29-31 مامىر ارالىعىندا بەيبىتشىلىك جانە كەلىسىم سارايىندا استانا قالاسى اكىمدىگى مەن مادەنيەت باسقارماسىنىڭ, سونداي-اق, «حابار» اگەنتتىگىنىڭ قولداۋىمەن «ازيا داۋىسى» ديرەكتسياسى جاس ورىنداۋشىلاردىڭ «جاس قانات» رەسپۋبليكالىق بايقاۋىن وتكىزەدى.
بيىل جيىرما ءتورتىنشى رەت قولعا الىنعان ءان مەرەكەسىنە ەلىمىزدىڭ ون قالاسىنان 15 ۇمىتكەر قاتىسادى. ونىڭ ىشىندە ەكىباستۇز, بايقوڭىر, ستەپنوگورسك قالاسىنان جاس ورىنداۋشىلار العاش رەت باق سىناعالى وتىر. ال, ەلوردادان بەس بىردەي جاس تالانت ءوتىنىش بىلدىرگەن. بارلىعى دا باس قالاعا ارمان قۋىپ كەلگەن اۋىل جاستارى ەكەن.
ءۇش كەزەڭدە وتەتىن ونەر دوداسىنا پەتروپاۆل, سەمەي, قاراعاندى, تالدىقورعان, كوكشەتاۋ جانە شىمكەنت قالالارىنان ءبىردى-ەكىلى ورىنداۋشى قاتىسقالى وتىر. ءبىر وكىنىشتىسى, ەلىمىزدىڭ باتىس ايماعىنان قورىتىندى كەزەڭدە بىردە-ءبىر ونەرپاز توبە كورسەتە الماي قالدى.
ونەر الەمىنە مەدەۋ ارىنباەۆ, ەرلان كوكەەۆ, جاننا ورىنباساروۆا, نۇرلان ابدۋللين, گۇلنۇر ورازىمبەتوۆا, باقىت شاداەۆا, قۇرماش ماحانوۆ, ءمادينا سادۋاقاسوۆا, بەيبىت قورعان, مارجان اراپباەۆا سياقتى تالانتتاردى اكەلگەن «جاس قانات» بيىل دا جاڭا ەسىمدەردى انىقتاپ, قانات قاقتىرارى ءسوزسىز.
ال, بيىلعى ۇمىتكەرلەر قاتارىندا استانا قالاسىنان سۇلتان احمەت, ولجاس سۇلەيمەن, نۇربول سىدىقوۆ, نۇرلان تۇكەنوۆ جانە ەركەبۇلان تۇرمۇحامبەتوۆ بار.
قازىلار القاسىنىڭ قۇرامىنا تانىمال مادەنيەت قايراتكەرلەرى مەن ەسترادا انشىلەرى ەنگەن. ولار ۇمىتكەرلەردى ءۇش كەزەڭ بويىنشا ىرىكتەپ, قاتىسۋشىلاردىڭ ۇشتەن ءبىرىن عانا اقتىق سىنعا جىبەرەدى. توپتان سۋىرىلىپ شىققاندار التىن, كۇمىس, قولا قاناتتارعا يە بولادى.
ساعي ورال
