كەشە استانا قالاسىنىڭ اكىمى يمانعالي تاسماعامبەتوۆتىڭ قاتىسۋىمەن ەلوردادا العاش رەت مەملەكەتتىك قىزمەتشىلەر كۇنىنە ارنالعان سالتاناتتى جيىن ءوتتى.
بۇگىندە ەلىمىزدە 90 مىڭعا جۋىق ازامات مەملەكەتتىك قىزمەت سالاسىندا تابىستى ەڭبەك ەتىپ كەلەدى.
– وتكەن جىلى پرەزيدەنت جارلىعىمەن 23 ماۋسىم مەملەكەتتىك قىزمەتشىلەر كۇنى دەپ بەكىتىلگەنى بەلگىلى. بۇل مەرەكە بيىل العاش رەت تويلانۋدا. قاي مەملەكەتتى الساق تا, ونىڭ ءوسىپ-وركەندەۋىنە مەملەكەتتىك قىزمەتشىلەردىڭ قوسار ۇلەسى زور. ولاي بولسا, ەل استاناسىنىڭ دامۋىنا اتسالىسىپ جۇرگەن, ىستىعى مەن سۋىعىنا توزە بىلگەن, بار ءبىلىمىن ەلدىڭ قالىپتاسۋىنا ارناعان سىزدەردى ءتول مەرەكەلەرىڭىزبەن قۇتتىقتايمىن! مەملەكەتتىك قىزمەت سالاسىن تابىستى رەفورمالاۋ جانە باسەكەگە قابىلەتتى, ساۋاتتى, بىلىكتى ماماندارمەن تولىقتىرۋ ۇلت كوشباسشىسى نۇرسۇلتان نازارباەۆتىڭ ساياسي ۇستانىمىنىڭ ناتيجەسى دەپ بىلەمىن. سوندىقتان, ەل الدىنداعى مىندەتىمىزدى بارىنشا جاۋاپكەرشىلىكپەن اتقارۋعا شاقىرامىن, – دەدى قالا باسشىسى قۇتتىقتاۋ سوزىندە.
ءتول مەرەكە قارساڭىندا قىزمەت بابىندا ىسكەرلىگىمەن ەرەكشە كوزگە تۇسكەن جانداردى ەلوردا باسشىسى «ۇزدىك مەملەكەتتىك قىزمەتشى» بەلگىسىمەن ارنايى ماراپاتتادى. ۇدەدەن شىققان ۇزدىكتەر قاتارىندا استانا قالاسى اكىمى اپپاراتى كەڭسەسىنىڭ باس مامانى قانىكەن كارىباەۆا, قارجى باسقارماسى باسشىسىنىڭ ورىنباسارى باقىتگۇل سۇلەيمەنوۆا, جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ءابدىحاميت تاماباەۆ بار. سونداي-اق, الماتى اۋدانى اكىمدىگىنىڭ كەڭسە باسشىسى ليۋدميلا فوميچەۆا, جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ءلاززات ءابۋوۆا جانە استانا قالاسى بويىنشا قازىناشىلىق دەپارتامەنتىنىڭ باسقارما باسشىسى بايان سىدىقوۆا قالا اكىمى اتىنان العىس حات يەلەندى.
سالتاناتتى شارانىڭ سوڭىندا مەملەكەتتىك قىزمەتكە جاڭادان قابىلدانعان جاس ماماندار انت قابىلدادى. مەملەكەتتىك قىزمەت ىستەر جونىندەگى اگەنتتىكتىڭ استانا قالاسى بويىنشا باسقارما باسشىسى تىلەگەن قاسقين قۇتتىقتاۋ ءسوز سويلەپ, بىرقاتار مەملەكەتتىك قىزمەتشىلەردى ديپلوممەن ماراپاتتادى.
– جاڭا ۇلگىدەگى مەملەكەتتىك قىزمەت تۇجىرىمداماسىندا كورسەتىلگەن باسىمدىقتاردى ەستە ۇستاۋ – قاي-قايسىسىمىزدىڭ مىندەتىمىز. ءتيىمدىلىك, ناتيجەلىلىك, مەريتوكراتيا, اشىقتىق جانە تۇرعىنداردىڭ ءوتىنىشىن قاناعاتتاندىرۋ قىزمەت بابىنداعى باستى باعىتىمىز بولماق. وزدەرىڭىزگە بەلگىلى, «ا» كورپۋسى جۋىردا عانا قۇرىلدى جانە تيىمدىلىگىن كورسەتۋدە. استانادا مەملەكەتتىك قىزمەت سالاسىندا ايماقتىق حاب ىسكە قوسىلىپ, مەملەكەتتىك قىزمەتكە قابىلداۋ ءراسىمى بارىنشا جەڭىلدەتىلدى. «كوماندالىق اۋىسۋعا» توسقاۋىل قويىلىپ, زاڭ شەڭبەرىندە ەتيكالىق جانە تارتىپتىك قاداعالاۋدى ساقتاۋ كۇشەيىپ كەلەدى. ەلىمىزدە مەملەكەتتىك قىزمەتشىلەر كۇنىن اتاپ ءوتۋ وسى سالادا تەر توگىپ جۇرگەندەردىڭ ابىرويىن ارتتىرۋعا, ەلباسى جاريالاعان «حالىق پەن مەملەكەتكە قىزمەت ەتۋ باستى باسىمدىق» قاعيداسى ارقىلى كاسىبي مەملەكەتتىك اپپارات قىزمەتىنىڭ نەگىزگى ۇستانىمدارىن دارىپتەۋگە ىقپال ەتپەك. ەندەشە, كۇنى-ءتۇنى ەل يگىلىگى جولىندا ايانباي تەر توگۋگە شاقىرامىن, – دەدى ت.قاسكين.
گۇلميرا ايماعانبەت
