استانا قالالىق ءماسليحاتىنىڭ دەپۋتاتتارىن مەملەكەتتىك تۇرعىن ءۇي باعدارلاماسى اياسىندا سالىنىپ جاتقان باسپانالاردىڭ جاي-كۇيى شىنداپ الاڭداتقان سىڭايلى. الداعى سەسسيادا قارالاتىن باستى ماسەلە دە وسى. الدىمەن قۇرىلىستى اياقتاۋعا تۇساۋ بولىپ وتىرعان جايتتاردى ءوز كوزدەرىمەن كورۋ ءۇشىن حالىق قالاۋلارى تۇرعىن ۇيلەردى ارالاپ شىقتى.
استاناداعى مەملەكەتتىك باعدارلاما اياسىندا سالىنىپ جاتقان تۇرعىن ۇيلەردىڭ اياقتالۋىن تالاي ادام ۇزدىگە كۇتىپ ءجۇر. باعدارلاما بويىنشا ءۇي الۋ تىزىمىنە ىلىككەن ادامداردىڭ تۇگەلى دەرلىك ءبىر باسپاناعا ءزارۋ ەكەندىگىن ەسكەرسەك, سول تۇرعىن ۇيلەردى اياقتاۋ – قانشالىقتى ماڭىزدى ءىس ەكەنىن تۇسىنەسىز.
بيۋدجەتتىك ۇيىم قىزمەتكەرلەرى مەن جاس وتباسىلار قونىستاناتىن باسپانالاردىڭ باسىم كوپشىلىگى ن.تىلەنديەۆ داڭعىلىنىڭ وڭتۇستىك بەتكەيىندە ورنالاسقان. سوندىقتان ءماسليحات دەپۋتاتتارى الدىمەن وسى ءوڭىردى بەتكە الىپ, س.سەيفۋللين كوشەسىندەگى «ساپا» تۇرعىن ءۇي كەشەنى مەن 187,188-ءشى كوشەلەردەگى كوپ قاباتتى ۇيلەردىڭ جاي-جاپسارىمەن تانىستى.
قانشاما حالىقتى سارعايتا كۇتتىرگەن بۇل ۇيلەردىڭ اياقتالۋىنا نە كەدەرگى بولىپ تۇر دەگەن ساۋالىمىزعا استانا قالاسى قۇرىلىس باسقارماسى باستىعىنىڭ ورىنباسارى نۇربول نۇرساعاتوۆ ونىڭ وبەكتيۆتى جانە سۋبەكتيۆتى سەبەپتەرى كوپ ەكەندىگىن ايتتى. ءبىر عانا مىسال, كوپ قاباتتى ۇيلەردىڭ ءبىرىن سالىپ بىتىرۋگە ءتيىس «دەكور استانا» اتتى تۇرىك ەلىنىڭ قۇرىلىس مەكەمەسى ورتا جولدان جۇمىستى تاستاپ كەتكەن ەكەن. سول ءۇشىن ولار ءتيىستى جازاسىن دا العان. بۇل مەردىگەرلەردىڭ ورنىنا باسقالاردى تاۋىپ, بەلگىلەنگەن مەردىگەر ءتيىستى پروتسەدۋرالاردان ءوتىپ, جۇمىستى قولعا العانشا تۇرعىن ءۇي قۇرىلىسى ۋاقىتشا توقتاپ قالعان.
كەيبىر قۇرىلىسقا قارجى جاعى دا قولبايلاۋ بولعان. ءاۋ باستا ءبىر شارشى مەترى 56 مىڭ 515 تەڭگەگە باعالانعان باسپانالار سالىنىپ بىتكەنشە قۇرىلىس زاتتارى قىمباتتاپ كەتىپ, باستاپقى باعانى وتەي الماي قالعان.
– بىراق قازىر بار ماسەلە شەشىلگەن, -دەيدى نۇربول تولەگەنۇلى. – ارينە, سىن-ەسكەرتپەلەر جوق دەپ ايتا المايمىن, بار. مەردىگەرلەر ەشقايدا كەتپەيدى. دەرەۋ كەم-كەتىكتى ورنىنا كەلتىرەدى, تۇزەتەدى. بۇلار – 2008-2011 جىلدارعا ارنالعان مەملەكەتتىك باعدارلاما اياسىنداعى سوڭعى ۇيلەر. بۇدان كەيىن قولعا الىناتىن باعدارلامانىڭ شەڭبەرىندەگى ۇيلەردىڭ باعاسى جاقسى. مۇنداعىداي ماسەلە تۋىندامايدى دەپ ويلايمىن.
ماماندار سالىپ جاتقان ۇيلەرىنىڭ قۇرىلىسىن بىرەر ايدا تولىق اياقتايمىز دەپ ۋادە ەتىپ وتىر. ەگەر مەملەكەتتىك كوميسسيا تاراپىنان سىن-ەسكەرتپەلەر بولماسا, وندا جۇرتشىلىق كوپتەن كۇتكەن پاتەرىنە وسى جىلدىڭ اياعىنا دەيىن قول جەتكىزەتىن بولادى.
قىمبات نۇرعالي
