ۇلىبريتانياداعى وتانداستار ۇيىمشىل
قازاقستان انۇرانىمەن جانە گرينۆيچ بويىنشا تاڭعى ساعات جەتىنى سوققان بيگبەن قوڭىراۋىمەن بىرگە قازاقستان رەسپۋبليكاسىنىڭ ۇلىبريتانياداعى جانە سولتۇستىك يرلانديا كورولدىگىندەگى ەلشىلىگى جانىنداعى №194 ۋچاسكەلىك سايلاۋ كوميسسياسى ءوز جۇمىسىن باستادى.
ۇلىبريتانيا استاناسىنىڭ قاق ورتاسىنداعى ايگىلى پالمەل كوشەسىندە ورنالاسقان قازاقستان ەلشىلىگىنىڭ قىزمەتكەرلەرى سايلاۋعا قاتىسۋعا ىقىلاس تانىتا كەلگەندەردى ەسىك الدىنان ەمەن-جارقىن قارسى الدى.
سايلاۋشىلاردىڭ باسىم كوپشىلىگى ۇلىبريتانيادا تۇرىپ جاتقان قازاق جاستارى, ونىڭ ىشىندە «بولاشاق» باعدارلاماسى بويىنشا تۇماندى البيوننىڭ ماڭدايالدى ۋنيۆەرسيتەتتەرىندە ماماندىق يگەرىپ جاتقان ستۋدەنتتەر سايلاۋعا بەلسەنە قاتىسۋدا.
اتالمىش ۋچاسكەلىك سايلاۋ كوميسسياسىنىڭ توراعاسى, ۇلىبريتانياداعى قازاقستان ەلشىلىگىنىڭ كەڭەسشىسى عاني بەكەنوۆ: «ۇلىبريتانيا اۋماعىندا تۇراتىن ەلىمىزدىڭ ازاماتتارى سايلاۋعا ۋچاسكەنىڭ اشىلۋ ساتىنەن اعىلىپ كەلدى.
اسىرەسە, بريتاندىق ۋنيۆەرسيتەتتەردە وقىپ جاتقان قازاق ستۋدەنتتەرى بەلسەندىلىك تانىتۋدا. جالپى العاندا, ۋچاسكەمىزدەگى سايلاۋ ءۇردىسى تىنىش, وتە جاقسى جاعدايدا جانە قازاقستان رەسپۋبليكاسىنىڭ زاڭدارىنا سايكەس ءوتىپ جاتىر دەۋگە بولادى.
بۇل سايلاۋ وتانىنان جىراقتا, ۇلىبريتانيادا جۇرگەن بارلىق قازاقستان ازاماتتارى ءۇشىن تەك وزدەرىنىڭ سايلاۋ قۇقىلارىن ءجۇزەگە اسىرۋ مۇمكىندىگى بولىپ قانا قويماي, سونىمەن بىرگە وزدەرىنىڭ
ءارى ەلىمىزدىڭ بولاشاعىن ايقىنداۋعا قوسقان ۇلەسى دەگەن ۇمىتتەمىن» دەيدى.
عاني شايقى-يسلامۇلىنىڭ ءسوزىنىڭ راستىعىنا بىرىنەن سوڭ ءبىرى سايلاۋ ۋچاسكەسىنە كەلىپ, وزدەرىنىڭ سايلاۋ قۇقىلارىن ورىنداپ جاتقان وتانداستارىمىزدىڭ كوپتىگىنە ءبىز دە كۋا بولدىق.
«بولاشاق» باعدارلاماسىنىڭ ستيپەندياتى اتانىپ, ساۋتگەمپتون ۋنيۆەرسيتەتىندە وقىپ جاتقان وسى جولداردىڭ اۆتورى دا ءبىر توپ ستۋدەنتتەرمەن بىرگە لوندونعا تاڭ بوزىندا كەلىپ, العاشقىلاردىڭ ءبىرى بولىپ داۋىس بەرگەنىمىزدى ايتا كەتكىم كەلەدى.
ءبىز تاقىلەتتەس قازاق جاستارى باسقا ۋنيۆەرسيتەتتەردەن كەلىپ, قۇربى-قۇرداستارىمەن وسىناۋ مەرەكەگە تولى, تاريحي كۇندە جۇزدەسىپ قالىپ جاتقانىنا بەك قۋانىشتى.
ۇلىبريتانيانىڭ جوعارى وقۋ ورىندارىنداعى قازاق ستۋدەنتتەرىنىڭ 70-كە جۋىق قاۋىمداستىعىن بىرىكتىرىپ, ورتاق ىسكە جۇمىلدىرۋعا كىرىسكەن «كازاليانس» قوعامدىق ۇيىمىنىڭ پرەزيدەنتى, «بولاشاق» ستيپەندياتى راشيد ايۋپوۆ ءوز ءسوزىندە جالپى قازاق ستۋدەنتتەرى تەك سايلاۋدا عانا ازاماتتىق تانىتىپ قويماي, سايلاۋالدى ناۋقانعا دا ۇيىمداسا اتسالىسقاندارىن ايتتى. سونىمەن قاتار, ولار شەتەلدەردە «قازاقستان-2050» ستراتەگياسىن ناسيحاتتاۋدى دا ءوز مىندەتى سانايدى.
سايلاۋ ۋچاسكەسىنىڭ ەرەكشە مەيمانى رەتىندە نارتاي بەكەجانوۆ اتىنداعى قىزىلوردا وبلىستىق مۋزىكالىق دراما تەاترىنىڭ ترۋپپاسىن دا ايتا كەتۋگە بولادى. «Royal colleedge of Music» وقۋ ورنىنىڭ تەاتر ساحناسىندا جازۋشى-دراماتۋرگ دۋلات يسابەكوۆتىڭ «Tranzit Passenger» («وكپەك جولاۋشى»), «ەسكى ۇيدەگى ەكى كەزدەسۋ» پەسالارىن ساحنالاعان جەرلەستەرىمىز ەلشىلىككە قازاقتىڭ كوك تۋىن جەلبىرەتە ەنىپ, الىستاعى اعايىنمەن ءتوس قاعىستىرا امانداستى.
تەاتردىڭ باس رەجيسسەرى حۇسەيىن ءامىر-تەمىر: «ءبىز بۇگىن ەكى تاريحي وقيعانىڭ كۋاگەرى ءارى قاتىسۋشىسى بولدىق. ونىڭ ءبىرى – العاش رەت انگليادا قازاق پەساسىن كاسىبي ارتىستەرىمىزدىڭ ساحنالاۋى, ەكىنشىسى – ەلدىڭ ەرتەڭى ءۇشىن ايرىقشا ماڭىزدى كەزەڭ – قازاقستان رەسپۋبليكاسىنىڭ پرەزيدەنتىن سايلاۋعا قاتىستى» دەدى.
سونداي-اق, ەلدەن شالعاي ەۋروپاداعى قازاقستان رەسپۋبليكاسىنىڭ پرەزيدەنتىن سايلاۋعا ەلىمىزدەن جانە جەرگىلىكتى باق-تان بىرنەشە جۋرناليست قاتىستى.