كەشە ەلوردا اكىمىنىڭ ورىنباسارى ماليكا بەكتۇروۆانىڭ قاتىسۋىمەن شاھار باسشىلىعى, قر قارجى مينيسترلىگىنىڭ مەملەكەتتىك كىرىستەر كوميتەتى جانە «Uber» كومپانياسى اراسىندا ۇشجاقتى ىنتىماقتاستىق تۋرالى مەموراندۋمعا قول قويىلدى.
الەمنىڭ 70-تەن استام مەملەكەتىندە قىزمەت كورسەتەتىن حالىقارالىق كومپانيا قازاقستاندىق نارىققا ەلوردادان باستاپ كىرمەك.
اتالمىش قۇجاتقا سايكەس, «Uber» تەك كاسىپكەرلىك قىزمەت سۋبەكتىلەرى رەتىندە تىركەلگەن سەرىكتەستەرمەن عانا جۇمىس ىستەيدى. اۆتوماتتاندىرىلعان ەسەپ ايىرىسۋ جۇيەسىنىڭ ارقاسىندا كومپانيا وتاندىق نارىقتا جۇرگىزۋشىلەر كىرىسىنىڭ ايقىن بولۋىنا جانە سالىقتاردىڭ بيۋدجەتكە تولىق تولەنۋىنە جاعداي جاسايدى.
– ارينە, بۇل – ءبىز ءۇشىن ايتۋلى وقيعا. «Uber» كومپانياسىمەن كوپتەن بەرى كەلىسسوزدەر جۇرگىزىپ كەلەمىز, ونىڭ قازاقستان نارىعىنا وسى استانادان باستاپ كىرەتىنىنە قۋانىشتىمىز. جۇيە ايقىندىلىعىنىڭ ارقاسىندا شاعىن جانە ورتا بيزنەستى دامىتۋعا قوسىمشا مۇمكىندىكتەر اشىلىپ, مەملەكەتتىك بيۋدجەتكە تۇسەتىن تۇسىمدەر ۇلعايادى. ال ەڭ ماڭىزدىسى, نارىقتا تاعى ءبىر الەمدىك برەند بولادى, – دەدى استانا قالاسى اكىمىنىڭ ورىنباسارى ماليكا بەكتۇروۆا. ونىڭ ايتۋىنشا, جولاۋشىلار تاسىمالى نارىعىنا جاڭا كومپانيانىڭ ەنۋى ەلوردالىق بيزنەستىڭ دامۋىنا ۇلكەن سەرپىن بەرمەك.
«Uber» – پايدالانۋشىلار مەن جۇرگىزۋشى-سەرىكتەستەردى بايلانىستىراتىن تەحنولوگيالىق پلاتفورما. ءموبيلدى قوسىمشا ارقىلى تاپسىرىس بەرۋشى كىسى جۇرگىزۋشى مەن ماشيناعا رەزەرۆ قويىپ, ونىڭ بەلگىلەنگەن جەرگە دەيىنگى قوزعالىسىن باقىلاي الادى. «Uber» قاراپايىمدىلىعىمەن, قاۋىپسىزدىك تالاپتارىنىڭ
جوعارى بولۋىمەن, قولما-قول اقشالاي تولەمدەردىڭ جوقتىعىمەن ىڭعايلى. ءوز كەزەگىندە ستارتاپتىڭ تمد مەملەكەتتەرى بويىنشا باس مەنەدجەرى الەكسەي ستاح قازاقستاندىقتار كۇتكەن قولايلى سەرۆيستى ۇسىنۋعا ۋادە بەردى.
