بۇرسىگۇنى ورتالىق كوممۋنيكاتسيالار قىزمەتىندە قر تۇتىنۋشىلاردىڭ قۇقىقتارىن قورعاۋ اگەنتتىگى توراعاسىنىڭ ورىنباسارلارى جانداربەك بەكشين مەن نۇرلان ۇرانحاەۆتىڭ قاتىسۋىمەن بريفينگ ءوتتى.
بريفينگتە ەلىمىزدەگى سانيتاريالىق-ەپيدەميولوگيالىق جاعداي, تۇتىنۋشىلىق قۇقىقتارىن قورعاۋ جانە قازاقستاننىڭ ىشكى نارىعىندا ءونىمنىڭ قاۋىپسىزدىگىن قامتاماسىز ەتۋ ماسەلەلەرى ايتىلدى. سونداي-اق, جانداربەك بەكشين بيىل رەسپۋبليكاداعى سانيتاريالىق-ەپيدەميولوگيالىق جاعدايدىڭ تۇراقتى ەكەنىن ايتتى.
ول ءوز سوزىندە: «جىل سايىن مەملەكەت ينفەكتسيالىق اۋرۋلاردىڭ الدىن الۋعا قوماقتى قارجى ءبولىپ وتىرادى. مىسالى, سوڭعى 7 جىلدا تۇرعىنداردى ينفەكتسيالىق اۋرۋلارعا قارسى ۆاكتسيناتسيالاۋعا بولىنەتىن قارجىنىڭ كولەمى 12 ەسەگە ارتىپ, 15 ملرد تەڭگەنى قۇرادى» دەدى. بەكشين بالالاردى قىزامىققا قارسى ۆاكتسيناتسيالاۋ قىزىلشاعا جانە ەپيدەميالىق پاروتيتكە, b تيپىندەگى گەموفيلدىك ينفەكتسياعا قارسى ارالاس ۆاكتسينالار قۇرامىندا ارالاس جۇرگىزىلەدى جانە پنەۆموكوك ينفەكتسياسىنا قارسى ۆاكتسيناتسيالاۋ كەزەڭ-كەزەڭمەن ەنگىزىلەتىنىن ايتتى.
سونىمەن قاتار, وتكەن 5 ايدىڭ قورىتىندىسى بويىنشا ەلىمىزدە قىزىلشانىڭ 167 جاعدايى تىركەلگەن ەكەن. ال 2013 جىلى مۇنداي 73 جاعداي ورىن العان.
اگەنتتىك ەپيدەميالىق ماڭىزى جوعارى وبەكتىلەرگە قاتىستى تەكسەرۋ توقسان سايىن ەمەس, جارتى جىلدا ءبىر رەت, ال ەپيدەميالىق ماڭىزى ورتاشا وبەكتىلەرگە قاتىستى جارتى جىل سايىن ەمەس, جىلىنا ءبىر رەت جۇرگىزىلەتىن بولادى. ياعني, اتالعان توپتار بويىنشا جوسپارلى تەكسەرۋلەردىڭ جيىلىگىن 2 ەسەگە قىسقارتۋ ۇسىنىلعان.
ال نۇرلان ۇرانحاەۆ اگەنتتىكتىڭ باسىم باعىتتارىنىڭ ءبىرى ءونىمنىڭ قاۋىپسىزدىگى مەن ساپاسىن قامتاماسىز ەتۋ جونىندەگى ءىس-شارالار بولىپ تابىلاتىنىن ءسوز ەتتى.
«اگەنتتىك دۇنيەجۇزىلىك بانكتىڭ جاردەمدەسۋىمەن سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى جانىنان «ورتالىق ازيا تاماق قاۋىپسىزدىگى» وقىتۋ ورتالىعىن قۇرۋدى جوسپارلاپ وتىر. ورتالىقتىڭ قىزمەتى حالىقارالىق ستاندارتتاردى جانە وقىتۋدىڭ بىرنەشە ءتۇرىن پايدالانا وتىرىپ, بيزنەس-وپەراتورلاردى وقىتۋعا, سونداي-اق, ۆەدومستۆو ماماندارىنىڭ كاسىپتىك ءبىلىمىن ۇزدىكسىز ارتتىرۋعا جانە پراكتيكالىق داعدىلارىن جەتىلدىرۋگە باعىتتالاتىن بولادى» دەدى ول.
سونىمەن قاتار, نۇرلان ۇرانحاەۆ اعىمداعى جىلعى 7 ماۋسىمدا قازاقستان رەسپۋبليكاسى ۇكىمەتىنىڭ قاۋلىسىمەن تۇتىنۋشىلاردىڭ قۇقىقتارىن قورعاۋ جۇيەسىن جەتىلدىرۋدىڭ 2014-2015 جىلدارعا ارنالعان كەشەندى جوسپارى بەكىتىلگەنىن حابارلادى.
نۇريسلام قۇسپانعالي
