باستى اقپاراتءبىلىمجاڭالىقتار

تۇلەكتەردىڭ «تريۋمف» بالى

تالاپتىڭ تۇلپارىن ءمىنىپ, تاس قياعا ورلەگەن تالانتتى شاكىرتتەردىڭ باسىن بىرىكتىرگەن «استانا دارىنى» وڭىرلىك عىلىمي-پراكتيكالىق ورتالىعى بيىل 10 جىلدىعىن تويلاۋدا. مەرەيتوي اياسىندا اتالمىش مەكەمە مەن استانا قالاسىنىڭ ءبىلىم باسقارماسى ءداستۇرلى «تريۋمف» بالىن ۇيىمداستىردى. ەلوردانىڭ ەڭ ۇلگىلى تۇلەكتەرىن ۇكىلەيتىن سالتاناتتى جيىنعا ءبىز دە قاتىسىپ قايتتىق.

وقۋشىلار سارايىنىڭ ىشىندە ەرەكشە اتموسفەرا ورناعان. اق كويلەكتى بويجەتكەندەر مەن شىرتتاي كيىنگەن بوزبالالارعا قاراپ كوزىڭ سۇيسىنەدى. بۇگىن ولار قانداي ماراپاتقا دا لايىق. ويتكەنى ۇل-قىزدار ءدۇبىرلى دودالاردا دەس بەرمەي, باس شاھاردىڭ بەدەلىن بيىكتەتىپ كەلەدى. ماسەلەن, بيىلعى وقۋ جىلىندا اقش-تا, برازيليادا, گرۋزيادا, رەسەيدە, وڭتۇستىك كورەيادا وتكەن حالىقارالىق وليمپيادالار مەن عىلىمي بايقاۋلاردا 268 مەدال ەنشىلەگەن. رەسپۋبليكالىق وليمپيادا مەن عىلىمي جوبالار جارىسىندا دا 10 جىل قاتارىنان جالپىكوماندالىق ەسەپتە 1-ورىننان كورىنىپ ءجۇر. وسى جىلى وقۋشىلار 97 جۇلدەنى ولجالاپتى.


كەشتىڭ شىمىلدىعىن اشقان ەلوردا اكىمىنىڭ ورىنباسارى ەرمەك امانشاەۆ:
– ءبىلىم باسەكەسىندە قول جەتكىزگەن جەتىستىكتەرىڭ ءبىز ءۇشىن وتە قىمبات. بۇل جولدا ۇستازدارىڭ مەن اتا-انالارىڭ دا وراسان ەڭبەك ءسىڭىردى. لايىم وسى باعىتتان تايماي, ەلدىڭ ەلەۋلى, حالىقتىڭ قالاۋلى ازاماتى اتانىڭدار. ۇلكەن ومىرگە باسقالى جاتقان قادامدارىڭ قۇتتى بولعاي! – دەپ شاكىرتتەرگە ىستىق لەبىزىن جەتكىزدى.
بۇدان سوڭ اكىم ورىنباسارى استاناداعى ۇزدىك مەكتەپتەردىڭ باسشىلارىن ماراپاتتادى. اتاپ ايتساق, دارىندى ەر بالالارعا ارنالعان قازاق-تۇرىك ليتسەيىنىڭ ديرەكتورى نۇركەن اكىموۆ, №4 مەكتەپ-گيمنازيانىڭ ديرەكتورى بازاركۇل سىزدىقوۆا, №73 فيزيكا-تەحنيكالىق باعىتتاعى مەكتەپ-ليتسەيدىڭ ديرەكتورى قۇرالاي بايتاجىكوۆا سىندى پەداگوگتار العىس حاتقا يە بولدى.


ال كەشتىڭ باستى كەيىپكەرلەرى – استانانىڭ اتىن قازاقستان مەن الەمگە تانىتىپ جۇرگەن دارىندى جەتكىنشەكتەر قاتارىندا ەلتاي زاداشەۆ, اسەل كاپىشەۆا, ءالىم امانجولوۆ, دانا دوقتىربەك, ەلحان قامزابەك, ءادينا ۇيسەنباەۆا, تەمىرلان امانگەلدين سەكىلدى ۇل-قىزدار بار. ولارعا ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم بەرۋ دەپارتامەنتى ديرەكتورى جاڭىل جونتاەۆا ارنايى ستاتۋەتكا تابىستاپ, ساپارلارىنا اق جول تىلەدى.

بوتاگوز ماراتقىزى

تاعىدا

ۇقساس جاڭالىقتار

پىكىر ۇستەۋ

Back to top button