تۇڭعىش پرەزيدەنت كۇنى جانە ۇلتتىق اكادەميالىق كىتاپحانانىڭ 10 جىلدىق مەرەيتويىنا وراي «قازىرگى قازاق پوەزياسى جانە جاستار. ۇلىقبەك ەسداۋلەت ءدارىسى» اتتى ادەبي كەزدەسۋ كەش ءوتتى. باسقوسۋعا ەلورداداعى زيالى قاۋىم مەن جاس وقىرماندار قاتىسىپ, اقىنعا كوكەيلەرىندەگى ساۋالدارىن قويدى.
جيىندا الدىمەن مەملەكەتتىك سىيلىعىنىڭ يەگەرى, «التىن ەسەنين» مەدالىنىڭ كاۆالەرى, قازاقتىڭ كورنەكتى اقىنى, جۋرناليست ۇلىقبەك ەسداۋلەتتىڭ تۇركيادا, قىرعىزستاندا, موڭعوليادا, رەسەيدە جارىق كورگەن جاڭا جىر كىتاپتارى جəنە «قازىعۇرت» باسپاسىنان شىققان ءۇش تومدىعى تانىستىرىلدى. سودان كەيىن كەش يەسى كىتاپحانا ۇجىمىن ءتول مەرەكەلەرىمەن قۇتتىقتاپ, ونىڭ تۇڭعىش پرەزيدەنت كۇنىمەن تۇسپا-تۇس كەلۋى قۋانىشتى ەسەلەي تۇسكەنىن ايتتى.
باسقوسۋ بارىسىندا اقىن ادەبيەتتىڭ كەشەگىسى مەن قازاق پوەزياسىنىڭ دامۋ بارىسى جايىندا ءوز ويلارىمەن ءبولىستى. «قازاق رۋحانياتىنىڭ قازىناسى ەشقاشان ورتايماق ەمەس. بۇگىنگى بۋىننىڭ اراسىندا دا ءبىزدىڭ ءسوزىمىزدى جالعاپ, ءىزىمىزدى باسار قالامگەرلەر از ەمەس. مىنە, وسىلار – ەرتەڭگى ادەبيەتتىڭ كەلبەتى مەن بولمىسى» دەگەن ۇلىقبەك ەسداۋلەت جاقىندا عانا كىتاپتارى جارىق كورگەن ەرلان ءجۇنىس, ەربول بەيىلحان, قۇرالاي ومار, باۋىرجان قاراعىزۇلى سىندى جاس اقىندارعا باتاسىن بەردى. ءسوز اراسىندا ءوزىنىڭ زامانداستارى جايىندا, ءابدىلدا تاجىباەۆ, مۇحامەدجان قاراتاەۆ, عافۋ قايىربەكوۆ سىندى تۇلعالار تۋرالى ەستەلىكتەردەن سىر تارتتى.
اسحات رايقۇل
