URKER توبى مەن «استانا بالەت» تەاترى سيمفونيالىق وركەسترىنىڭ بىرلەسكەن كونتسەرتى تانىمال توپتىڭ 30 جىلدىعى مەن ەلوردالىق تەاتردىڭ 10 جىلدىق مەرەيتويىنا وراي ۇيىمداستىرىلىپ, 21-22 ناۋرىزدا «استانا بالەت» تەاترىنىڭ ساحناسىندا وتەدى. كورەرمەن قاۋىم ناعىز كاسىبيلىك پەن جاندى داۋىستا, سيمفونيالىق وركەستردىڭ سۇيەمەلدەۋىمەن شىرقالاتىن اندەردى تىڭداپ, قۇلاق قۇرىشىن قاندىرارى انىق.
«استانا بالەت» تەاترى سيمفونيالىق وركەسترىمەن بىرلەسىپ, مەرەيتويلىق كونتسەرت وتكىزۋ – URKER توبىنىڭ دامۋىنداعى كەزەكتى ءارى زاڭدى بەلەس دەپ بىلەمىن. سەبەبى ءبىزدىڭ اندەرىمىزدە بايتاق دالامىزدىڭ ءسيمفونيزمى بار, ۇشى-قيىرى جوق كەڭىستىگىمىز بەن سازدى اۋەندەرىمىز سەزىلەدى. پوپ-مۋزىكانتتاردىڭ كلاسسيكالىق وركەسترمەن وسى تەكتەس بىرلەسكەن كونتسەرتتەرى تىڭدارمان قاۋىمنىڭ قىزىعۋشىلىعىن ارتتىرا تۇسەرى داۋسىز» دەيدى URKER توبىنىڭ باسشىسى, ءارى كومپوزيتورى ايدوس ساعات.
ايدوس ساعاتتىڭ جەتەكشىلىگىمەن 1993 جىلى قۇرىلىپ, وسى ۋاقىت ارالىعىندا قۇرامى دا سوليستەرى دە الدەنەشە رەت اۋىسقان, ءتىپتى, ءبىر كەزدەرى كوپشىلىك الدىنا مۇلدەم شىقپاي قويعان بۇل توپ كوپشىلىككە ناۋرىزدىڭ بەيرەسمي ءانۇرانىنا اينالعان «ناۋرىز», ليريكالىق يىرىمدەردەن ورىلگەن «جانىم», «ماحاببات ءانى», «ساۋلەم-اي», «اسەل», «يا بۋدۋ ريادوم», «سەن», پاتريوتتىق «تۋعان ەلىم», «موي كازاحستان» جانە تاعى باسقا اندەرىمەن ەتەنە تانىس. مۋزىكالىق توپتىڭ بۇل اندەرى ءبىزدىڭ ورتاق مادەني تاريحىمىزعا اينالدى.
«سيمفونيالىق وركەستردىڭ ورىنداۋىندا ءتۇرلى جانرداعى مۋزىكا دارىپتەلىپ جاتقانىنا قۋانامىز. سيمفونيالىق وركەسترگە لايىقتالعان الەمدىك روك-پوپ مۋزىكانى ورىنداۋ بويىنشا ۇجىمىمىزدىڭ تاجىريبەسى بار. «استانا بالەت» وركەسترى URKER توبىنىڭ سۇيىكتى اندەرىنە تىڭ لەپ بەرىپ, جاڭا رەڭگە بولەيتىنىنە سەنىمدىمىن. ءبىزدىڭ وركەستردىڭ كوپتەگەن ارتىستەرى وسى اندەردى تىڭداپ, ەر جەتتى دەسەك بولادى. سول سەبەپتى, ناۋرىز مەيرامى كەزىندە ءبارىمىزدىڭ ءسۇيىپ تىڭدايتىن اندەرىمىزگە اينالعان شىعارمالاردى سيمفونيالىق وركەستردىڭ سۇيەمەلدەۋىمەن ورىنداۋ – ءبىز ءۇشىن مارتەبە دەسەك تە بولادى» دەگەن ويىمەن ءبولىستى, وركەستردىڭ مەنەدجەرى ايجان حايدار.
مەرەيتويلىق كونتسەرت ۋاقىت پەن كەڭىستىكتەگى ساياحات ىسپەتتى بولىپ قانا قويماي, ەلوردانىڭ مادەني تىنىسىنداعى ناعىز قۇبىلىسقا اينالارى ءسوزسىز. ناۋرىز مەيرامىنا ورايلاستىرىلعان كونتسەرت قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن جۇزەگە اسىرىلماق.
«استانا بالەت» تەاترىنىڭ ناۋرىزعا تارتۋى
25 ناۋرىزدا «استانا بالەت» تەاترى ساحناسىندا «ۇلى دالا مۇراسى» كونتسەرتتىك باعدارلاماسى كورسەتىلىپ, كورەرمەن قاۋىم قازاقتىڭ سايىن دالاسىنا ساياحات قۇرعانداي كۇي كەشەدى.
كەش باعدارلاماسىندا ەل ىشىندە عانا ەمەس, شەت ەلدەردە دە زور قوشەمەتپەن قابىلدانىپ, كوپشىلىكتىڭ ىقىلاسىنا بولەنگەن بيلەر توپتاماسى كورسەتىلەدى. كورەرمەن قاۋىم ەلىمىزدىڭ بي ونەرىنىڭ تاريحىنداعى جارقىن تۇلعالاردىڭ ءبىرى, قازاقستاننىڭ ەڭبەك سىڭىرگەن قايراتكەرلەرى ايگۇل ءتاتي مەن مۋكارام ءاۆاحريدىڭ شىعارماشىلىعىمەن تانىسا الادى. بۇل باعدارلامادا ەتنوگرافيالىق ەلەمەنتتەر زاماناۋي حورەوگرافيالىق شەشىمدەرمەن, جارقىن بەينەلەرمەن, قىزىقتى دراماتۋرگيامەن ۇيلەسىپ, استاسىپ جاتىر. ءاربىر مينياتيۋرا – كوشپەلى ەل دۇنيەتانىمىنىڭ سان قىرلى ءفالسافاسىن مەيلىنشە اشا تۇسەتىن ءاپسانا ىسپەتتى.
حورەوگراف ايگۇل ءتاتي جاڭا ستيليستيكالىق تاسىلدەردى ىزدەپ, مۋزىكا, قيمىل مەن كوستيۋمنىڭ تىڭ ۇندەستىگىن تابۋعا ۇمتىلعانىمەن, مۇرامىزعا اينالعان ءبيدىڭ ۇلتتىق ورنەگىن بارىنشا ساقتاۋعا كۇش سالادى. سونىمەن قاتار, ونى وي ەلەگىنەن وتكىزىپ, پايىم ولشەمىمەن ەكشەلەيدى: «مەن وزىمىزگە دەيىنگى رەجيسسەرلىك تاسىلدەردىڭ قۇرساۋىندا قالماي, بىزگە دەيىنگى قويىلىم ستيلىنەن مەيلىنشە الشاقتاۋعا تىرىستىم. مەن ءداستۇرلى قازاق ءبيىنىڭ شەڭبەرىندە قالماي, جاڭا فورما ىزدەۋگە, قازاقى بولمىسىمىزدى اشا تۇسەتىن تىڭ دۇنيەلەردى تابۋعا تىرىستىم».
بۇل بي توپتاماسىن بىرنەشە سوزبەن سيپاتتاۋعا بولار: ۇلت بولمىسىنا ءۇڭىلۋ. ءداستۇردى ساقتاپ, قاستەرلەۋ. جاڭا فورمالاردىڭ مىنسىزدىگى.
«جەتى قازىنا» پرەمەراسى
2022 جىلدىڭ جەلتوقسان ايىندا ءى رەسپۋبليكالىق «اشىق ساحنا» بايقاۋى اياسىندا تاجىريبەلى جانە ەندى عانا قانات جايا باستاعان ليبرەتتيستەر, كومپوزيتورلار, حورەوگرافتار مەن ستسەنوگرافتار ءوز جۇمىستارىن قازىلار القاسىنىڭ قۇزىرىنا تاپسىرعان بولاتىن. بايقاۋعا ەلىمىزدىڭ تۇكپىر-تۇكپىرىنەن تالاپكەرلەر قاتىستى. جەڭىمپازداردى سالتاناتتى ماراپاتتاۋ ءراسىمى مەن بايقاۋدىڭ جەڭىمپازدارى شىعارعان «جەتى قازىنا» حورەوگرافيالىق مينياتيۋراسىنىڭ پرەمەراسى «استانا بالەت» تەاترىنىڭ ساحناسىندا 2023 جىلعى 1 مامىردا وتەدى.
«اشىق ساحنا» بايقاۋى – بيىلعى ماۋسىمنىڭ كەرەمەت ەكسپەريمەنتى. ءبىز ۇنەمى ىزدەنىس ۇستىندەمىز. تىڭ يدەيالاردى جۇزەگە اسىرىپ, تەاتر ونەرى سالاسىندا جاڭا ەسىمدەردى, جاڭا دارىنداردى انىقتاۋعا تىرىسامىز. يدەيالارى كول-كوسىر دارىندى قويۋشىلارىمىز كوپ ەكەنىن زور سەنىممەن ايتا الامىن. وسى بايقاۋ جىل سايىن وتەتىن ءداستۇرلى بايقاۋعا اينالادى دەگەن ءۇمىتىمىز بار» دەگەن ويىمەن ءبولىستى تەاتردىڭ كوركەمدىك جەتەكشىسى نۇرلان كانەتوۆ.
«جەتى قازىنا» حورەوگرافيالىق مينياتيۋراسىنىڭ پرەمەراسى «ۇلى دالا مۇراسى» ديۆەرتيسمەنتىنىڭ كورسەتىلىمى بارىسىندا, «استانا بالەت» تەاترىنىڭ ساحناسىندا 1 مامىردا وتەتىن بولادى. قويىلىم اۆتورلارى قازاق حالقىنىڭ بولمىسىن سالت-ءداستۇرى مەن ادەت-عۇرپى ارقىلى كورسەتەدى. قازاقتىڭ ءداستۇرلى دۇنيەتانىمىنداعى فالسافالىق تۇسىنىكتەردىڭ ءبىرى – «جەتى قازىنا». قويىلىمعا وسى ۇعىم نەگىز ەتىپ الىنعان.
