تۇرعىندار تالابى تۇراقتى نازاردا
قىم-قۋىت قالا تىرشىلىگىندە قوردالانعان ماسەلەلەر جەتەرلىك. تۇرعىنداردىڭ كەم-كەتىكتى ايتىپ, تولعاندىرعان سۇراقتارىن قويۋىن قالا دامۋىنا ءۇن قوسۋ رەتىندە قابىلداۋعا بولادى. ويتكەنى سايلاۋشىلاردىڭ وسىنداي سىن-ەسكەرتپەلەرى وكرۋگتەگى كەيبىر جينالىپ قالعان ماسەلەلەردى كەزەڭ-كەزەڭىمەن جۇيەلى تۇردە شەشۋگە مۇمكىندىك بەرەدى.
قالا يگىلىگى ءۇشىن جۇمىس ىستەيتىن ەلوردالىق دەپۋتاتتار تۇرعىنداردىڭ ۇنىنە قاشان دا قۇلاق تۇرە جۇرەدى. ول ءۇشىن ءماسليحات دەپۋتاتتارى ءوز سايلاۋ ۋچاسكەلەرىندە جوسپار بويىنشا قوعامدىق قابىلداۋلار وتكىزەدى.
جىل باسىنان بەرى №9 سايلاۋ وكرۋگىندە بىرنەشە قوعامدىق قابىلداۋ ۇيىمداستىرىلىپ, جۇرتتى قانداي ماسەلە مازالايتىنىنا ءمان بەردىك. «كوكتال-1», «كوكتال-2» جانە «لەسوزاۆود» پەن «پرومزونا» تۇرعىن الاپتارىن قامتيتىن بۇل ايماقتا استانالىقتار نەگىزىنەن جول ساپاسى, جولاۋشىلار كولىگى جانە جارىق ماسەلەلەرىنە كوڭىلدەرى تولمايتىندارىن جەتكىزەدى. ىزا سۋدىڭ سالدارىنان بۇل جاقتىڭ جولدارى ءجيى-ءجيى جوندەۋدى قاجەت ەتەدى.
تۇرعىندارمەن كەزدەسۋلەر بارىسىندا «لەسوزاۆود» حالقىنىڭ كوبى تەمىرجولدان ءوتۋ اجەپتاۋىر قيىندىق تۋعىزاتىنىن ايتادى. سونداي-اق, «كوكتال-2» مولتەك اۋدانىندا ۋچاسكەلىك پوليتسەيدىڭ جوقتىعى دا ايتىلعان بولاتىن. استانا قالاسى ءىىب دەپارتامەنتى باسشىسىنا جولدانعان دەپۋتاتتىق ساۋالدىڭ ارقاسىندا بۇل سۇراق جەدەل تۇردە وڭ شەشىمىن تاپقانىن ايتقىم كەلەدى. سول ءۇشىن استانا قالاسى ءىىب دەپارتامەنتى باسشىسىنا العىسىمدى بىلدىرەمىن.
ارينە, استانا بۇگىندە ۇلكەن مەگاپوليسكە اينالدى. «پاتشا اۋعان جاققا باق اۋادى» دەگەندەي, قازىرگى تاڭدا ىشكى ميگراتسيا ماسەلەسى دە جوعارى دەڭگەيدە تۇر. استانا قالاسىنا كەلگەن ءاربىر وتانداسىمىز «ماعان اكىم نە بەرەدى, استانا نە بەرەدى» دەمەستەن, ەسەسىنە «مەن وسى استانانىڭ دامۋىنا نە بەرەم, قانداي ۇلەس قوسام» دەپ كەلسە, يگى بولار ەدى.
سونىمەن قاتار, الەۋمەتتىك ماسەلەلەرمەن جۇگىنەتىن جۇرتتار دا جەتەرلىك. ولاردىڭ ىشىندە, ارينە, باسپانا جايى دا ءسوز بولادى. مىسالى, تۇرعىن ءۇيدىڭ كەزەگىن جىلجىتۋ, جەكە مەنشىك ءۇي سالۋ ءۇشىن جەر تەلىمىن الۋعا جاردەم سۇراۋ جانە مۇمكىندىگى شەكتەۋلى تۇرعىندارعا ماتەريالدىق كومەك كورسەتۋ سياقتى. ولارعا قولدان كەلگەنشە قاراسىپ, مۇمكىن بولسا ماسەلەسىن شەشىپ بەرۋدەمىز.
ءبىزدىڭ وكرۋگتە تۇراتىن ارداگەرلەردىڭ جاعدايى – ۇدايى نازاردا. ولارعا كومەك قولى سوزىلىپ, قايىرىمدىلىق اكتسيالارى ۇيىمداستىرىلدى.
قوعامدىق قابىلداۋ كەزىندە ەكى قولعا ءبىر كۇرەك ىزدەگەن جاندار دا كەزدەسەدى. ولاردىڭ ىشىندە ءتۇرلى كاسىپكە يكەمى بار تۇرعىندار دا بار. جاقىندا عانا قالالىق ۇستازداردىڭ تامىز كونفەرەنتسياسىندا استانا قالاسىنىڭ اكىمى اسەت يسەكەشەۆ بيىل كاسىپتىك-تەحنيكالىق ماماندىقتارعا, سونىڭ ىشىندە جۇمىسشى ماماندىقتارىن دايىنداۋعا اسىمدىق بەرىلەتىنىن ايتتى. وسى باعىتتا جۇمىسشى ماماندىقتارعا مەملەكەتتىك تاپسىرىسپەن ورىندار دا بولىنبەك. بۇل دا ءوز كەزەگىندە قالاداعى جۇمىسسىزدىق ماسەلەسىن شەشۋگە ۇلكەن سەبەپ بولاتىنى ءسوزسىز. سونىمەن قاتار, مەكتەپتەردە جاستاردى كاسىپكە بەيىمدەۋمەن بىرگە, كوللەدجدەردە ەڭبەك نارىعىندا سۇرانىسقا جوعارى جاڭادان 5 ماماندىق اشىلاتىنىن ايتقان ەدى. ءوزىم وسى سالادا قىزمەت اتقارعاندىقتان, بۇل وڭ وزگەرىستەردى قولداپ, قۋاتتاۋعا ارقاشان دايىنمىن. ويتكەنى بۇگىندە قالامىزدا كاسىپتىك مامانداردىڭ جەتىسپەۋشىلىگى بايقالادى. سوندىقتان قوعامدا وسىنداي مامانداردىڭ مارتەبەسىن كوتەرۋ ءۇشىن جۇمىستار جاسالۋى كەرەك.
ارينە, وكرۋگتەگى سايلاۋشىلار كوتەرگەن وزەكتى ماسەلەلەردىڭ ءبارى دە ەسكەرۋسىز قالمايدى. القالى جيىندا تالقىلانىپ, قاراستىرىلىپ, الداعى ۋاقىتتا بىرتىندەپ شەشىمىن تابادى دەپ ويلايمىن.
زۋلفۋحار گايپوۆ,
№9 سايلاۋ وكرۋگىنىڭ دەپۋتاتى