استانا قالاسىنىڭ اكىمدىگى تۇڭعىش پرەزيدەنت كۇنىندە تۋعان سابيلەرگە سىي-سياپات كورسەتپەكشى. وسىعان بايلانىستى ەلوردالىق دەنساۋلىق ساقتاۋ باسقارماسى باسشىسىنىڭ ورىنباسارى مىندەتىن اتقارۋشى ساۋلە نۇراشەۆامەن تىلدەسكەن ەدىك.
– ساۋلە قۋانىشقاليقىزى, ءسابيدىڭ دۇنيەگە كەلۋى – ءبىر وتباسىنىڭ عانا ەمەس, ءبۇتىن ءبىر مەملەكەتتىڭ دە قۋانىشى ەكەنى ءسوزسىز. جالپى ەلوردادا تۋ كورسەتكىشى قانداي دەڭگەيدە؟
– استانا قالاسىندا تۋ كورسەتكىشى جىلدان جىلعا ارتىپ كەلەدى. مۇنىڭ ءوزى حالىقتىڭ ءومىر ءسۇرۋ ساپاسىنىڭ ارتىپ كەلە جاتقانىن اڭعارتسا كەرەك. ايتالىق, 2012 جىلى ەلوردادا 21 266 نارەستە ىڭگالاسا, بىلتىر 22 600 ءسابي دۇنيەگە كەلدى. ال, وتكەن جىلى تۇڭعىش پرەزيدەنت كۇنىندە تۋعان بالالاردىڭ سانى – 50. سونىڭ 25-ءى – قىز, 25-ءى – ۇل بالا. بىلتىر تۋعان سابيلەردىڭ 71-ءى نۇرسۇلتان ەسىمىن يەلەندى.
بيىلعى تۋ كورسەتكىشى وتكەن جىلعىدان ارتىق بولاتىنىنا سەنىمدىمىز. سەبەبى, 2014 جىلدىڭ قاڭتار-قىركۇيەك ارالىعىندا 18 087 ءسابي دۇنيە ەسىگىن اشتى. بۇل – وتكەن جىلدىڭ وسى ۋاقىتىمەن سالىستىرعاندا 10,9 پايىزعا ارتىق كورسەتكىش.
– تۇڭعىش پرەزيدەنتتىڭ كۇنىندە تۋعان سابيلەرگە بىلتىر دا تارتۋ-تارالعىلار ۇلەستىرىلگەنىن بىلەمىز. بيىل دا وسى ءداستۇر جالعاسىن تابا ما؟
– ارينە, ءبىز بىلتىر تۋعان نارەستەلەردىڭ بارىنە «قۋان, ءسابي» وقۋ قۇرالىن, ءسابي كيىمدەرىن سىيلاعان بولاتىنبىز. بيىل دا وسى داستۇردەن جاڭىلماي, مەرەكە كۇنى تۋعان بالالارعا ەرەكشە ەستەلىك سىيلىق ازىرلەپ وتىرمىز. انالار دا قۇر الاقان قالمايدى. مۇنداي سىي قۇرمەت تەك مەرەكەگە بايلانىستى عانا ەمەس, قازاقستان ازاماتتارىنىڭ جاعدايىن جاقسارتۋعا جانە ەلىمىزدىڭ دەموگرافيالىق جاعدايىن كوتەرۋگە بايلانىستى ۇيىمداستىرىلىپ وتىر.
– جالپى, استانادا انا مەن بالا دەنساۋلىعىن قورعاۋ, ءولىم كورسەتكىشىن ازايتۋ ماقساتىندا اتقارىلىپ جاتقان شارۋالارعا قىسقاشا توقتالىپ وتسەڭىز.
– انا مەن بالا – ەلىمىزدىڭ بولاشاعى. سوندىقتان پەرزەنتحانالار دۇنيەجۇزىلىك دەنساۋلىق ساقتاۋ ۇيىمىنىڭ باعدارلاماسى نەگىزىندە انانى بارىنشا قاۋىپسىز بوساندىرۋ قاعيداتىمەن جۇمىس ىستەيدى. پەرزەنتحانالاردا ەنگىزىلگەن زاماناۋي تاسىلدەر, جۇكتىلىك كەزىندەگى كۇتىم مەن بوساندىرۋداعى ءتيىمدى تەحنولوگيالار انا مەن جاڭا تۋعان نارەستەلەردىڭ ءولىم كورسەتكىشىن ازايتۋعا سەپتىگىن تيگىزدى. بۇگىندە ەلوردانىڭ پەرزەنتحانالارىندا شۇعىل جاعدايلاردا تەز ارەكەت ەتەتىن جوعارى بىلىكتى كادرلاردان قۇرالعان بريگادالار جۇمىس ىستەيدى. ايەل بوسانعاننان كەيىن دە نازاردان تىس قالمايدى. ولارعا كۇيزەلىسكە ۇشىراۋىنىڭ الدىن الۋ ماقساتىندا ارنايى تەست جۇرگىزىلەدى. ەمحاناداعى گينەكولوگتار دا ستاتسيونارداعى, ءىرى عىلىمي ورتالىقتارداعى ماماندارمەن ۇدايى تاجىريبە الماسىپ, كەڭەس الىپ وتىرادى. سونداي-اق, №1 پەريناتالدىق ورتالىقتاعى ۋلترادىبىستىق پەريناتالدىق سكرينينگ جۇرگىزۋ دە انا مەن ءسابي بويىنداعى سىرقاتتاردى ەرتە انىقتاپ, دەر كەزىندە ەم-دوم جاساۋعا ىقپال ەتتى.
قىمبات نۇرعالي
