قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ كەشە وتكەن كەزەكتى بريفينگىندە «ايتىس» («iTys») اتتى تۇڭعىش قازاقستاندىق مەسسەندجەردىڭ تانىستىرىلىمى بولدى. مەملەكەتتىك ءتىلدى دامىتۋ قورىنىڭ ديرەكتورى ازات شاۋەەۆ پەن اتالعان جوبانىڭ جەتەكشىسى ءداۋىت شايحيسلاموۆ قاتىسقان باسقوسۋدا موبيلدىك قوسىمشانىڭ ارتىقشىلىقتارى كەڭىنەن تانىستىرىلدى. ولاردىڭ ايتۋىنشا, بۇل «Whatsapp» اتتى الەمگە بەلگىلى مەسسەندجەردىڭ قازاقستاندىق بالاماسى بولماق. ياعني, «iTys» تۇڭعىش رەت قازاقستاندىق ماماندار جاساپ شىعارعان, جەدەل حابار الماسۋعا ارنالعان ۇلتتىق جوبا.
«iTys» ورىس جانە اعىلشىن تىلدەرىندە عانا ەمەس, ەڭ باستىسى, قازاق ءالىپبيىنىڭ بارلىق ارىپتەرىن پايدالانىپ, مەملەكەتتىك تىلدە حابار الماسۋعا بولاتىندىعىمەن ەرەكشەلەنەدى. بۇل ونى قازىرگى كەزدە قولدانىستا جۇرگەن بەلگىلى مەسسەندجەرلەردەن دارالاپ, ءاربىر قازاقستاندىققا ارنالعان, تولىقتاي ۇلتتىق ءىت-ءونىم رەتىندە تانىتا الادى. جاڭا وتاندىق ءونىم قازاق ءتىلىن قارقىندى دامىپ كەلە جاتقان اقپاراتتىق ورتاعا بەيىمدەۋ تۋرالى ەلباسى نۇرسۇلتان نازارباەۆ جۇكتەگەن مىندەتتەرگە تولىعىمەن ساي كەلەدى» دەدى باسقوسۋدا ازات شاۋەەۆ. ونىڭ ايتۋىنشا, «iTys» قوسىمشاسىنىڭ ەڭ باستى ەرەكشەلىگى – ونىڭ ۇلتتىق مانەردە ايشىقتالعان, مەملەكەتتىك تىلدە قولدانۋعا بولاتىن ەكسكليۋزيۆتى ينتەرفەيسى مەن ءمازىرى.
«موبيلدىك قوسىمشاداعى بارلىق سمايليكتەر قازاقتىڭ ۇلتتىق ناقىشىندا جاسالعان. سونىمەن قاتار, مۇنىڭ تاعى ءبىر ماڭىزدى قىرى – باسقا مەسسەندجەرلەر سياقتى قولدانۋ ءۇشىن تولەم تالاپ ەتپەيدى. كەز كەلگەن ادام ونى «iTys.kz» سايتىنان تەگىن جۇكتەپ الىپ, تەگىن قولدانا الادى. وسىنىڭ بارلىعى حابار الماسۋعا ارنالعان تۇڭعىش قازاقستاندىق ءموبيلدى قوسىمشا – «iTys»-تى تەك تارتىمدى, قىزىقتى ەتىپ قويماي, قازاقستاننىڭ كەز كەلگەن تۇرعىنى ءۇشىن مەيلىنشە قولجەتىمدى ەتەدى» دەدى ا.شاۋەەۆ جيىن بارىسىندا.
«iTys» جوباسىنىڭ تاعى ءبىر ەرەكشەلىگى – وندا جەكە حاتتاردىڭ قۇپيالىلىعىن ساقتاۋعا مۇمكىندىك بەرەتىن حابارلامالاردى اۆتوماتتى تۇردە ءوشىرۋ فۋنكتسياسى بار. مۇنداي قىزمەت الەمدەگى بىردە-ءبىر مەسسەندجەردە جوق. سونىمەن قاتار ونى جەتىلدىرۋگە ءاربىر قازاقستاندىق ءوز ۇلەسىن قوسا الاتىن حالىقتىق مەسسەندجەر بولىپ تابىلادى.
ايتا كەتكەن ءجون, قازىرگى تاڭدا قوسىمشانى جۇكتەۋ «Android» وپەراتسيالىق جۇيەسى بار سمارتفوندار ءۇشىن قولجەتىمدى. جوبانى جاساۋشىلار جەلتوقسان ايىندا «iOC» پلاتفورماسىنا شىعۋدى كوزدەپ وتىر.
اسحات رايقۇل
