تۇرعىن الاپتارىنىڭ تۇرمىسى تۇزەلەدى
استانادا قالالىق ءماسليحاتتىڭ دەپۋتاتتارى قوعامدىق تىڭداۋ وتكىزدى. جيىندى قالالىق ءماسليحاتتىڭ حاتشىسى سانسىزباي ەسىلوۆ اشىپ, كۇن تارتىبىمەن تانىستىردى.
بۇگىندە قالادا قۇرىلىس جۇمىستارى مەن ورتالىقتى اباتتاندىرۋ جۇمىستارىنان باسقا, شەت ايماقتاردى دامىتۋ قولعا الىنعان. وسى ماقساتتا 2010 جىلى استانا قالاسىنىڭ شەت ايماقتارىن دامىتۋ تۇجىرىمداماسى جۇزەگە اسىرىلا باستادى. قۇجات بويىنشا جولدار مەن ينجەنەرلىك جەلىلەردى سالۋ, سونىمەن قاتار, تۇرعىن الاپتارىندا ادامدارعا قولايلى جاعداي جاساۋ قاراستىرىلعان.
وسى ماقساتتا, 150 مىڭعا جۋىق حالىق تۇراتىن جيىرما تۇرعىن الاپ جوندەلەدى. «بۇگىنگى تاڭدا 232 كم جول سالىندى. 2011-2013 جىلدارى ون بەس تۇرعىن الاپتا ءتيىستى جۇمىستار قارقىندى جۇرگىزىلىپ, 65,3 كم جول مەن 136 كم ينجەنەرلىك جەلى جاڭادان سالىنعان بولاتىن. بەس تۇرعىن ءۇي الابىندا جۇمىستار تولىعىمەن اياقتالدى» دەيدى استانا قالاسى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى راشيد امانجولوۆ.
سونىمەن قاتار, استانادا 2020 جىلعا دەيىن وڭتۇستىك-شىعىس اۋدانىنىڭ ينفراقۇرىلىمىن جابدىقتاۋ كوزدەلىپ وتىر. بۇل تۋرالى استانا قالاسى كوممۋنالدى شارۋاشىلىق باسقارماسىنىڭ باسشىسى پاۆەل كۋلاگين ايتتى.
«قازىر 600 تۇرعىن ءۇي تولىقتاي كوممۋنالدىق جەلىلەرمەن قامتاماسىز ەتىلدى. 2011-2012 جىلدارى استانانىڭ شەتكەرى ايماقتارىن دامىتۋ تۇجىرىمداماسى اياسىندا كومسومولسكي, قاراوتكەل, زارەچنىي اۋداندارىندا جۇمىس جۇرگىزىلدى» دەدى ول.
ەركەجان ساتىمبەك