فۋتبولدان تۇڭعىش رەت ۇيىمداستىرىلعان ستۋدەنتتەردىڭ ۇلتتىق ليگاسىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قۇراما كومانداسى الدىنا قارا سالماي, استانالىقتاردىڭ ابىرويىن اسقاقتاتتى.
«كۇز-2014» فينالدىق ويىنى تۇڭعىش پرەزيدەنت كۇنىنە ورايلاستىرىپ ۇيىمداستىرىلدى. «استانا ارەنا» ستاديونىندا وتكەن فينالدىق ويىندى 7 مىڭعا جۋىق جانكۇيەرمەن بىرگە تاماشالاۋ ءۇشىن قر ءبىلىم جانە عىلىم ءمينيسترى اسلان ءسارىنجىپوۆ, قازاقستان فۋتبول فەدەراتسياسىنىڭ پرەزيدەنتى ءارى استانا قالاسىنىڭ اكىمى ادىلبەك جاقسىبەكوۆ, سونداي-اق, قفف باسشىلىعىنان سەيدىلدا بايشاقوۆ, اللەن ءشايجۇنىسوۆ, ولجاس ابراەۆ سىندى ازاماتتار ارنايى كەلدى.
اقتىق سىندا ەۇۋ قۇراماسى مەن ءال-فارابي اتىنداعى قازۇۋ كومانداسى ءوزارا كىم مىقتىنى انىقتادى. قوس كوماندا دا تارتىستى ويىن وتكىزگەنمەن, ۇلتتىق ستۋدەنتتەر ليگاسىنىڭ فينالىندا 3:0 ەسەبى تىركەلىپ, استانالىق فۋتبولشىلاردىڭ مەرەيى ۇستەم بولدى. جەڭىمپاز كوماندانىڭ ساپىنان ەكىنشى مينۋتتا يسلام احمەتوۆ ءبىرىنشى بولىپ گول سوقسا, رۋسلان ساندىباەۆ ويىننىڭ جەتىنشى مينۋتىندا ەسەپتى ەسەلەي ءتۇستى. ال ءۇشىنشى دوپتىڭ اۆتورى – ءادىل بالعاباەۆ.
وسىلايشا الماتىلىق قازۇۋ قۇراماسى العاش رەت ۇيىمداستىرىلعان جارىستىڭ كۇمىس جۇلدەگەرى اتانسا, جارىستىڭ قولا مەدالى قازاق ۇلتتىق اگرارلىق ۋنيۆەرسيتەتىنىڭ ەنشىسىندە كەتتى. ءۇشىنشى ورىن ءۇشىن بولعان كەزدەسۋدە س.سەيفۋللين اتىنداعى قازاتۋ قۇراماسى قارسىلاستارىنا 2:3 ەسەبىمەن جول بەردى.
ەستەرىڭىزگە سالا كەتەيىك, جەڭىمپازدار 2015 جىلدىڭ 6 ماۋسىمىندا بەرلين قالاسىندا بولاتىن ۋەفا چەمپيوندار ليگاسىنىڭ فينالدىق كەزدەسۋىنە بيلەتتەر ۇتىپ الدى. ال ۆيتسە-چەمپيوندار 2015 جىلدىڭ 27 مامىرىندا ۆارشاۆا قالاسىندا وتەتىن ۋەفا ەۋروپا ليگاسىنىڭ فينالدىق ويىندارىن كورۋگە ارنالعان بيلەتتەرگە يە بولدى. قولاعا قول جەتكىزگەندەر دە قاراپ قالمايدى: الداعى جىلى تبيليسي قالاسىندا ءوتۋى ءتيىس ۋەفا سۋپەركۋبوگىن تاماشالايتىن ۇلكەن مۇمكىندىككە يە بولدى.
نۇريسلام قۇسپانعالي
