قوعامدا ەنجارلىق, توعىشارلىق, ماسىلدىق كەلەڭسىز كورىنىستەر ءجيى بەلەڭ العان شاقتا, ەڭبەك ەتۋگە ىنتا مەن جىگەر ازايعان تۇستا ەڭبەك ادامىنا قۇرمەت ەرەكشە بولۋى ءتيىس. جاستارعا تاربيە بەرۋدىڭ باستى قۇرالى رەتىندە ەڭبەك يدەياسىن ىلگەرىلەتۋ قاجەت. ءبىلىمدى ۇلت. تەرەڭ ءبىلىم. ەڭبەكقورلىق جانە وتانشىلدىق قاسيەت قانا كەلەشەگىمىزدى كەمەل, بولاشاعىمىزدى باعدارلى ەتپەك. وسى رەتتە الەۋمەتتىك سالانىڭ بەلدى مۇشەسى, بولاشاعىمىزدىڭ بارومەترى – مۇعالىمنەن اسقان بەدەلدى ماماندىق جوقتىڭ قاسى.
ۇستاز – ۇلاعاتتى ەسىم. شاكىرتتەرىن ءبىلىم نارىمەن سۋسىنداتىپ, ءتالىم-تاربيە بەرۋدە, جاقسى قاسيەتتەردى بويىنا دارىتىپ, ادامگەرشىلىك رۋحتا باعىت-باعدار كورسەتۋدە ۇستازدىڭ ەڭبەگى زور. سوندىقتان دا ول – ءاردايىم قاسيەتتى تۇلعا.
استانا قالاسىنداعى تولەگەن ايبەرگەنوۆ اتىنداعى №16 ورتا مەكتەپتە گۇلميرا بايجۇمانوۆا 1996 جىلدان باستاپ قازاق ءتىلى مەن ادەبيەتى ءپانىنىڭ مۇعالىمى بولىپ جۇمىس ىستەيدى. جۇمىس بارىسىندا پەداگوگ-زەرتتەۋشى گۇلميرا مۋباراكقىزى ءوزىن بىلىكتى مامان, تاجىريبەلى ۇستاز, تاماشا ۇيىمداستىرۋشى جانە ونەگەلى قىزمەتكەر رەتىندە كورسەتتى. ول – ارىپتەستەرى اراسىندا بەدەلدى ۇستاز.
– ءبىزدىڭ ماقسات – ۇلتتىق قۇندىلىقتارمەن قانىققان, جاۋاپتى, ەڭبەكقور, بەلسەندى, وتانشىل جانە وزىندىك ازاماتتىق ۇستانىمعا يە ۇرپاقتى تاربيەلەۋ, – دەيدى گ.مۋباراكقىزى ءوز ويىن ايتا وتىرىپ.
«بارلىق پەداگوگتار بولاشاق عاسىردىڭ تۇلعاسىن قالىپتاستىرۋدا وعان قاجەتتى داعدىلاردى يگەرۋگە قىزمەت ەتۋ – كەز كەلگەن مۇعالىمنىڭ, ۇستازدىڭ باستى مىندەتى, ماقساتى بولۋى كەرەك» دەيدى ول.
وقۋشى جەتىستىگى – ۇستاز ابىرويى. ۇستاز ەڭبەگى شاكىرت جەتىستىگى ارقىلى كورىنەدى. ۇستازدىڭ ماقساتى – قابىلەتتى وقۋشىلاردى زەرتتەي ءجۇرىپ, ولارمەن بىرلەسكەن تىنىمسىز ەڭبەكتىڭ, شىعارماشىلىق ىزدەنىستىڭ ناتيجەسىن كورۋ. سوندىقتان ەڭ الدىمەن, ءوز كاسىبىڭە, ءوز پانىڭە دەگەن زور سۇيىسپەنشىلىك بولعانى ابزال. وسىناۋ سۇيىسپەنشىلىك وقۋشى بويىنداعى بىلىمگە, پانگە دەگەن العاشقى قۇشتارلىعىن ءتۇرتىپ وياتادى. ال وسى شاكىرت بويىندا ويانعان ءبىلىم قۇشتارلىعى ەندى تۇتانعان شىراق سەكىلدى.
9-11-سىنىپ وقۋشىلارىنا ارنالعان جالپى ءبىلىم بەرەتىن پاندەر بويىنشا اۋداندىق, قالالىق, رەسپۋبليكالىق وليمپياداعا وقۋشىلارى جىل سايىن قاتىسىپ, جۇلدەلى ورىنداردان كورىنىپ, ۇبت ناتيجەسى بويىنشا جوعارعى كورسەتكىشتەرگە يە بولدى.
2014-2015 جىلى ايزيرەك ەسەنبەكقىزى قازاق ءتىلى مەن ادەبيەتى پانىنەن جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ اۋداندىق, قالالىق كەزەڭىندە I ورىن يەلەنىپ, مەكتەپتىڭ مارتەبەسىن كوتەرىپ, ۇلكەن ابىرويمەن ورالدى. بيىل بۇل جەتىستىكتى گۇلميرا مۋباراكقىزىنىڭ شاكىرتى ەلينا ومۋراليەۆا جالعاستىردى.
وسى ورايدا اتا-انالار مەن ارىپتەستەرىنىڭ گۇلميرا مۋباراكقىزىنا ەڭبەك جولى مەن تەرەڭ دە تەلەگەي ءبىلىمىن, كۇش-قايراتىن شاكىرتتەرىنە ارناعانى ءۇشىن ايتار العىسى شەكىز.
ۇستاز ەڭبەگىن ۇلى ەتەتىن ءوزى ەمەس, شاكىرتى. ءبىلىم نارىمەن سۋسىنداتىپ, ۇيرەتۋدەن تالماعان ۇستازدىڭ سان جىلدار بويعى ەڭبەگىنىڭ جەمىسى – الامان بايگەدەن وزا شاۋىپ, «جۇزدەن جۇيرىك, مىڭنان تۇلپار» اتانعان ءبىلىمدى شاكىرتتەرى. گۇلميرا مۋباراكقىزى بۇل ۇدەدەن شىعا ءبىلدى.
مەملەكەت باسشىسىنىڭ ۇستازداردىڭ جاعدايىن جاقسارتۋعا قاتىستى قابىلداعان, مۇعالىمدەردىڭ ستاتۋسىن كوتەرۋگە باعىتتالعان زاڭى, ۇستازداردىڭ بەدەلىن كوتەرىپ, مەرەيىن تاسىتىپ, الەۋەتىن ارتتىرا تۇسكەنى انىق. وسى رەتتە قالا اكىمدىگىنىڭ, ءبىلىم باسقارماسىنىڭ ەلوردالىق ۇستازداردى قولداۋدىڭ ەڭ ۇزدىك مودەلىن كورسەتىپ وتىرعاندىعىن ايرىقشا ايتۋ قاجەت. استانا قالاسىنىڭ ۇستازدارى – ەلىمىزدەگى بارلىق ۇستازدار قاۋىمىنا مەكتەپ قانداي بولۋى كەرەك, ۇستاز قانداي بولۋى كەرەك, وقۋشى قانداي بولۋى كەرەك دەگەندە ۇلگى تۇتار, الدىڭعى قاتارلى, ۇزدىكتەر ەكەنىن ماقتانىشپەن ايتۋىمىز قاجەت!
