تۇرعىندار نەگە «الاڭ كوڭىل»؟
جاقىندا بەلگىلى ءبىر پسيحولوگتان استانالىق مەنتاليتەت تۋرالى سۇرادىم. جوعارى ساناتتى مامان قازىرگى كۇندە ءبىزدىڭ قالانىڭ تۇرعىندارىنا «الاڭ كوڭىل» ءتان ەكەنىن ايتتى.
وسى پايىمنىڭ استارىندا ەلىمىزدىڭ ءار اۋماعىنان كوشىپ كەلىپ, استانالىق اتانعانداردىڭ وزدەرىن «بوتەن» سەزىنۋى, وسى جەرگە الاڭسىز تامىرلاي الماي جاتقانىن ايتتى. مۇنداي پسيحولوگيالىق كەدەرگى قالا ءۇشىن قيانات ەكەنىن ايتقان مامان مىنا مىسالدى كەلتىردى. كۇندەلىكتى اۋلانى تازالاپ, جولدىڭ تاس كىرپىشتەرىن قالاپ جاتقانداردىڭ جۇمىسىن باقىلاڭىز. نەمەسە اۋلاداعى تال-تەرەكتەردىڭ وسكەن بۇتاقتارىن قىرقىپ جۇرگەن نەمەسە كوك شالعىندى كۇزەپ جۇرگەندەرگە كوز سالىڭىزشى. ەگەر جۇمىسكەر وسى اۋلانىڭ تۇرعىنى بولسا ەرەكشە ۇقىپتىلىقپەن, بالالارىم مەن نەمەرەلەرىم قىزىعىن كورسىن دەگەن نيەتپەن جاساعانى كورىنىپ تۇرار ەدى. وكىنىشكە وراي, بۇل سيرەك كەزدەسەتىن جايت. سوندىقتان دا بولار, جانىن سالماي جاساعان جۇمىس وزگەنىڭ دە جانىن جىلىتپايدى. الاڭ كوڭىلمەن ءاتۇستى جاسالعانى كوزگە ۇرىپ تۇرادى.
بۇل دەگەنىمىز نە؟ ارىدەن باستاساق, استانا تۇرعىندارىنىڭ كوبى سىرتتان كەلگەندەر ەكەنى بەلگىلى. ولاردىڭ كوبىنىڭ ءوز باسپاناسى جوق, ۋاقىتشا پاتەر جالداپ تۇرعاندار. بىرەۋدىڭ ءۇيىنىڭ بۇرىشىن پانالاپ جۇرگەندەردە وزىمدىكى دەيتىندەي يەلىك ەتۋ سەزىمدەرى باسەڭ كەلەدى. جارتىسىنان كوبى جالدامالى تۇرعىنداردان تۇراتىن تۇرعىن ۇيلەردىڭ كىرە بەرىستەرى شاشىلىپ, ەسىگى سىنىپ, جەدەلساتى مەن باسقىشتارى كۇتىم كورمەي, مەرزىمىنەن بۇرىن توزۋى دا – سول تۇرعىنداردىڭ جاناشىرلىعىنىڭ بولماۋىنان.
بايقاساڭىز, ءبىر ءۇيدىڭ تۇرعىندارى ءبىر-بىرىمەن تانىسىپ, ءبىلىسىپ, كەزدەسە قالسا, امانداسىپ جاعداي سۇراسىپ جاتادى. كەيدە ءۇيدىڭ كىلتىن كورشىگە سەنىپ تاستاپ كەتە بەرەتىن كەزدەرىمىز بولعان. الاڭ كوڭىل بولعان جەردە مۇنداي قارىم-قاتىناس مۇمكىن ەمەس.
ال بارشامىزدىڭ يگىلىگىمىزگە سالىنعان باس شاھارىمىزدى قۇندىلىعىمىز, قاسيەتتى مەكەنىمىز ەكەنىن ەكىنىڭ ءبىرى سەزىنبەۋ وسىندايدان شىعادى. الاڭ كوڭىلدىڭ ورىن الۋى تۇسىنىكتى. بىراق بۇل جاۋاپكەرشىلىك جۇگىن جەڭىلدەتپەيتىنىن تۇسىنگەنىمىز ءجون.
ايگۇل ۋايسوۆا