر مۋزەيى, تۇركىستان وبلىسىنىڭ ماقتا شارۋاشىلىعى تاريحى مۋزەيى جانە قاجىمۇقان اتىنداعى وبلىس­تىق سپورت مۋزەيىنىڭ جادىگەرلەرى مەن «وڭتۇستىكفيلم» مەكەمەسىنىڭ كورمەسى قويىلدى. كورمەگە عۇلاما عالىم, ەنتسيكلوپەديست ءابۋ ناسىر ءال-فارابيدەن باستاپ, داڭقتى بالۋان قاجىمۇقان, ايگىلى كومپوزيتور ءشامشى قالداياقوۆ, ت.ب. تۇلعالاردىڭ مۇرالارى, تۇركى تىلدەس ەلدەردىڭ ۇلتتىق كيىمدەرى, قىلقالام شەبەرلەرىنىڭ تۋىندىلارى, فوتوسۋرەتتەر, ءبىر سوزبەن ايتقاندا, ولكەنىڭ باي مۇراسى مەن تاريحى قامتىلعان.

ال «مەنىڭ قازاقستانىم» كونتسەرتى تۇركىستان وبلىسىنىڭ 5 جىلدىعى مەن ءشامشى قالداياقوۆ اتىنداعى تۇركىستان وبلىستىق فيلارمونياسىنىڭ 60 جىلدىعىنا وراي ۇيىمداستىرىلدى. ءشامشىنىڭ قارىنداسى رايحان ­قالداياقوۆا كەشتىڭ قۇرمەتتى قوناعى بولدى.

– ماعجان اقىن ايتپاقشى, «تۇركىستان – ەر تۇرىكتىڭ بەسىگى مەن ەكى دۇنيەنىڭ ەسىگى». تۇركىستان – قازاق ەلىنىڭ رۋحاني استاناسى. مينيستر قىزمەتىنە تاعايىندالعانىمدا العاشقى ساپارىمدى تۇركىستان وبلىسىنان باستادىم. ءشامشى اۋىلىنا بارىپ, ونىڭ كىندىگى تامعان جەردە جۇرتشىلىقپەن كەزدەسكەندە بىرقاتار ۋادە بەردىم. سونىڭ ءبىرى ناۋرىز ايىندا استانادا ءشامشى قالداياقوۆ اندەرىنىڭ كەشىن ۇيىمداستىرۋ بولاتىن. ول كەش ءوتتى, سول اۋىلدىڭ ءبىر توپ ازاماتى ونىڭ كۋاگەرلەرى بولدى. مادەنيەت – ەلدىڭ رۋحاني قازىناسى, ونەر – ۇلتتىڭ جانى. ەلوردادا قازاقستاننىڭ بارلىق جيىرما ايماعىنىڭ كەشتەرى وتسە دۇرىس بولار ەدى, – دەگەن مادەنيەت جانە سپورت ءمينيسترى اسحات ورالوۆ تۇركىستان وبلىسىنىڭ 5 جىلدىعى مەن ءشامشى قالداياقوۆ اتىنداعى تۇركىستان وبلىستىق فيلارمونياسىنىڭ 60 جىلدىعىمەن قۇتتىقتادى.

ءشامشىنىڭ سوڭعى تۋىندىسى, اقىن سابىرحان اسانوۆتىڭ ولەڭىنە جازىلعان «وتىرارداعى توي» انىمەن اشىلعان كونتسەرتكە وبلىستىق فيلارمونيا ونەرپازدارى مەن تانىمال انشىلەر قاتىستى. ولار «سۇگىر» اتىنداعى قازاق ۇلت اسپاپتار وركەسترى مەن «الاش» ۆوكالدى اسپاپتار ءانسامبلىنىڭ سۇيەمەلدەۋىمەن ءشامشىنىڭ ومىرشەڭ اندەرىن اۋەلەتتى. «ياسسى» جانە «فاراب» بي انسامبلدەرى كەشتى مىڭ بۇرالعان بيمەن كوركەمدەدى. كەش بارىسىندا قازاقستاننىڭ حالىق ءارتىسى نۇرجامال ۇسەنباەۆا, مادەنيەت قايراتكەرى ايجان تاجەنوۆا, بەلگىلى انشىلەر ناركەنجە سەرىكباەۆا, ماماديار تاۋكەەۆ, عازيزحان شەكەربەكوۆ, «سلاۆيان بازارى» حالىقارالىق فەستيۆالىنىڭ باس جۇلدە يەگەرى, «دارىن» مەملەكەتتىك جاستار سىيلىعىنىڭ لاۋرەاتى رۋحيا بايدۇكەنوۆا, دىنمۇحامەد بايقوجا, ايزادا الىمبەك, دانا ماقاتاەۆا, دانيار بارىس, ت.ب. انشىلەر ونەر كورسەتتى.

تاعىدا

ۇقساس جاڭالىقتار

پىكىر ۇستەۋ

Back to top button