كوپشىلىكتىڭ نازارىن اۋدارعان XVII حالىقارالىق «شابىت» شىعارماشىل جاستار فەستيۆالى 3 قاراشا كۇنى باستالعان بولاتىن. ءتۇرلى باعىتتاعى تالانتتى جاستاردىڭ باسىن قوسقان بۇل بايقاۋدا جىر سۇيەر قاۋىم اسىعا كۇتكەن «ۇزدىك ادەبي شىعارما» اتالىمى بويىنشا العا وزعان اقىندار انىقتالدى.
استانا قالاسى اكىمدىگىنىڭ ۇيىمداستىرۋىمەن وتكەن ءدۇبىرلى دوداعا قاتىسۋعا تالاپ بىلدىرگەن 150 ۇمىتكەر فەستيۆال شىمىلدىعىن تۇرگەنگە دەيىن قازىلار القاسى 100 شايىردى ىرىكتەپ الدى. بيىلعى بايقاۋدىڭ بۇرىنعىدان وزگەشەلىگى قاتىسۋشى جاستاردىڭ جىرلارى ادەبيەت پورتالىندا اشىق جاريالانىپ, وقىرماندار ۇناعان اقىنعا داۋىس بەرۋگە مۇمكىندىك الدى. سۇرىپتالعان جۇزدەن جۇيرىك شىققانداردىڭ ەسىمى بەيسەنبى كۇنى بەلگىلى بولدى.
قازىلار القاسىنىڭ توراعاسى, قازاقستان مەملەكەتتىك سىيلىعىنىڭ يەگەرى ۇلىقبەك ەسداۋلەت جەڭىمپازداردى انىقتاعاندا, كەيبىر اقىندارعا كەلگەندە عانا پىكىرتالاس تۋعانى بولماسا, تورەشىلەردىڭ ويلارى ءبىر جەردەن شىققانىن, ءتىپتى, وقىرمان پىكىرلەرىن دە ەسكەرگەنىن ايتىپ, «بۇل بايقاۋ تالانتتاردىڭ كەلەشەگىنە جول اشادى» دەپ جاس اقىندارعا ساتتىلىك تىلەدى.
سونىمەن, بيىلعى «شابىت» شىعارماشىل جاستار فەستيۆالىنىڭ «ۇزدىك ادەبي شىعارما» اتالىمى بويىنشا گران-پري جۇلدەسى تۇركىستاننان كەلگەن تالانتتى جاس اقىن باتىرحان سارسەنحانعا بۇيىردى. ال, جۇلدەلى 1-ورىندى ولجاس قاسىم, 2-ورىندى تارازدىق حاميت ەسامان, 3-ورىندى قاراعاندىلىق جادىرا بايبۇلانوۆا يەلەندى.
سونداي-اق, حالىقارالىق كونكۋرستىڭ ارناۋلى سىيلىقتارىمەن 7 اقىن ماراپاتتالدى. استانا قالاسى اكىمدىگى بەلگىلەگەن قر حالىق جازۋشىسى فاريزا وڭعارسىنوۆا اتىنداعى ارنايى سىيلىقتى ءاليا ىڭكاربەك جانە ناعيما وتەپوۆا اتىنداعى ارنايى سىيلىقتى كاليشا جاقىپوۆا الدى.
«قازكونتەنت» اق «ادەبيەت پورتالى» ينتەرنەت-جوباسى تاعايىنداعان ءامىرحان بالقىبەك اتىنداعى ارنايى سىيلىعىنىڭ يەگەرى – بەكزات سماديار, ءابدىلدا ايماق اتىنداعى ارنايى سىيلىعىنىڭ يەگەرى – شەرحان تالاپ.
سونىمەن قاتار, «فوليانت» باسپاسىنىڭ كاكىمبەك سالىقوۆ اتىنداعى ارنايى سىيلىعىنا دينارا مالىك, «ۇلت» پورتالىنىڭ تولەۋجان سمايىلوۆ اتىنداعى ارنايى سىيلىعىنا نۇرجان قادىرالى, «جۇلدىز» جۋرنالىنىڭ عافۋ قايىربەكوۆ اتىنداعى ارنايى سىيلىعىنا سايان ەسجان يە بولدى.
باسقا اتالىمداردىڭ جەڭىمپازدارىمەن قاتار «ۇزدىك ادەبي شىعارما» اتالىمىنىڭ جۇلدەگەرلەرى بۇگىن بەيبىتشىلىك جانە كەلىسىم سارايىندا وتەتىن سالتاناتتى جابىلۋ كەشىندە رەسمي تۇردە ماراپاتتالادى.
